Khua gĭt gai dŭm lăn čar, dŭm Đảng hơêč hmưi kơ dŭm boh tŭ dưn prŏng, êdah êdi hlăm klei mđĭ kyar, mkŏ mjing lăn čar Việt Nam ti gŭ klei gĭt gai mơ̆ng Đảng cộng sản Việt Nam, ba anăp jing Khua gĭt gai Đảng Nguyễn Phú Trọng, mñă klă srăng lŏ hrăm mbĭt hŏng Khua gĭt gai Đảng mtrŭt mđĭ klei mjĕ giăm dua tĭng amâo mâo mdei klei đĭ kyar.

Khua gĭt gai Đảng, Khua lăn čar Lào Thongloun Sisoulith mñă ktang Khua gĭt gai Đảng Nguyễn Phú Trọng “uêñ mĭn leh anăn đru mguôp lu hĭn hlăm bruă ksul mbŭ klei bi hgŭm prŏng prĭn, klei bi mguôp kluôm dhuôm plah wah dua Đảng, dua knŭk kna leh anăn mnuih ƀuôn sang Việt Nam – Lào, kriê pioh knhuah gru jăk siam anăn mtah mda nanao, kjăp lă lar”. Khua gĭt gai Đảng, Khua lăn čar China Tập Cận Bình mñă klă “Dlăng yuôm bhăn klei mjĕ giăm China – Việt Nam, mprăp hrăm mbĭt hŏng Khua gĭt gai Đảng Nguyễn Phú Trọng rơ̆ng kơ klei bi trông hdră êlan, hdră tă mkŏ mjing êpul êya bi kah mbha êdei anăp China – Việt Nam nao êlam hĭn leh anăn klă klơ̆ng hĭn”.