Khua lăn čar Tô Lâm mñă klă Việt Nam dlăng yuôm bhăn klei bi hgŭm knhuah gru leh anăn bi mguôp lu mta bruă hŏng Belarus, mâo khua gĭt gai leh anăn mnuih ƀuôn sang dua ala čar ksul mbŭ mơ̆ng ênuk Liên Xô, ăt msĕ mơh dưi mtrŭt mđĭ hlăm êbeh 30 thŭn êgao yap mơ̆ng dua ala čar mkŏ mjing klei mjĕ giăm thŭn 1992, mñă klă Việt Nam dlăng kơ Belarus jing mah jiăng, ƀĭng hgŭm đăo knang, dlăng yuôm bhăn klei đru mơ̆ng mnuih ƀuôn sang Belarus kơ Việt Nam êlâo dih, gĭr srăng mđĭ hĭn klei bi mguôp hŏng Belarus.

Bi trông hlăm dŭm êpul êya tar rŏng lăn leh anăn klei kƀĭn lu tĭng, Khua lăn čar Tô Lâm leh anăn Pô bi ala Belarus tŭ ư srăng lŏ bi mguôp, sa ai hdơ̆ng pô hlăm dŭm klei kƀĭn tar rŏng lăn leh anăn alŭ wăl, msĕ si Êpul hgŭm lu ala čar, Êpul hgŭm bruă duh mkra Asi – Ơrôp kyua boh tŭ dưn kơ dua lăn čar, đru hlăm klei êđăp ênang leh anăn mđĭ kyar ti alŭ wăl leh anăn tar rŏng lăn.