Di sa var me-in Nyaom kapul Pahasa Hoi kuan di xa Phú Hựu, tinh Dong Thap, kadha di mikva di ini oh payeng di bilan pala saong ilamo pala drak. Sa asal kadha daok taduan hu bruk sangka hu lac bruk ngak men vi sinh IMO; pandar dom kaya tamo huu ke hu dahlau piah ngak tabiak kaya duh ka bruk ngak tabiak ndap nda kaya angui.

Hareik harom klak parah di sang ging, njam hang theik ndong di kraong ia atau kaya klak caik di gah ngak nong ngak hamu ngak apuh,… hu brie pataom, pa-auk saong ngak jeng kaya tamo lagaih ka pala drak jeng ye raong glang. Bruk ngak ini gam daong patrun hareik harom daok tamo huu ke tathuak tabiak alam langik tasik, gam pasiam taneh saong patakik sa banah jien buh tabiak ngak.

Meng bruk ngak hu brei klah rabha bac magru saong gauk di dalam Kapul hoikuan, bruk ngak daok hu bhum palei pachreih peih praong. Rahra bhap bini oh sa janih pang tui tacei ba blaoh daok tapak drei ba tame ngak, ndom meyai ka ilamo piah pasiam bruk ngak lagaih haong bruk ngak tabiak di yaok baoh sang. Ong Huỳnh Hữu Thuận, Kapul Urang ngak nong xa Phú Hựu, tinh Dong Thap, brei thau:

“Tuk pambuak IMO tame ngak mbang ye nyu ngak siam ka taneh, ngak ka taneh tacoh, hu janih siam, phun rakrok biak samar. Langiu di nan, IMO daok pandar biak siam dalam bruk raong glang saong daok dang dalam baoh sang. Pamaong iek tal meng anak, Kapul Urang ngak nong brei peih praong urang ngak bruk, ngak habar piah pa-auk ndik nekhun men IMO hu rilo jang.”

Menyah di dom bein phun pala, hareik haraom pom pong huu ke hu pandar piah ngak tabiak kaya sinh hoc, ye di angaok dom mblang hamu, pong nerang lac halau gha kaya klak rilo hadei yaok mbang yuak padai blaoh. Salih brei ka bruk cuh klak, mikva pandar kaya Trichoderma piah pa-abih pong nerang, hadei di nan lam dal nyu tame haluk taneh. Dom baoh sang karei brei papaok pong piah pala bamao. Yau nan, sa halau kaya klak meda nao tapa rilo bruk ngak mbang, ngak tabiak ralo baoh kadha ndap nda kaya ngui hu yaom.

Ong Lê Tấn Phát, xa Long Bình, brei thau: Bamao pong urak ini ngak tabiak hu dom ieu lac pablei abih dom. Pa-auk pong pambuak haong meo blaoh patabiak kaya, oh hu jru cavao hagait, biak hacih sa-at. Ong Lê Tấn Phát brei thau.

“Cuh pong nerang ngak njom nerak brei ka alam langik tasik. Oh cuh ye kaya tamo piah ngak bamao hu tani tanat, drei meda ngak luac thun, pandiak hajan hagait jeng ngak hu. Kaya tamo lac pong nerang piah ngak bamao gam hu jien tame sang, gam ba mai siam lagaih kinh te ngak mbang siam ka baoh sang.”

Meng pong nerang, blaoh meng pong nerang hadei pala bamao jeng khak huu ke, sa gavang payeng dak rah rah ngak jeng dalam bruk ngak nong. Bruk njauk ndom mayai lac kinh te tuan hoan ngak mbang payeng oh njauk lac mai meng dom ilamo ngak kong srau kadau atau dom banah buh jien tame praong. Rilo tuk, bruk salih mai meng sa meta maong karei brei ka bruk ngak mbang siam makre.

Meng sa bruk nyaom biai di Hoi kuan, sa mbuk pong hadei di bilan yuak atau dom kanduh baoh kayau,… sahaneng lac yau ye klak caik nao, min dom yaom kaom bahrau daok hu ngak tabiak. Meda ndom mayai lac, tuk urang ngak nong, gah ngak mbang pablei salih saong sarak daong gauk ngak kaya klak jeng sa ndap nda drap ar, khol drei brei padang jak jeng sa gah ngak nong hijao, siam lagaih saong karo kajap ka harei hadei./.