Kan kandah praong abih ngan haong dom xa akaok meti tagok Palei pala bahrau dalam thun 2026 lac Paok asal kadha pakat negar ka palei pala bahrau 2026-2030 rabha jeng 3 kapul: kapul 1, kapul 2, kapul 3 ngan haong rilo tanut ba tabiak bahrau, rilo tanut kan si ngak.

Dom tanut, asal kadha dalam Paok asak kadha palei pala bahrau tukvak 2026-2030 brei ka hu ha tang taka so, nang luong pasiam, brei caik caong khin glaong jang ngan haong dom tanut chuan ka alam langik, jien mek tame… Naih gheih, asal kadha saong majam jalan mbak palei pala dalam xa caong khin brei khik kajap pambuak saong hu pasiam yaok thun; jalan dalam xa njauk tanut chuan tui quy hoach hu 100%, ty le km jalan xa hu pala phun hijao pala rah tui jalan hu meng 50% ba tagok; jalan palei hu ngak betong. Tanut chuan kathaot rilo gah di ban raya Dong Nai glaong jang tanut chuan kathaot pakat negar…

Dom bhum palei tagok Palei pala bahrau urak ini daok kham merat salah blaoh dom asal kadha, tanut tui adat di paok asal kadha palei pala bahrau tukvak bahrau hu salih ka bruk di nyu tuk dom bhum palei pataom tame salih taka so, patagok kinh te hijao, padang bhum palei njauk diuk rai ngan haong jalan ngak praong abih lac oh padeih paglaong raidiuk daok dang saong mbang ngui di rahra dalam palei pala.

Tuk hu thau ka bruk pala tui jalan bhap bini pandar khak rilo, jru hoa hoc ngak kanjah jhak ka alam langik saong prein yava anek menuac, rilo thun ini, ong Nguyễn Chinh Chiến, urang ngak nong di xa Xuân Bắc hu khang hatai salih tapa pala huu ke. Hadei luac jalan ngak iek haong rilo kan kandah, tal ini, bein phun mbang baoh pala patei pabam mô, panat, baoh uas di baoh sang ong Chiến jeng brei hu rilo, asar siam.

Ong Nguyễn Chinh Chiến brei thau: Tal ini, dom bein phun mbang baoh pala tui jalan huu ke jeng mek hu nang suat glaong, asar siam bangi hu brei mboh bruk salih jalan pala salamat ini lac njauk. Lagaih piah urang ngak nong khang hatai salih lac kayua bhum palei biak sangka, hu rilo danak dak daong, pachreih patagok gah ngak nong huu ke pagam haong padang chuoi pambuak meng ngak tabiam tal pablei. Njauk dnom tal lac, bhum palei hu dui pachreih gah ngak mbang mai padang kaya akaok tame, hu urang jakar ilamo ky thuat tui iek tacei ba bruk pala, sangka. Urang ngak nong jeng hu daong rilo danak dak jhul tagok pablei salih, yaih khan kaya nong piah patagok kein lagaih tut angan harak pambuak bruk pablei kaya nong.

Ong Vũ Mạnh Dương, Phaok Akaok UB Bhap bini xa Phú Vinh brei thau: Bruk kuhria hu naih gheih di xa Phú Vinh dalam padang Palei pala bahrau lac pataom tame patagok kinh te, rilo meng lac patagok ngak tabiak kaya nong pagam haong padang majam pambuak, pablei taong abih dom kaya hu pala rilo di bhum palei. Xa pambak tame labik taneh hu dom labik yau ye: ia jrai Ba Giọt, labang ciim dhun, thuy ndien Phú Tân 2; gam haong nan pandar jirah rivang sinh thai, jirah rivang bhap bini. Kayua nan, bhum palei jeng biak sangka iek praong ngak thaik thaot, labik hijao – hacih – gheih ghang, salamat. Meng ngak siam bruk pathau khan, jak ba, rilo meng lac paglaong bruk di kapul urang hu angan je dalam bhum mikva urang bangsa takik di dom puk, brei bruk samu njauk hatai, chreih chrai hu mbaok tame di rahra./.