Blŭ hrăm hlăm klei kƀĭn, Khua knŭk kna Phạm Minh Chính mgei ai tiê ti anăp klei siă suôr, klei đăo knang, bi êdah klei mpŭ, klei bi đru hdơ̆ng pô plah wah mnuih ƀuôn sang dua lăn čar, mbĭt anăn lač klei mjĕ giăm Việt Nam – Dhŭng Korea ka tuôm jăk siam msĕ hŏng ară anei. Bi kơ klei bi mguôp mă bruă knuă, Khua knŭk kna brei thâo, leh êbeh 30 thŭn bi mguôp, mâo mmông toh hroh mâo mmông kdlưn hĭn, ƀiădah brei ƀuh mnuih ƀuôn sang mơ̆ng Việt Nam nao mă bruă ti Dhŭng Korea jing klei čiăng êdi, mnuih mă bruă Việt Nam mâo klei hơĭt êjai nao mă bruă ti Dhŭng Korea.

Khua knŭk kna Phạm Minh Chính đăo knang, hŏng klei gĭr mơ̆ng dua tĭng, hŏng klei bi hgŭm hdră êlan kluôm dhuôm Việt Nam – Dhŭng Korea, klei bi mguôp bruă duh mkra, mnuih mă bruă srăng lŏ jing tur knơ̆ng yuôm bhăn hlăm klei mjĕ giăm dua tĭng, mbĭt anăn jing boh kdrŭt ba klei mjĕ giăm dua ala čar đĭ ti hnơ̆ng mrâo kyua klei mdrŏng sah mbĭt.