Hruê mbruê 26/6, Ti anôk bi kƀĭn yang ƀuôn, ƀuôn prŏng phŭn Bắc Kinh, China, hlăm gưl nao hlăm klei kƀĭn trông grăp tuôr phung nao êlâo gưl tal 15 mơ̆ng Klei kƀĭn bruă duh mkra tar rŏng lăn ti Đại Liên leh anăn mă bruă ti China, Khua knŭk kna Phạm Minh Chính bi tuôm leh anăn blŭ hrăm hŏng khua gĭt gai China Tập Cận Bình.

Hlăm klei bi tuôm, dua čô khua gĭt gai tŭ ư̆ bi klă klei thâo săng mbĭt gưl dlông, boh nik jing klei bi klă Việt Nam – China kơ bruă lŏ dơ̆ng bi êlam leh anăn mđĭ hnơ̆ng klei bi mguôp hdră êlan kluôm dhuôm, mkŏ mjing êpul êya bi kah mbha êdei anăp Việt Nam – China mâo boh tŭ dưn hluê hdră “6 kdlưn hĭn”. Khua knŭk kna Phạm Minh Chính mñă kơ dŭm tĭng bi mguôp kjăp hlăm dŭm bruă prŏng, mâo knhuah bi hmô leh anăn boh tŭ klă sĭt, kjăp. Dua tĭng ăt bi trông kơ dŭm boh klei hlăm alŭ wăl, tar rŏng lăn dôk bi mđing, bi tŭ ư ksiêm dlăng leh anăn mgaih msir klei amâo thâo bi djŏ hŏng klei êđăp ênang, hơĭt kjăp ti êa ksĭ.