Ti Điện Kinh Thiên hŏng ai tiê thâo mpŭ bi hdơr kơ phung aduôn aê tâo tiết, bi êdah hdră bhiăn “Mnăm êa hdơr kơ hnoh” mơ̆ng djuê ana Việt Nam, Khua knŭk kna Phạm Minh Chính mbĭt hŏng phung khua gĭt gai Đảng, knŭk kna leh anăn khua gĭt gai alŭ wăl nao ti sang mtao myơr brui mngưi, mnga, bi êdah klei hdơr kơ phung aê ama mâo ai rŭ mdơ̆ng lăn čar čiăng kơ anak čô lŏ čuê knhuah gru lạc Hồng rŭ mdơ̆ng lăn čar Việt Nam mdrŏng siam, mrâo mrang msĕ si ară anei.

Hlăm mmông myưng myang mơ̆ng hruê bi hdơr hruê djiê mtao Hùng, dŭm êklăk čô anak mnuih Việt Nam hlăm leh anăn êngao lăn čar, hrăm mbĭt mđing truh kơ Sang yang Hùng hŏng ai tiê mpŭ čiăng bi êdah klei hdơr kơ phung Mtao Hùng, phung nao êlâo mâo ai rŭ mdơ̆ng lăn čar leh anăn răng mgang lăn čar. Leh knăm myơr brui mngưi, Khua knŭk kna Phạm Minh Chính leh anăn phung bi ala nao dưm kwang mnga, čih brui mgưi ti msat mtao Hùng, myơr mnga ti knưng bi hdơr kơ Awa Hồ blŭ hrăm hŏng phung knuă druh, lĭng kahan Êpul kahan nao êlao ti êlan klah êma Sang yang Giếng.