Dahlau diah di bhum taneran kraong Cuu Long, rilo janih kaya ndap tamo meng kal mai duh ka gah ngak gheih meng tangin yau ye njam hang ia, hareik daneing  nang tuong…rahra sa janih thau pandar min oh pala nyu. Bruk ini ngak ka halau pabak oh tani tanat, ngak kan kandah ka dom gah ngak mbang pablei tabiak tuk khin hu nda rilo saong dui suai atah.

Tui ong Trần Lam Sơn, Uy vien Thuong vu Kapul Ngak gheih mekre saong Ngak kayau Ban raya HCM, kein lagaih kinh te meng hareik nang tuong taong abih meda kuhria hu. Yaok thun, urang pala pabam pajaih hareik ini meda ngak hu 3 mbang pala, yaok mbang atah di gauk 4 bilan. Kuhria rah tapa yaok hecta hadei tuk mek pandar saong bambu meda hu ba tabiak 10 tan hareik thu. Urak ini yaom pandap tamo hareik nang tuong thu hu labaih 0,5 USD/kg, yau nan ye urang pala meda mek hu labaih 120 trieu ndong/ha/mbang pala.

 Langiu bruk pabak pandap tamo duh bruk pak kaya ngak meng tangin, harei nang tuong daok meda chai klik jeng tapung, ngak pandap tamo srau dalam bruk ngak pakuang katak. Kaya ndap nda ini hu pablei tabiak tame majam pablei lẻ Costco, brei mboh lac nyu brei hu ba tame pablei di darak pasar dunya.

Ong Lai Trí Mộc, Yam ndok Kongti Vietnam Housewares Corp – gah ngak mbang pablei salih daok pablei tabiak jak jeng dom kaya ngak meng tangin meng hareik nang tuong brei thau, gah ngak mbang pablei salih tuk halei jeng duah dom janih pandap tamo meng taneh riya kraong ribaong bahrau piah srap gap ka halau pabak brei ka bruk pablei salih. Dalam nan, hareik nang tuong ieu lac janih phun pala akaok meti di Bhum taneran kraong Cuu Long hu gah ngak mbang pablei salih roh duah saong pandar jak jeng tame bruk ngak mbang dom kaya ngak gheih meng tangin.

Tal ini, dom kaya ndap nda ngak meng hareik nang tuong hu pablei tabiak tal rilo darak pasar dalam dunya saong hu mbaok dalam majam di dom kapul pablei sa drei karei yau ye Walmart saong Target.

Oh lac bam ai yaom kaom pablei tabiak, hareik nang tuong daok hu caong khin jeng bruk duah jien ka rahra dalam palei. Tui ong Mộc, dalam dom bruk pala glai atau phun suai lavik thun, rahra bhian cang meng 5 – 7 thun meng hu halau meng kayau. Di tukvak ini biak khin dom jien tame katut panak harei piah tani tanat raidiuk ngak mbang daok dang.

Gah ngak gheih meng tangin meda hu langyah bruk nan tapa bruk tacei ba rahra pala dom janih phun hareik njauk lagaih atau bac megru bruk pak piah duah jien mek tame dalam tukvak cang yuak hareik.

Njauk ndom tal lac, bruk pala tablak hareik ala glai hu taong yaom hu rilo kein lagaih Rahra gam meda hu pandar hareik tui tukvak katut panak, gam khik tani tanat bruk patagok glai. Tui kuhria di gah ngak mbang pablei salih, taong abih jien mek tame meng bruk pandar harei dalam luac tukvak 5 thun meda samu haong yaom kaom kinh te meng kayau kaoh hu di puac tukvak.

Meyah hu bruk pambuak di rahra, karja palei saong gah ngak mbang pablei salih dalam bruk quy hoach bhum pandap tamo, peih bruk pataom blei, buh jien tame ilamo kong nghe ngak kaya saong patagok darak pasar, hareik nang tuong taong abih meda hu jeng sa gah kaya ndap nda bahrau di bhum taneran kraong Cuu Long./.