Jabat Kuk canh sat jalan mbak (Mentri Kong an) bahrau patabiak panuac kakei caga samar chip ka bruk ngak ja pathau khan taong bhat hadei tapa harak SMS piah chot pagat, blah mek jien padai. Kapul chuc nang pachreih kakei rahra oh tut tame dom jalan link oh krein, oh pabak khau tin ta-eng drei, tai khoan gilang pariak atau ma OTP barei ka baih gauk ka.

Tui Kuk Canh sat Jalan mbak, tukvak jaik ini rah tabiak bruk dom urang bleik payua harak SMS gam gam haong asal kadha pathau khan radaih nduac suan di jalan mbak, pandar po radaih tame sa jalan link piah pasang duah atau bayar jien taong bhat.

Njauk caik hatai lac, dom jalan link ini pandar angan mien piah ngak mangak hu dom baoh kadha yau ye "csgt", "bocongan"… ngak ka rilo urang nda lac website di jabat karja.

Canh sat Jalan mbak brei thau jalan ngak di dom kol bleik lac plue urang tut tame jalan link saong ngak tui tacei ba. Tuk nan, urang meda njauk klaik lahik khau tin tame tai khoan gilang pariak, mat khau angan kandauk, ma OTP atau njauk ngak ma ta-eng di nyu tame smart phone piah pasang iek phone, meng nan blah mek jien padai.

Piah plaih caga jeng urang gaok bruk jhak ini, Kuk Canh sat Jalan mbak pachreih kakei rahra oh tame yaok jalan link halei hu payua meng lek taka phone oh krein atau oh thau mai meng halei.

Rahra jeng oh pabak khau tin ta-eng di drei, tai khoan gilang pariak, mat khau angan kandauk atau ma OTP di bruk halei ka urang ta-eng lac drei ngak bruk di jabat chuc nang.

Tui jabat Kuk Canh sat Jalan mbak, tuk hu hatai caong khin pasang iek radaih drei hu nduac suan di jalan halei oh, urang brei pandar ung dung VNeTraffic piah duah khau tin njauk, salih ka bruk tame dom jalan link hu payua harak phone.

Langiu di nan, urang brei srap gap cakak taka phone payua harak oh krein, gam haong nan khan harak nan di angaok phone piah patakik bruk mbuan njauk chot pagat.

Kuk Canh sat Jalan mbak brei patui pambuak haong dom don palai brei ka gah chuc nang piah pasang iek, taong bhat catang dom urang pambak tame bruk ngak ja pathau khan taong bhat hadei piah chot pagat, blah mek jien padai.

Canh sat Jalan mbak pandar rahra paglaong bruk caga, oh tame dom jaaln link oh krein atau dom nen tang online oh ka ngak tantu thau thei payua harak mai. Tok sa bruk tut tame jalan link ja jeng meda ngak ka urang pandar lahik bruk ngak po tai khoan angan jie di gilang pariak saong jien padai di drei./.