Rilo thun tapa, raidiuk di rahra xa Ea Riêng, tinh Dak Lak rilo meng lac pagam haong phun kophi, amraik kalu saong dom janih phun pala katut panak harei. Min, dom thun jaik ini, bruk pambuak di langik salih karei haong dom mbang pandiak bhang dui suai atah, hajan karei bilan gam gam rah tabiak ngak ka bruk pala drak dak harei dak gaok rilo kan kandah. Dalam bruk nan, oh takik rahra bhum palei hu srap gap duah jalan nao bahrau piah lagaih saong paglaong siam lagaih kinh te.

Sa di dalam dom urang ba drei tame ngak dahlau hu ong Lê Tất Cương, di palei 19. Mboh bruk pala drak ngak tui tame langik tasik, ong Cương mbaoh tangin buh tame jaik 1 ty dong padang majam sang hanyol kandauk di taneh labaih 3.600 m2 piah pala tamun ia tui jalan ilamo ngak kong pakat glaong. Dalam labik sang hanyol, dom jalan ngak tabiak kaya kan jeng hu ngak tui adat hadah bahrau. Majam tui tanjaoh ia ta-eng pabak ia saong janih siam tal yaok takai phun. Urak ini yaok thun baoh sang ong ngak tabiak 3 mbang pala tamun ia, bruk ngak hu kuhria rah tapa labaih 15 tan baoh yaok mbang.  Ngan haong yaom pablei meng 15.000 – 25.000 dong/kg, hadei di tuk kaoh abih jien buh tabiak, ong mek tame jaik 200 trieu jien dong yaok labik tamun. Langiu bruk ba mai jien mek tame tani tanat ka baoh sang, bruk ini daok brei bruk ngak bhian ka 3 – 4 urang ngak bruk bhum palei hu jien mek tame meng 15 – 16 trieu dong/urang/mbang pala.

Meyah bruk tamun ia ilamo ngak kong pakat glaong brei ka hu jien buh tame praong saong ilamo, ye bruk raong anek dúi gilac hu maong yau lac jalan nao njauk lagaih haong rilo baoh sang rahra akaok meti peih mbang ngui di bhum glaong Dak Lak.

Thun 2024, ong Hồ Sỹ Thùy, daok di palei 14, hu ngak iek raong 10 yau anek dúi pajaih. Mboh dúi patagok siam, njauk lagaih haong langik, ong marat hatai peih praong var ro, taduan hu rilo yau dúi bahrau.

Hadei jaik 2 thun pambuak pagam haong bruk ngak bahrau, tal ini labik di ong Thùy hu patagok jeng labaih 300 drei anek dúi. Yaok rai mbang anek dúi ine meda menek meng 3 – 4 drei. Hadei labaih sa bilan meteh, dúi hu neh rabha tapol piah raong karei. Tuk hu trak labaih 500 gram, dúi ine hu pablei haong yaom meng 1,2 – 1,5 trieu dong/yau.

Jien mek tame meng bruk ini, lac pablei anek dúi ralo, hu yaom meng 400.000 - 600.000 dong/kg. Yaok sa drei anek dúi praong trak meng 1,2 – 2,6 kg. Darak pasar pablei di ong rilo meng lac di Dak Lak saong tinh jaik taphia, yaok thun mai meng labaih 150 - 200 trieu dong. Ong Sỹ brei thau: “bruk lagaih praong abih di bruk lac jien buh ka kaya mbang biar, meda hu pandar halau kaya mbang hu dahlau ya ye tabau, kreim, la-a pambuak haong tangei asar, min kein laba ba mai biak siam”.