Meng rilo thun mai, 3 baoh sang di xa Bom Bo (tinh Dong Nai) meng drak khak ngak yau meng kal mai jeng ye sa janih drak nyu tuk phun laman lamuac hu salih tapa bruk pala kophi tui jalan sangka taneh dahlau, drak khak njauk tukvak, caga halak haling srap gap cih vak pasang iek jien buh ngak taviak. Hadei sa musim bilan hajan, bruk karei hu brei mboh cambaih di bein phun kayau.

Bein phun kophi vối taneh praong 1,3 ha di ong Chu Văn Dũng urang daok di xa Bom Bo (huyen Bù Đăng, tinh Binh Phuoc klak) daok di taneh bhong randaih patau, bruk ngak kuhria rah tapa daok 2,9 tan asar/ha. Duah baoh sang jaik taphia jeng gaok bruk yau nan. Bruk dreih gauk di klau baoh bein lac jalan sangka patui kan dahlau. Khak drak hu pandar tui yaok tukvak, rilo meng lac piah pabak hatai caong anak meta di phun. Tuk phun hu mboh kurang prein khang di nyu atau laman lamuac ye brei tagok paralo khak. Halak haling bhian tok hu pametai tuk rah tabiak. Takik thei sangka tal tanut masam saong tanut janih siam di taneh, jeng oh cih vak piah thau yaok mbang hu buh jien tame dom saong mek tame dom.

Masa meng thun 2025 - 2026, klau baoh bein phun kayau nan hu palih ruah hu mbaok tame danak dak “Pala kophi hadah krah lagaih haong langik salih karei” kayua Kongti Co phan Khak drak Bình Điền pambuak haong Pasak Pachreih Ngak nong pakat Negar saong Jabat ilamu Khoa hoc Ky thuat Nong lam nghiep Tay Nguyen peih ngak angaok 48 bein di 6 tinh, di Dong Nai hu Kapul Urang ngak nong saong Pasak Pachreih ngak nong tinh gam tui iek. Yaok bein hu rabha jeng dua, sa binah pandar jalan ngak di danak dak, binah daok veik urang ngak nong ta-eng sangka yau dahlau piah pagap piah dut ieik.

Hu mbaok tame bruk ngak, jalan ngak di dom baoh sang salih di pak labik. Ka sa, sangka taneh dahlau tuk sangka phun. Akaok bilan hajan bein hu drak khak sumu taneh saong khak huu ke tamo piah patrun masam, pasiam pakhang gok agha, hadei di nan blaoh ka brei drak khak NPK. Ka dua, drak khak tui tukvak cakrok. Ka klau, caga halak haling srap gap salih ka taong ruak. Ka pak, cih vak harak ngak hamu. Yaok janih kaya kan, bruk pandar saong tukvak pandar hu cih vak gilac piah puac mbang pala kuhria hu yaom kaom yaok kg kophi asar.

Nao pagam haong dom danak jalan ngak lac bruk daong tapak di urang jakar gah jamariak ky thuat, rajakar pachreih ngak nong trun bein tacei ba yaok mbang drak khak, yaok mbang pruh jru saong langyah tak di labik ngak ka po bein mboh karei oh bhian. Ong Chu Văn Cử brei thau “Dahlau diah drei ngak tui bruk bhian randap, urak ini yaok bruk jeng thau kayua habar brei ngak saong ngak di tuk halei”.

Bruk karei di dua binah ngak bein brei mboh cabaih di dalam tukvak masa raong baoh karaoh. Di binah pandar jalan ngak, phun khik tani tanat halaa hijao juk, kapal saong khang, baoh praong, sumu gauk, gan pagam khang. Di binah sangka tui jalan klak, hala kanyik, baoh druh saong gan salih tapa kanyik.

Meng pala njauk tukvak, njauk takik atau rilo di nyu, dom baoh sang srap gap hu dom kaya njauk blei dalam mbang pala, caga plaih drak rilo drak labaih. Dom mbang pruh jru patrun kayua caga aval, urang ngak bruk jeng hu patrrun. Bruk cih vak daong urang ngak nong mbang akaok meti maong mboh ginup jien buh tabiak ngak, mbuan piah dut pagap dut siam lagaih haong bruk ngak meng klak. Bruk ngak hu di dua binah bein brei hu dut pagap tuk paik baoh di puac thun. Min ngan haong bruk bein di urak ini, klau baoh sang di Bom Bo caong takre ngak hu rilo jang dom mbang pala dahlau ngan haong jien padai hu pasang iek siam jang. Nan jeng lac jalan ngak blaoh danak dak caong khin tal, daong urang pala kophi salih adat pala drak, pandar njauk jalan langyah ka yaok tukvak saong srap gap palagaih haong langik tasik dak harei dak oh lagaih./.