Grăp blư̆ bi hdơr kơ kwar dhŭng mâo klei êngiê, mhluh lir lăn čar, Y- Nguôm Byă ti buôn Dak Tuôr, să Čư̆ Pui, kdriêk Krông Bông, čar Daklak lŏ kčŭt hlăm ai tiê hdơr hlăm dŭm thŭn mlan mŭt kahan mblah dêč bi blah hŏng Mi. Ñu yăl dliê, hlăk anăn, êpul kahan blah dêč mơ̆ng ƀuôn dôk ti gŭ klei kiă kriê mơ̆ng Y- Ơn Niê khua êpul mơ̆ng să, găn nanao lu blư̆ klei phung roh kih mdoh, snăn kut kat amâo mâo lui lĕ hlăm kngan roh ôh, amâo brei mnuih ƀuôn sang lĕ hlăm kngan diñu ba bi klin dôk hlăm sa anôk ôh. Ama Hoa lač, khădah boh phao ktuang tuh hriê msĕ si hjan, ƀiădah mnuih ƀuôn sang Dak Tuôr ăt gĭr ktĭr duh ƀơ̆ng đru rông ba cách mạng.
“Pioh đru kơ klei bi blah, đru kơ kahan pô, pô điêt ngă bruă điêt, mnuih prŏng ngă bruă prŏng, điêt đuôt amâo lĕ hlăm knga roh, pô bi dŏng đru kơ lăn čar pô. Hlăm krĭng taih kbưi, jing anôk mnuih djuê ƀiă yơh ƀiădah điêt đuôt amâo mâo lui luič lăn čar ôh”.
Leh lăn čar mâo klei hluh lir, bruă Đảng, bruă sang čư̆ êa, mnuih ƀuôn sang djăp djuê ana ti să Čư̆ Pui, pral lŏ kơrŭ wĭt, mghaih msir jih boh mơ̆ng klei bi blah, jih ai tiê bi ktưn mă bruă knuă, rŭ mdơ̆ng lăn čar mâo klei đĭ kyar nanao. Dơ̆ng mơ̆ng anôk lĕ hlăm klei kplŭt aguah kƀah tlam, čhum čŭt ao hơô amâo mâo, klei duh mkra pla mjing kthŭl mluk, ară anei lu gŏ sang hlăm să kpưn đĭ tlaih leh mơ̆ng dleh dlan, mâo ba wĭt dŭm êtuh êklăk prăk grăp thŭn. Y-Sự Byă ti buôn Khanh, să Čư̆ Pui, hŏng klei mơak yăl dliê:
“Klei hdĭp mda mnuih ƀuôn sang ară anei dah mkă hŏng êlâo mâo leh klei bi mlih. Mnuih ƀuôn sang thâo ba yua klei duh mkra mrâo, ti lăn ƀuôn sang pô. Mâo đa đa gŏ sang thâo ba yua klei kreh knhâo hlăm klei duh ƀơ̆ng, snăn klei hdĭp đĭ hĭn leh mkă hŏng êlâo”.
Să Čư̆ Pui, kdriêk Krông Bông, čar Daklak mâo 13 boh ƀuôn, hŏng 2.700 gŏ êsei mnuih ƀuôn sang, hŏng êbeh 14.000 čô mnuih jing mnuih djuê ƀiă truh 90%. Truh kơ ară anei, krĭng taih kbưi mâo leh êlan pui kmlă, mâo leh sang hră mơar, sang êa drao, knơ̆ng mbông êa, anôk mkăp êa pơ̆ng... hlăk mâo dưn yua hŏng klei jăk. Y-Kok M’Drang, Khua bruă Đảng să Čư̆ Pui, brei thâo, mbĭt hŏng klei knŭk kna mđing duh bi liê, mnuih ƀuôn sang pô hlăm să hlăk jih ai tiê bi đru mkŏ mkra krĭng ƀuôn sang mrâo. Să lŏ dơ̆ng dưn yua jih bruă klam mơ̆ng klei thâo bi hmô mơ̆ng phung đảng viên đru mnuih ƀuôn sang bi mlih klei mĭn, knhuah ngă bruă, mđrăm mbĭt dưn yua klei kreh knhâo hlăm duh mkra, mđĭ kyar klei hdĭp mda:
“Mđing đru kčĕ phung đảng viên brei mâo klei thâo bi hmô ba êlan êlâo mđĭ kyar klei hdĭp pô. Hŏng mta kñăm “Đảng viên ngă êlâo mnuih ƀuôn sang tui tluôn”. Hŏng klei msĕ snăn, jih jang knuă druh đảng viên êngao kơ bruă mkŏ mjing đảng, mkŏ mjing bruă kđi čar, hmei mâo hdră tă êlan mđĭ kyar bruă duh mkra jing tal êlâo hŏng bruă klam mđĭ kyar klei duh mkra gŏ sang, kñăm mđĭ kyar ênuk tuh tia ară anei”.
Dưn yua jih knhuah gru cách mạng, mơ̆ng krĭng taih kbưi krĭng mnuih djuê ƀiă dôk hlăm klei dleh dlan, să Čư̆ Pui hlăk kpưn đĭ ktang kơ klei duh mkra ala ƀuôn bi năng hŏng anăn knăl jing jhŏng ktang./.
Viết bình luận