Baoh sang sa-ai Huỳnh Ngọc Diện, daok di palei Mỹ An 2, xa Mỹ Hòa Hưng hu 1.400m² taneh ngak hamu ngak apuh. Dahlau diah, baoh sang sa-ai sa janih ngak padai saong pala njam salat, tia to, njam puan … mek jien tame oh tani tanat. Mboh bruk ngak klak oh daok siam lagaih, sa-ai Diện marat hatai salih tapa pala tamun halam dalam sang kreih camin tui jalan pandar ilamo ngak kong pakat jamraik glaong. 

Hadei tuk duah thau ka bruk ngak, thau ilamo ky thuat pala drak, diuk pasang sa-ai Diện marat hatai buh jien tame padang 2 baoh sang kreih camin hu taong abih jien buh tame labaih 300 trieu dong. Sang sa-ai Diện pala labaih 3.900 takai phun tamun ia hani, tamun kanyik di taneh praong 1.400m². Sa thun sa-ai palaik pajaih meng 3-4 mbang tamun halam, yaok mbang brei baoh meng 2-3 tan, pablei tabiak haong yaom jien mek tame meng 40.000 – 60.000 ndong/kg, patui yaok tukvak. Kuhria rah tapa yaok mbang pala baoh sang sa-ai mek laba labaih 40 trieu dong.

Piah paglaong bruk ngak hu, pala meng 3-4 mbang dalam sa thun, diuk pasang sa-ai Diện oh padeih bac magru, hu mbaok tame dom tal salih ilamo ky thuat kayua So Ilamo Khoa hoc saong Kong nghe tinh An Giang dang peih pato. Meng di nan, sa-ai ngak po hu ilamo ky thuat sangka, cakak talei phun, patabiak bangu, pasang iek halak haling brei ka tamun.

Oh lac sa janih brei ka bruk pala paliu sang sa-ai Diện daok peih bambang ka tuai damuai jirah mai rivang bein tamun oh mek jien, ngak jeng labik mai rivang sinh thai ngak nong dui pachreih ka rahra bhum palei saong tuai damuai.

Urak ini, baoh tamun kanyik di sa-ai pala hu trak meng 1,6 - 2kg, dalam tuk tamun hani meda hu 6 - 7kg sa baoh. Taong abih kaya ndap nda baoh karaoh hu urang blei abih, oh suhsah ka akaok tabiak. Urak ini meng halau jien mek tame tani tanat mai meng bruk pala tamun halam, raidiuk mbang ngui kaya kan dalam baoh sang sa-ai Dien ginup bak.

Ong Nguyễn Văn Thạnh, Akaok Kapul Urang ngak Nong di xa Mỹ Hòa Hưng, tinh An Giang taong yaom: Bruk pala tamun dalam baoh sang hanyol halam di sang sa-ai Diện ieu lac bruk ngak naih gheih di bhum palei dalam bruk jhul khang salih taneh pala padai oh siam lagaih tapa phun mbang baoh pandar ilamo ngak kong tui pakat glaong. Dut saong ngak padai, pala tamun halam siam lagaih glaong jang meng 4-5 mbang.

Dalam tuk langik salih salih karei, yaom kaom kaya ngak nong oh lagaih, bruk pala tamun pandar ilamo ngak kong tui pakat jamraik glaong di bhum palei Chu tich Tôn Đức Thắng akaok meti hu peih tabiak jalan nao bahrau, jalan ngak nong karo kajap ka urang ngak apuh ngak hamu. Meng kadha di sa-ai Huỳnh Ngọc Diện meda mboh tuk urang ngak nong thau pandar ilamo ky thuat, khin salih “asar ameh” oh lac ndih dalam asar padai blaoh daok meda mai meng dom baoh tamun yamein bangi./.