Dahlau diah ong ngak gru pato bac, urang pato ralo rai rah anek saih di bhum U Minh Hạ, hadei padeih bruk jakar, ong Út Mỹ jeng tuk halei jeng kham marat ba abih hatai jai daong urang palei brei ka bruk ngak tui harak gal karja jeng ye harak gal brei ka bhap bini dân sự. Janji ong hu nao tal AI tal ini labaih kurang mateh thun tui tapa khan yaih di anek saih kalak.

Meng bruk ngak ieik ChatGPT piah ndom mayai brei ka akayat ariya, ong taha U90 yau ye duah hu jalan nao barau, blaoh roh duah, peih praong bruk bac piah nao tal ba AI jeng urang daong tui hatai. Ong daok pandar AI tame bruk ngak ralaoh akhar, padang ngak thaot binguk klak, kuria tani tanat cih birih gai huei ndap nda jeng ye caga jien ndo ngak mblang bê tông njauk tui yaom darak pasar palei. Ong Út Mỹ jeng taong yaom glaong brei ka AI dalam bruk daong iek glang prein yawa:

"Bhian biasa di nyu bac si cih harak blei jru mai sang blaoh manyum. Hu AI daong, drei sua tangi tal halei nyu jawap lang daong jalan tal nan. Dahlak hulin dar tuk muk diuk huen akaok rối loạn tiền đình, dahlak dahlak tame sua tangi nyu brei thau biak capat drah chip: Dalam tuk ba nao capat cấp cứu ye njauk ngak dom janih sơ cứu dalau abih yau habar? Dom janih pato drah samar chip yau nan brei ka prei yawa manuac urang ieu lac bruk kadha di dom urang taha yau hulin biak caong khin".

Meng bruk cambac lac yau nan di drei, ong Út Mỹ mboh, siam dalam dom ndap nda kadha AI mai meng glo akaok urang pandar nyu. Piah mek baoh kadha lang yah njauk siam tantu, urang pandar nyu njauk brei thau dom baoh kadha drei khin nyu ka cambaic laic. Njauk siam abih di nyu, ong tuk halei jeng dah krah glo akaok, dut njauk kaotin saong bruk ngak anak mata oh njauk sa janih abih tui jamariak. Tapa thun bilan atah dhua tui pandar mac taong huruh, in tapung, blaoh pandar jamariak barau yau ini, ong Út Mỹ biak bui sambai kayua lac jamariak ngak kong daong rai diuk manuac urang jaman ini siam jang, bhum baok taneh ia palei nagar dak harei tagok siam makre. Tapi, ong jeng daok kakei dam dara kham marat ngak brei ka kadha ngak kông ba tame bruk daong taneh ia palei nagar dak harei dak ralo jang:

 "Dam dara jaman ini hu ralo kein lagaih, hu tukwak jeng ye glao akaok dah krah. Yau nan ye dom anek kamuac kham marat bac magru piah ngak po jamariak komputer, jamariak jaman barau ka tanitanat. Dalau abih bac ka rup drei thau, hadei di nan piah daong ka dom urang vil rup drei jeng ye daong siam dalam bruk drei ngak hadei di ni”.

Taong yaom brei ka cei Lê Phú Mỹ, ong Huỳnh Khánh Duy, Phaok Akaok UB Bhap bini xa U Minh, brei thau lac sa blah kreih camin hadah brei ka bruk pandar jamariak ngak kong bahrau dalam rai diuk. Bruk pandar naih gheih di po cei brei ka AI, mboh lac bruk bac magru luac rai jeng ye bruk pandar jamariak ngak kong bahrau oh cang pilih taha mada umur thun:

"Cei Lê Phú Mỹ ieu lac sa urang yau ye blah kreih camin hadah brei pasang ka urang dalam xa. Di jaman jamariak barau ini, mada thun taha, cei jeng daok kham marat bac magru, meng bruk truh gah brei ka jamariak komputer nao tal thau pandar (AI) piah daong ka bruk ngak jeng ye daong ka dalam rai diuk harei harei."

Kadha di cei Út Mỹ daok di taneh glai U Minh Hạ mboh cambaic laic jamariak ngak kong daong hu ralo bruk kadha dalam harei harei brei ka bhap bini rah ra. Thei thei jeng ngak hu, pandar hu, tui bruk ngak jak jeng di ong taha U90 mboh lac ye jamariak tuk halei jeng ieu lac daok di jamariak daok glao kaok manuac urang drei meng tacei ba bruk, glao akaok manuac meng drei meng ieu lac asal halau ba nao tal bruk njauk bruk siam yau hatai jai manuac urang caong khin./.