Kapul pablei salih online Viet Nam gam saong So Kong thuong tinh Vinh Long pambuak saong TikTok Shop, xa Chợ Lách peih ngak “xa pablei salih online” ngak iek di Chợ Lách, piah ngak taka so ka bruk pablei salih saong dak harei dak ba bruk jirah rivang bhum palei tagok nen tang online. Danak dak pamaong tal padang xa ini jeng bruk ngak rilo ka pablei salih online palei.

Chợ Lách (Ben Tre klak, ini lac Vinh Long) urak ini hu 2.419 baoh sang pablei salih, 116 gah ngak mbang pablei salih saong labaih 3.000 baoh sang pala phun pajaih, bangu ngak makre. Yaok thun, bhum palei pabak labaih 7 trieu phun pajaih, labaih 5 trieu kaya bangu ngak mekre gam saong rilo janih baoh kayau hu angan yau ye durian, baoh kruac bung kanduh hijao, com com. Majam sang bein saong bilan pala rilo jeng lac bruk piah patagok dom bruk ba drei tame brei ka tuai damuai jirah.

Sa dalam dom kein lagaih di Chợ Lách lac dom po bein, urang nghe nhan saong urang ngak tabiak saong thau rilo ilamo ka pajaih phun, ilamo ky thuat pala drak saong bilan pala drak. Dom kadha ini meda hu salih jeng video katut, livestream atau asal kadha di angaok mang xa hoi, gam daong pablei kaya gam yaih khan thaik thaotlabik jirah rivang. Urak ini dom sang bein di Chợ Lách hu pandar mang xa hoi saong dom nen tang online piah pambuak tal tuai damuai. Daok di angaok TikTok Shop, bhum palei hu 45 sang pablei kaya daok ngak bruk.

Dalam bilan Raya Tet Nguyen Dan 2026, hu labaih 200.000 ndap nda kaya kakei blei bangu ngak mekre saong phun pajaih hu pablei di nen tang ini, tagok dua mbang jalan ba tabiak di akaok meti. Gam saong tukvak nan, bangu saong phun ngak mekre hu pablei tagok 5 mbang. Min, prein pablei salih online di dom baoh sang ngak tabiak kaya oh ka samu gauk, meng padang asal kadha, cuak video, livestream tal pandar tadai kuan saong langyah kaya brei kakei blei.

Meng camreip, danak dak ba tabiak jalan pato pakai ka labaih 80 gah ngak mbang pablei salih, baoh sang pablei salih saong urang paneh asal kadha. Ong Nguyễn Minh Đức, Phaok Tong thu ky Kapul pablei salih online Viet Nam brei thau, danak dak oh lac tacei ba rahra livestream blaoh daok pamaong tal padang angan je, gah ngak saong yaom kaom karei crih khin padang, hadei nan pasamu kadha di tadai kuan, video katut, livestream saong yaih khan. Bruk ngak asal kadha jeng khin hu maong yau sa bruk ngak suai atah salih ka bruk tok ngak dom mbang livestream piah pablei kaya.

Hadei di tukvak pato pakai, bhum palei kuhria peih ngak bruk pablei kaya praong dalam tabung glaong tuk harei Raya Tet akaok thun Saka ia harei saong Tet Nguyen Dan 2027, pataom tame bangu ngak mekre, phun pajaih, cuc mam xoi gam saong dom janih baoh kayau yau ye com com, kruac bung saong li-u.

Langiu di nan, jalan ngak lac ba voucher ba drei tame nao jirah rivang tagok darak pasar online hu caong maong lac peih tabiak veik sa jalan nao bahrau. Salih ka bruk tok kakei blei phun pajaih atau baoh kayau meng atah, urang pandar meda hu pandar tapak dom kaya rivang me-in di sang bein, tapa nan pambuak bruk pablei salih online saong jirah rivang gah ngak nong saong ilamo bein taneh di Cợ Lách./.