Hlăk 17h40 tlam 12/4, Khua bruă kƀĭn ala Vương Đình Huệ leh anăn Êpul bi ala gưl dlông ala čar drei truh leh ti tač êdeh phiơr Nội Bài, mjưh ruĕ gưl nao čhưn klă sĭt ti ala čar China mơ̆ng hruê 7-12/4/2024. Gưl nao čhưn klă sĭt anei mâo leh êbeh 40 bruă ngă gưl dlông leh anăn lu bruă ngă nah êngao mkŏ mjing ti ƀuôn prŏng Bắc Kinh, ƀuôn prŏng Thượng Hải leh anăn čar Vân Nam. Jing khua gĭt gai kmeh gơ̆ng mơ̆ng Đảng leh anăn knŭk kna, gưl Khua bruă kƀĭn ala Vương Đình Huệ nao čhưn đru hlăm klei bi hgŭm plah wah dua anôk bruă čih mkra hdră bhiăn leh anăn mđĭ klei bi hgŭm kluôm mơ̆ng dua Đảng, dua ala čar hlăm lu mta bruă mơ̆ng kđi čar, klei êđăp ênang - lĭng kahan, bi hgŭm hlăm bruă duh mkra- mnia blei, bi liê, mkŏ êlan klông, lu tĭng, mjĕ êrô mnuih ƀuôn sang dua ala čar.

Hŏng lu boh tŭ lu jơr, klă sĭt, gưl nao čhưn ti China mơ̆ng Khua bruă kƀĭn ala Vương Đình Huệ lŏ dơ̆ng jing knhuang mrâo hlăm klei bi hgŭm dua ala čar, bi êdah klei đru mguôp yuôm bhăn, klă sĭt mơ̆ng anôk bruă čih mkra hdră bhiăn hŏng klei đĭ kyar kluôm mơ̆ng dua Đảng, dua ala čar Việt Nam – China.