Hlăm mmông tŭ drông, dua nah bi lač, klei mjĕ giăm bi mguôp hdră êlan kluôm dhuôm Việt Nam leh anăn Hungary hlăm dŭm thŭn êgao đĭ kyar jăk siam hlăm djăp mta bruă, hlăm dŭm mbah, boh nik jing bruă kđi čar – bruă hŏng tač êngao, bruă duh mkra – mnia mblei, mtô mjuăt leh anăn bi hriăm, dhar kreh. Dua ala čar kreh mkŏ mjing dŭm klei bi trông êpul dŭm gưl, boh nik jing êpul gưl dlông.

Bruă bi trông êpul dưi leh anăn dôk bi mguôp ba klei mjĕ giăm dua ala čar đĭ ti hnơ̆ng mrâo. Khua bruă kƀĭn ala Vương Đình Huệ mñă kơ dua tĭng lŏ dơ̆ng hluê ngă dŭm mta phŭn klei kuôl kă plah wah bruă Kƀĭn ala dua ala čar dưi bi klă ti thŭn 2022. Khua bruă kƀĭn ala Vương Đình Huệ hơêč hmưi kơ Hungary păn bruă tu jing Khua gĭt gai djŏ tuôr mơ̆ng êpul gơ̆ng EU, hmăng hmưi hlăm bruă klam anei, Hungary srăng mtrŭt mđĭ klei bi hgŭm plah wah EU leh anăn ASEAN leh anăn klei mjĕ giăm bi mguôp plah wah Việt Nam leh anăn EU.