Amuk Thị Phích, puk Trà Pho, xa Giang Thành lac baoh sang Khmer hu baoh sang kan kandah, dua takai ye nao mai kan kandah, kayua yau nan ye, amuk oh ngak bruk trak hu yau nan ye yaok pluh thun ini raidiuk rilo meng lac mai meng bruk pak hareik bàng. Jien mek tame ba mai oh rilo, labaih kurang 100.000 dong/harei min bruk ngak tani tanat, jien mek tame jeng daong khik tani tanat karo di dalam raidiuk. Amuk Phích brei thau: “Meng halau pandap tamo hareik bàng hu dahlau di labik khik ramik ka bruk pandar nan dahlak oh lahik jien blei blaoh tok nao yuak ba mai bambu blaoh pak, ngak kaya pandar dalam sang blaoh pablei”.

Amuk Trần Thị Mộng Tuyền, po labik pablei salih Toàn Phát (xa Giang Thành) brei thau, labik ngak tabiak saong pataom blei dom janih ndap nda ngak meng tangin meng hareik bàng. Labik ngak tui harak kakei blei di kongti duh bruk pablei tabiak haong dom kaya: Kadung teik, kadung teik ngak gheih mekre, kaya pandar dalam sang, kaya ngak gheih dalam sang… yaok thun pabak labaih 15.000 baoh kaya ndap nda. Labik urak ini hu 2 kaya ndap nda mek hu tanut OCOP 4 patuk dalam nan hu kadung teik saong kadung buh hareik harom. Taong abih hu labaih 10 urang ngak bhian hu jien mek tame labaih 5 trieu dong/bilan, langiu di nan daok hu kakei blei di labaih 50 urang pak kaya ndap di di sang drei eng, labik nao tal sang pataom blei. Taong abih urang ngak bruk di labik jeng lac urang bangsa Khmer, dom adei sa-ai kamei biak gheih tangin saong tari taring nan jien mek tame biak tani tanat meng 100 – 200.000 dong/urang/harei.

 Baoh sang sa-ai kamei Thị Lol, umo 39 thun (xa Giang Thành) pala padai 2 mbang di mblang hamu praong 2,5 ha, hadei di kaoh tabiak jien buh tame ngak ye hu laba labaih 60 trieu dong/thun. Paok jien ini oh khik kajap ka bruk pandar dalam baoh sang yau nan ye sa-ai ngak bruk pak hareik bàng saong jhik kadung teik piah hu jien mek tame 50 trieu dong/thun. Meng di nan, raidiuk di gait tani tanat saong baoh sang sa-ai kamei jeng patak pataom hu paok jien padang baoh sang hu yaom jien labaih 300 trieu dong.

Amuk Trần Ngọc Bích, Phaok Akaok UB Bhap bini xa Giang Thành brei thau, bruk pak hareik bàng di xa Giang Thành hu daok kandaong yaok rituh thun, jeng bruk ilamo bhap bini saong ieu lac sa bruk daok dang mbang ngui karo kajap di mikva urang bangsa Khmer daok di bhum taneh ia tapen negar. Xa Giang Thành urak ini hu labaih 200 urang ngak bruk (rilo meng lac urang kamei Khmer) pagam haong bruk pak hareik bàng, jien mek tame tani tanat meng 3 trieu dong tal 4 trieu dong/bilan.

Thun 2016, tinh Kien Giang (klak) padang Labik khik ramik janih cim birim phun kayau sinh cảnh Phú Mỹ praong labaih 2.700ha, dalam nan bhum hu makna hu labaih 1.000ha, piah khik kajap bruk meda gah sinh hoc, khik tani tanat hu labaih 100 anek cim sếu akaok bhong meraih hu labik daok kandaok yaok thun, gam haong di nan pamaong tal bruk patagok palei ngak bruk bhap bini pak hareik bàng pagam haong bruk daok dang karo kajap.

Dahlau diah mikva rilo meng lac pak ciu đệm, garaong piah duh bruk daok dang, rah rah tal hadei hu pato pasram saong daong bruk ngak thaik thaot, rahra palei ngak bruk hu hadah krah neh tabiak rilo kaya ndap nda pabak hatai caong di urang pandar yau ye, talimo, kadung sit, kalik juak, kadung teik ngak gheih mekre, kaya ngak gheih dalam sang, kaya pandar dalam sang… Dom janih kaya ndap nda ngak tangin meng hareik bàng hu dom kongti kakei pataom blei pablei tabiak tapa Eropa, Japon, Cina, Korea saong duh bruk darak pasar dalam negar yau ye, Vung Tau, Can Tho, Phu Quoc, Ban raya Ho Chi Minh…./.