Hadei di tukvak ba pataom, TP.HCM hu brei mboh thaik binguk sa baoh ban raya biak prong, hu labik dang lac bhum cak rok patagok prong ngan haong rik daong ka kadung jien karja tagok tal 33%. Ngan haong sa ban raya jaik 15 trieu bhap bani ndung ba thaik thaok dunya, kadha hu ba tabiak oh lac daok di bruk cak rok patagok ta-eng drei.

Kan si tuh ka urang jakar oh ngak hu oh khin ngak, kayua lac tui TSKH-KTS Ngô Viết Nam Sơn, dom urang nan daok ngak njauk tui adat hukum. Saong dom urang nan tok langyah hu bruk ngak tui jalan ba di adat hukum. TP.HCM sami samar hadah krah, daok ba pandar dom jalan ngak cak rok patagok oh ka mboh. Dalam vaktu cak rok patagok nan, ban raya taduan mek hu bruk pachreih di Trung uong tapa dom sarak biak karei. Yau nan min, yam nao prong di abih nan lac ngak ka siam mejam adat hukum. Ong Ngô Viết Nam Sơn langyah brei thau:

"Kadha oh siam akaok mereip nan lac dom danak prong di ban raya meda njauk pambak biak prong, meng vaktu ginum biai, mboh tangin tame harak ka tal vaktu peih ngak harak pambuak bruk. Nan meda lac hu dom caong khin bblaoh  ban raya oh pabak hu yaom lac hu mboh tangin tame harak pambuak bruk blaoh. Kadha ini daok ngak kan kandah ka taong abih gah, ngak dui atah danak jeng yau ba tal dom bruk bo gah pambuak bruk dalam negar atau langiu negar meda ba yak saong pandar bayar jien gilac. Pagap yau danak dak Metro số 1. Canah metro ini dui atah jaik 20 thun, dalam tuk nan di rilo taneh aia urang tok lahik dom thun piah ngak blaoh salah."

Oh sa janih lac ta-eng urang jakar, bruk cuang kandah tavak tave ini daok brei patrun asal rai diuk di bhap bani ban raya:

" Lac bhap bani Bình Quới ye biak duh hatai, biak glaih glar dom pluh thun ini paje caong khin ngak hagait jeng oh hu. Njauk di nyu lac bhap bani caong khin hu peih ngak ka nyu siam gheih, hadah hadai. Bhap bani caong khin labik daok bahrau siam gheih jang, juai caik ka bhap bani daok dalam ganik ganua."

"Danak dak tual meng dom pluh thun blaoh paje, mbang ini bhap bani caong khin meyah hu di pabak brei bayar ka nyu laghaih, nao daok di labik siam jang oh njauk lac daok yau ini. Juai daok tual meng thun ini tapa thun diah tra, bhap bani biak glaih glar."

Sap suak yava glaih glar di kreh jalan kayua radaih katiar , atau meta mong caong khin di dom urang diuk labaih meteh rai manuac dalam dom baoh sang taik tahak, pataom luac njauk gar sa hala paga dreh gauk nan lac: Talei kak tanuak gar sarak karja.

PGS.TS Trần Hoàng Ngân, urang lambaok Quoc hoi khoa XVI brei thau meng Sarak 31 tabiak rai thun 2022 hu peih jalan ka Sarak 98 cak rok nao tagok, Sarak 188 ka bruk patagok jalan pasei ban raya, gam haong sap janih sarak karei piah peih talaih dom cuang kandah tavak tave dui atah:

"Khaol drei mboh cambaih laih jalan ngak salah blaoh jalan ngak piah ka khaol drei hu Hukum cak rok patagok ban raya nan lac sa vaktu dui atah saong pataom ceik dalam rilo thun. Meng nan ba tabiak adat hukum hu dom kadha bo TP.HCM hu pathau khan, hu brei mboh blaoh. Sarak jeng njauk peih ngak ka nyu laghaih haong bruk cak rok patagok di taneh aia, njauk haong hatai caong khin di TP.HCM."

Tui TP.HCM, nao meng Sarak karja 54, 98 blaoh Sarak 260, jalan nao duah sarak adat hukum di Ban raya nan lac Hukum cak rok patagok ban raya jeng biak. Hukum ini naong bak bruk praong di jaman bahrau, nan lac: Taklah jalan saneng sarak hukum katut panak, ba caik takai piah ka ban raya mbeik drei yam tagok.