Tŭ ư klei iêo jak mơ̆ng knŭk kna Cuba, k’iăng Khua knŭk kna Trần Lưu Quang kčưm gưl nao čuă klă klơ̆ng Cuba mơ̆ng hruê 14 – 19/4.

Tlam mbruê 15/4, K’iăng Khua knŭk kna Trần Hồng Hà mâo leh klei blŭ hrăm hŏng k’iăng Khua knŭk kna tal 1 hlŏng păn ngă Khua phŭn bruă tuh tia leh anăn duh bi liê ala tač êngao Cuba Ricardo Cabrisas.

Bi ala kơ knŭk kna leh anăn mnuih ƀuôn sang Việt Nam, k’iăng Khua knŭk kna lač jăk kyua klei đru mơ̆ng khua gĭt gai Fidel Castro, dŭm gưl khua gĭt gai leh anăn mnuih ƀuôn sang Cuba brei leh kơ Việt Nam hlăm bruă krŭ kdơ̆ng sua wĭt klei êngiê djuê ana, mkŏ mjing leh anăn răng mgang lăn čar.

K’iăng Khua knŭk kna mñă klă knŭk kna Việt Nam srăng gĭr hluê ngă dŭm hdră đru kơ Cuba mđĭ hĭn bruă mkra mjing bruă lŏ hma hŏng ai tiê jing ƀĭng hgŭm, ayŏng adei, tŭ dưn, klă klơ̆ng. Mbĭt anăn mñă ktang klei yuôm bhăn mơ̆ng knơ̆ng bruă leh anăn mnuih ƀuôn sang dua lăn čar hlăm bruă hluê ngă, bi lar boh tŭ dưn dŭm hdră bi mguôp dua tĭng, mñă kơ knŭk kna Cuba uêñ mĭn ngă klei đru, mkŏ mjing klei găl čiăng kơ knơ̆ng bruă Việt Nam duh bi liê ti Cuba. Dua čô k’iăng Khua knŭk kna tŭ ư srăng bi mguôp kjăp hlăm bruă hluê ngă dŭm klei kuôl kă gưl dlông dưi mâo leh, bi lar di dŭm hdră dhar bruă mlir knŭk kna kñă mtrŭt mđĭ dŭm hdră bi mguôp, duah hdră êlan đru kơ knơ̆ng bruă Việt Nam mnia mblei, duh bi liê ti Cuba, đru mguôp hlăm klei mjĕ giăm dua tĭng.