Ti Knơ̆ng bruă tă kčoh Lực Thiêm, hlăm wăl tuh tia mkra mjing Tân An, ƀuôn prŏng Ƀuôn Ama Thuôt, ai êwa mă bruă ti lu anôk mkŏ mjing mtluk mtlak.  H’Ly na Ayŭn brei thâo, mơ̆ng akŏ thŭn truh ară anei, Knơ̆ng bruă mâo lu hră akâo blei, hnơ̆ng prăk mlan pah mni ăt đĭ mơh, anăn ai êwa mă bruă hơ̆k mơak snăk:

 “Knơ̆ng bruă leh anăn Êpul mă bruă nah gŭ hrăm mbĭt kriê dlăng jăk kơ mnuih mă bruă msĕ si pah mni prăk mlan sa mlan leh anăn mđup brei mnơ̆ng kơ phung mâo boh tŭ êdah êdi. Čang hmăng knơ̆ng bruă srăng đĭ kyar jăk hĭn čiăng mâo prăk mlan leh anăn đru jăk hĭn.”

Ti wăl tuh tia mkra mjing Hòa Phú, ƀuôn prŏng Ƀuôn Ama Thuôt, êbeh 2.400 čô mnuih mă bruă dôk bi lông mă bruă mkra mjing. Hlăm wưng êgao, hdră bi lông ktưn mđĭ lar klei mĭn mbruă, mkra mđĭ hdră mnêč kyua dŭm gưl phung mă bruă pŏk ngă iêô jak lu phung mă bruă hlăm dŭm anôk bruă duh mkra hgŭm. Lu klei mĭn mbruă tŭ dưn mđĭ wăl mă bruă, mkiêt mkriêm mnơ̆ng mkra mjing leh anăn ngă djŏ klei čiăng mlih mrâo bruă mkra mjing. Êdah êdi jing 2 klei mĭn mbruă kơ hdră mnêč mđĭ ênoh oxy kơ kpur mkra msei leh anăn pom êa bi êđăp jar tuh msei kơ Lê Trung Hiếu, klam bruă hdră mnêč pui kmlă - anôk mă bruă hlăm Knơ̆ng bruă tuh msei ASEAN, đru mkiêt mkriêm mnuih mă bruă, mkiêt mkriêm pui kmlă leh anăn mkhư̆ klei amâo myun. Ayŏng Lê Trung Hiếu brei thâo:

“Tơdah nao mă bruă hlăm wăl anei čiăng tui hriăm snăn klei thâo bruă pô đĭ kyar. Mơ̆ng klei thâo anăn pô mjing klei mĭn mbruă snăn. Tơdah mâo leh boh tŭ msĕ snăn pô mơak snăk, ƀuh pô dưi đru phung mă bruă hlăm klei găl ênưih, rơ̆ng êđăp ênang”

Lê Thị Tuyết Hạ, Khua Knơ̆ng bruă msei ASEAN brei thâo, Knơ̆ng bruă mđing nanao klei găl kơ phung mă bruă êđăp ênang leh anăn bi lông mđĭ boh tŭ mkra mjing:

 “Klei mdê mơ̆ng Sang mkra mjing jing tuh tia mkra mjing ktrŏ snăn brei mâo klei đĭ kyar. Sang mkra mjing mđing mâo hnơ̆ng kčah čiăng kơ mnuih mă bruă gĭr ktưn, mđing mâo klei blŭ drei jing sa gŏ sang anăn boh tŭ dưi kah mbha mơ̆ng anăn ăt mjing boh kdrŭt kơ phung mă bruă gĭr hĭn tơdah mâo klei tŭ dưn”.

 Trương Hồ Anh Hoàng, K’iăng Khua kriê dlăng dŭm wăl tuh tia mkra mjing čar Dak Lak brei thâo, hdră bi lông ktưn “Mnuih mă bruă mbruă, mă bruă mbruă” mguôp hŏng klei tui hriăm knhuah mgač Hồ Chí Minh kơrŭ wĭt klei găl, klei thâo phung mă bruă hlăm dŭm anôk bruă, anôk bruă duh mkra.

“Hlăm wưng kơ anăp, Anôk bruă kriê dlăng dŭm wăl tuh tia mkra mjing čar srăng gĭr bi hgŭm hŏng dŭm knơ̆ng, dhar bruă hâo hưn mtrŭt mjhar phung mă bruă, phung mưn mnuih mă bruă gĭr mă bruă, boh nik pŏk ngă lu hdră bi lông ktưn mkra mjing.”

Tơdah klei găl mă bruă dưi mkra mđĭ, prăk hrui wĭt đĭ, klei găl, hdră êlan dưi rơ̆ng srăng đru phung mă bruă, mnuih mă bruă ti Dak Lak hơĭt ai tiê hŏng bruă knuă.

 Pŏk ngă hdră bi lông ktưn khăp kơ ala čar, phung mă bruă dŭm gưl čar Dak Lak kƀĭn klă klơ̆ng akŏ bi lông thŭn 2024 mguôp hŏng hdră bi lông “mnuih mă bruă mbruă, mă bruă thâo”, “Kčĕ mbruă, ngă bruă jăk”, mtrŭt mjhar phung mă bruă gĭr ktưn mđĭ lar boh tŭ Hdră mtrŭn 1 êklăk klei mĭn mbruă, mđĭ ksiêm hriăm, ba yua klei kreh knhâo, kdrăp mrâo, mđĭ hnơ̆ng mkra mjing. Mbĭt anăn, bi lông mkŏ mjing tŭ dưn bruă kriê dlăng boh tŭ leh anăn klei tŭ dưn kơ phung mă bruă, mđing hmao đru kơ phung mă bruă mâo klei hdĭp dleh dlan; bi siñê dŭm hdră đru kơ phung mă bruă, hdră kriê dlăng klei hdĭp mda mnơ̆ng dhơ̆ng, ai tiê, klei tŭ dưn phung mă bruă, mnuih mă bruă./.