Lac sa labik di dalam dom baoh sang hu ngak meng lavik bruk pala patei siem di xa bhum taneh U Minh Thượng, ong Nguyễn Văn Thắng brei thau, gam tui yaom 7.000 dong/satathi patei janih, bangu patei 7.000 dong/kg ini ieu lac yaom glaong di abih meng nan tal ini blaoh urang pala patei pablei hu.

 Sang ong Thắng pala 2,5 ha phun patei siem saong ini jeng lac jien mek tame ka baoh sang di drei. Meng akaok thun 2025 tal ini, ong Thắng jaoh hu jaik 9.000 tathi patei, labaih 2 tan bangu patei, jien mek tame hu labaih 70 trieu dong. Ong Thắng ndom mayai lac: “Dut saong rilo thun dahlau, bruk pala patei di urang ngak nong meng kreh thun 2024 tal ini gaok rilo lagaih, bruk pandiak bhang, pandiak catang di bilan thu 2024-2025 bahrau blaoh oh catang yau dom thun dahlau, khik kajap halau ia piah phun patei tagok. Meng di nan, patei brei mong hu rilo tathi, baoh praong, gam saong nan pablei hu yaom nan urang ngak nong mek tame tagok dua mbang dut saong dahlau daih”.

Ong Danh Chênh, daok di Palei Sơn Kiên, xa U Minh Thượng jeng chreh chrai brei thau, meng akaok thun tal ini, gam saong 4 ha patei di baoh sang ba mai jien mek tame labaih 150 trieu dong. Ong Chênh brei thau, urang pala patei siem takik lahik jien ka khak drak, sangka oh lahik prein, urang pala pablei gam patei tathi, bangu patei saong phun patei hadei tuk kaoh mong brei kein lagaih ba mai jaik yau hu taong abih meng bruk pablei hu di bein phun.

Di bhum Ben pakat Negar U Minh Thượng di xa U Minh Thượng, dom thun jaik di ini, rilo baoh sang pambuak bruk pala patei siem saong dom janih phun mbang baoh karei yau ye: kruac bung, kruac, pa-aok saong raong dom janih ikan di ala ribaong brei jien mek tame labaih 100 trieu dong/ha/thun. Mbuan mboh di abih hu baoh sang di ong Lý Văn Tình, daok di palei Kinh Năm, meng thun 2019, meng dom taneh saoh dalam bein patei ong pala veik labaih 250 phun pa-aok, labaih 200 phun kruac bung kalik hijao ralo bhong, gam saong di nan palao dom janih ikan ia taba raong dalam danao vil taom dar bein phun patei. Taong abih jien mek tame di ben phun, danao ikan ba mai ka baoh sang meng akaok thun 2025 tal ini labaih 300 trieu dong. Ong Tình chreh chrai ndom meyai lac, 3 thun ini meng hu Hop tac xa jitvu ngak nong An Minh Bắc daong, urang ngak nong hu peih bruk ngak tabiak tui tanut VietGAP pagam saong pambuak pablei abih saong gah ngak mbang pablei salih pataom blei, daong tani tanat bruk pablei tabiak saong yaom kaom hu kein lagaih ka urang ngak nong nan mikva jeng sahnang hatai ngak mbang.

Urang dang akaok xa U Minh Thượng, tinh Kien Giang brei thau, bhum Bein pakat Negar U Minh Thượng hu jaik 20.000 ha taneh, lac labik pabak yaok trieu tathi patei siem, yaok ribau tan njam patam baoh karaoh rilo janih piah duh ka darak pasar dalam negar saong langiu negar. Dalam bhum huyen urak ini hu labaih 2.800 ha pala patei siem. Meng thun 2010 tal ini, meng hu Trung uong tinh, huyen sangka buh jien tame bhum, rilo meng ieu lac bruk rao lakhun, plaih bruk dalam ia di bilan hajan, rahra hu pala rilo phun kayau, athur raong tui hatai caong di darak pasar.

Piah dom bruk ngak mbang ba mai siam lagaih karo, UB Bhap bini xa U Minh Thượng saong xa Vĩnh Hoà hu pato tacei gah ngak nong huyen saong dom gah hu pambuak saong gah hu chuyen mon dalam tinh patagok bruk salih tapa ilamo ky thuat; brei thau saong daong ka rahra jalan sangka, pacang caga halak haling, pala drak tui jalan huu co, salamat sinh hoc, mek hu tanut VietGAP pagam saong danak dak patagok ndap nda OCOP (Danak dak Yaok xa hu Sa ndap nda)… Gam saong nan, huyen daok pambuak saong dom so, dom gah di tinh duah dom gah ngak mbang pablei salih mai pataom blei, pambuak pablei abih ka ndap nda kaya nong di rahra./.