Blŭ hrăm ti anôk bi tuôm anăn, Khua knŭk kna Phạm Minh Chính mâo leh klei mơĭt asăp čuă êmuh, hơêč hmưi klei suaih pral, klei jăk siam mơ̆ng khua gĭt gai Đảng Nguyễn Phú Trọng truh hŏng phung khua mduôn, phung găn leh hlăm klei bi blah Điện Biên, hlăk ai ba anăp, mnuih ƀuôn sang nao êlâo hlăm klei bi blah Điện Biên Phủ "hing ang truh kơ 5 krĭng lăn, êyuh mgei tar ƀar”.

Khua knŭk kna lač, dŭm thŭn leh êgao, hŏng klei mnăm êa hdơr kơ hnoh, ƀơ̆ng boh hdơr kơ phŭn” Đảng lehanăn knŭk kna mâo nanao klei mđing uêñ, ngă jăk bruă hdơr knga tla ai, hŏng bruă klam prŏng prĭn, hlăm klei thâo mpŭ lehanăn hdơr knga mâo ngă leh lu hdră êlan đru kơ dŭm hdră êlan klă mngač hŏng kahan êka êkeh, kahan ruă duam, găp djuê phung săn asei, mnuih mâo bruă tŭ dưn hŏng cách mạng, yap anei jing bruă čuăn mơ̆ng kđi čar yuôm bhăn, ngă nanao hŏng klei khăp. Wưng tinăp, khua knŭk kna mtă dŭm knơ̆ng dhar bruă djăp êpul êya lŏ dơ̆ng ngă jăk hĭn hdră mtrŭn mơ̆ng Đảng, knŭk kna đru bi dlăn kriê kahan ruă duam, kahan êka êkeh, găp djuê phŭng êngiă asei, mnuih mâo bruă tŭ dưn hŏng cách mạng.