Tlam ti knông lăn Ia Nan (kdriêk Đức Cơ, čar Gia Lai) adiê hlơr truh 38 độ C, k’uh k’ŭl. Êdeh mdiăng êa mơ̆ng knơ̆ng bruă mrô 72, Binh đoàn 15 ba truh leh ti alŭ Đức Hưng čiăng mkăp êa yua kơ mnuih ƀuôn sang. Amai Siu H' Úc brei thâo, jih jang dŭm boh kbăng êa thu khuôt leh sơăi, mnuih ƀuôn sang amâo mâo djăp êa yua ôh:

“Kƀah êa bŏ hŏng klei dleh dlan êdi, tăp năng mâo prăk dưn mơh kăn thâo bĭt anôk duah êa rei. Ƀri mơh kahan lĭng mơ̆ng knơ̆ng bruă 72, Binh đoàn 15 ba êa yua kơ mnuih ƀuôn sang. Mnuih ƀuôn sang bŏ hŏng klei mơak”.

Jih jang đĭng êa mơ̆ng êdeh mgơ̆ng êa bi mbŏ hŏng brŏng gŏ sang amai Lê Thị Thu Hà lač, mnuih ƀuôn sang hlăm alŭ bi mta kơ hdơ̆ng găp yua êa hŏng klei mkriêm yơh, lehanăn bi jang mbha êa mâo mkăp brei anăn:

  “Hmei mkriêm êa pioh tŭk kna hlăm dŭm hrue. Knŏng pioh yua kơ klei huă ƀơ̆ng đuič yơh. Bi êa rao djam leh hmei lŏ krih kơ bưn djam amâodah mčiêm kơ mnŭ, ŭn. Mkriêm êdi mi mĭt yơh”.

Trung tá Nguyễn Phi Vân – Khua bruă kđi čar mơ̆ng knơ̆ng bruă mrô 72, Binh đoàn 15 brei thâo: Jing êpul êya bruă duh mkra hlăm kahan lĭng dôk hlăm alŭ wăl, knơ̆ng bruă mâo leh dŭm ebâo čô mnuih ngă bruă jing mnuih ƀuôn sang ti să Ia Nan, kdriêk Đức Cơ. Êjai dôk găn ti krah yan bhang không prŏng, êpul khua kiă kriê knơ̆ng bruă tiŏ nao leh phung kahan grap hrue pom brei êa dŭ mdiăng hŏng 3 boh êdeh đoh brŏng êa hŏng hnơ̆ng dưi mâo 24m3, đru kơ mnuih ƀuôn sang dôk găn hlam yang kƀah ea anei:

 “Mđiă ktang bhang prŏng hmăi leh amâo mâo jăk hŏng djăp mta, wăt hŏng lĭng kahan msĕ mơh. Êpul kahan ăt dôk hlăm klei kƀah êa mơh. Ƀiădah knuă druh lĭng kahan mnuih ngă bruă mơ̆ng knơ̆ng bruă mâo nanao ai tiê duah êa kơ mnuih ƀuôn sang êlâo.”

Trần Xuân Nghiên- Khua să Ia Nan, kdriêk Đức Cơ, čar Gia Lai brei thâo: Alŭ Đức Hưng dôk ti krĭng kbưi hĭn hlăm să, kyua anăn hlăm grăp thŭn kreh tuôm nanao hŏng klei dleh dlan kyua kƀah êa. Lu thŭn hŏng anei, knơ̆ng bruă mrô 72, Binh đoàn 15 đru nanao êa kơ mnuih ƀuôn sang dăl hlăm dŭm mlan mtam. Klei anei, lŏ dơ̆ng hyuă kjăp hĭn klei bi mguôp lĭng kahan hŏng mnuih ƀuôn sang, đru bi răng mgang klei êđăp ênang ti knông lăn Đức Cơ:

“Bruă sang čư̆ êa alŭ wăl bi myuôm bruă mơ̆ng knơ̆ng bruă mrô 72 mkăp êa yua kơ mnuih ƀuôn sang. Hlăm 15 hrue hŏng anei, mâo mkăp djăp leh êa yua kơ mnuih ƀuôn sang. Mâo knơ̆ng bruă đru, mnuih ƀuôn sang bŏ hŏng klei mơak. Bi mni klei knơ̆ng bruă mrô 72 đru kơ klei hdĭp mda mnuih ƀuôn sang”.

Msĕ snăn mơh, ti kdriêk Ea Sup, čar Daklak adiê mđiă hlơrr ktang hlăm dŭm hrue êgao, ngă kơ mnuih ƀuôn sang lĕ hlăm klei kƀah êdi êa jua yua. Kahan lĭng, kahan ksiêm ti alŭ wăl đru mkăp brei leh êa yua kơ mnuih ƀuôn sang, đŏh ba brŏng êa mkăp kơ mnuih ƀuôn sang. Krah yang hrue adiê mđiă hlơr ktang truh êbeh 40 độ C, aduôn Vy Thị Mun dôk ti alŭ mrô 12, să Ea R’Vê, kdriêk Ea Súp bŏ hŏng klei mơak kyua mâo dua brŏng êa 500 lít lehanăn 1.000 lít gŏ sang ñu mâo leh kahan ksiêm mkăp ba:

“Yăng đar thŭn jing ăt dôk djăp êa yua. Lehanăn djăp êa krih kơ mnơ̆ng pla, ƀiădah thŭn anei êa khuôt jih, khuôt sui leh. Lač jăk kơ phung ayŏng adei lu snăk đru mkăp brei êa yua msĕ snei yuôm bhăn êdi.”

Ăt mâo klei kahan ksiêm đru mkăp êa, snăn Lò Văn Kiều, ti alŭ mrô 12, să Ea R’Vê, kdriêk Ea Súp, čar Daklak, hŏng klei mơak yăl dliê:

“Dua mlan êlâo dôk mâo yua êa kbăng sang riêng gah, ƀiădah ară anei digơ̆ hlŏng khuôt leh mơh. Mâwo mkăp msĕ snei sa blư̆ yua mơ̆ng 4-5 hrue yua hŏng klei mkriêm. Bruă sang čư̆ êa alŭ wăl hŏng kahan lĭng, kahan ksiêm đru mkăp leh êa kơ mnuih ƀuôn sang”.

Thiếu tá Đoàn Huy Tưởng, Khua kahan ksiêm să Ea R’Vê, kdriêk Ea Sup lač, grăp hrue dŭm boh ƀuôn, srăng ktuê yap dŭm ênoh gŏ sang mnuih ƀuôn sang lĕ hlăm klei kƀah êa. Leh kơ anăn kahan ksiêm mâo hdră, bi hgŭm hŏng Êpul ngă bruă duh mkra mơ̆ng kahan lĭng mrô 737 (kahan alŭ wăl 5), bi mlih nao dŭ ba êa yua kơ mnuih ƀuôn sang. Hlăm anăn, kahan ksiêm să Ea R’vê mâo leh kahan ksiêm kdriêk Ea Sup mkăp 2 boh êdeh mdiăng êa, bi êpul bruă duh mkra mơ̆ng kahan mrô 737 mâo 3 boh êdeh brŏng êa dŭ ba êa yua kơ mnuih ƀuôn sang.

“Sa blư̆ mkăp êa kơ sa gŏ sang mâo kah knar mơ̆ng 1-3m3. Knư̆ hrue knư̆ klei kƀah êa lar hlăm lu anôk. Snăn klei mkăp êa kơ mnuih ƀuôn sang bi mâo hdră mbha mơ̆ng kahan ksiêm kdriêk, đru kơ mnuih ƀuôn sang đăm lĕ hlăm klei kƀah êa kjham hĭn êdi ôh”./.