Hluê hdră mă bruă aguah anei, Anôk bruă kƀĭn ala bi mklă 2 klei čih mkra hdră bhiăn, mâo: Hdră bhiăn Ênua yang ƀuôn (mkra mlih), Hdră bhiăn kriê dlăng, ba yua phao ktuang, mnơ̆ng mtuh (mkra mlih), hdră bhiăn mkra mlih, thiăm mbŏ dŭm mta hlăm Hdră bhiăn Lăn ala, Hdră bhiăn sang dôk, Hdră bhiăn čhi lăn ala, sang dôk; Hdră bhiăn dŭm êpul brei čan prăk.

Anôk bruă kƀĭn ala ăt bi mklă Hdră mtrŭn ksiêm dlăng kơ bruă “Hluê ngă hdră mtrŭn mơ̆ng Anôk bruă kƀĭn ala kơ hdră ngăn prăk đru krŭ wĭt, mđĭ kyar bruă duh mkra – ala ƀuôn lehanăn dŭm hdră mtrŭn yuôm bhăn mơ̆ng ala čar truh kơ thŭn 2023”; Hdră mtrŭn êmuh lehanăn wĭt lač klei êmuh. Mbĭt anăn jing Hdră mtrŭn Klei bi kƀĭn tal 7, Anôk bruă kƀĭn ala gưl XV, hlăm anăn mâo bruă mkra mlih hdră mtrŭn duh bi liê Hdră ala čar kñăm mđĭ kyar bruă duh mkra – ala ƀuôn krĭng mnuih djuê ƀiă lehanăn krĭng čư̆ čhiăng wưng thŭn 2021 -2030; hdră mtrŭn mkra mlih prăk mlan, hdră bi kdung tla nư hŏng prăk čan duh kơ bruă lehanăn dŭm mta djŏ tuôm kơ bruă ba yua ngăn prăk gưl dlông thŭn 2023. Khua Anôk bruă kƀĭn ala Trần Thanh Mẫn blŭ hrăm mjưh ruê̆ Klei bi kƀĭn tal 7./.