Krĭng dliê ti alŭ Nhọt dôk ti ktuê êlan dơ̆ng prŏng 37, mâo ênhă giăm 200 ha, dưi mjing mơ̆ng 2 boh čư̆ prŏng djiêu gah, jih thŭn mlan yan adiê êđăp drưm. Thŭn 1954, ktuê êlan êbat ruê̆ kahan mơ̆ng Nghĩa Lộ (čar Yên Bái) nao Điện Biên nao hlăm hdră mblah Điện Biên Phủ, Đại tướng Võ Nguyên Giáp lehanăn Êpul kahan mtlaih êngiê dôk mjưh mjing leh kđông kahan tinei, mơ̆ng anăn krĭng dliê anei mâo mnuih ƀuôn sang kreh pia jing “Dliê Đại tướng Võ Nguyên Giáp".

 Amâo msĕ hŏng dŭm krĭng dliê mkăn păt čiăng jih jing dŭm mta ana kyâo dliê mtŭk mtŭl, ana hruê̆, snăn dliê Đại tướng Võ Nguyên Giáp ăt dôk hrông dŭm amta ana dŭm pluh thŭn, êtuh thŭn, tlâo pă čô kmiêk kăn luôm, mbĭt hŏng anăn jing dŭm ƀĕ ana lát, dổi, pơ mu dlông, kpă blăk.

  7 pluh thŭn leh êgao, kdrăn dliê anei ăt prŏng liă lia, mtah mda, msĕ si bi êdah klei khăp mơ̆ng mnuih ƀuôn sang tinei kơ Đại tướng Võ Nguyên Giáp mbĭt hĭng êpul kạhan ênuk anăn. Lò Văn Linh, Khua ƀuôn, khua êpul kriê dlăng wăl dliê ƀuôn Nhọt, să Gia Phù brei thâo:

Kâo m’ak êdi dưi nao hgŭm hlăm Êpul kriê dlăng dliê Đại tướng Võ Nguyên Giáp. Hmei kreh mtô mblang kơ mnuih ƀuôn sang, mtă kơ ênuk gưl êdei gĭr kriê dlăng lehanăn krơ̆ng kjăp dliê. Bi kơ hmei, grăp hruê kăm nao hiu suang dlăng dliê 3 blư̆ čiăng gang mkhư̆ klei pui ƀơ̆ng dliê lehanăn gang mkhư̆ mnuih ƀuôn riêng gah nao mŭt mă djuh, mơ̆ng anăn dưi răng mgang dliê kjăp hĭn.

Đinh Công Són ti să Gia Phù leh giăm 30 thŭn nao hgŭm hlăm Êpul răng mgang “Dliê Đại tướng Võ Nguyên Giáp" ară anei dưi păn ngă bruă klam kriê dlăng Sang yang Đaị tướng ti krĭng knhuah gru anei. Ñu brei thâo, khădah thŭn leh khua, ƀiădah ñu ăt gĭr jih ai tiê mbĭt hŏng mnuih ƀuôn sang kriê dlăng Sang yang lehanăn Wăl knhuah gru čiăng rơ̆ng klei mtah mda, doh, siam, jing klei khăp mơ̆ng ñu lehanăn mnuih ƀuôn sang tinei hdơr nanao kơ Đại tướng:

  Kâo ktưn hưn lehanăn čiăng mtômblang kơ ênuk gưl mda asei, boh nik phung hđeh hriăm hră ti dŭm sang hră, đoàn viên, êdam êra tơdah truh ti Sang yang anei tui ksiêm. Kâo ăt hưn mthâo kơ phung čô anak lehanăn mtô mblang kơ knhuah gru kdrưh k’ăm mơ̆ng aê aduôn pô đưm. Dưi răng mgang sang yang grăp hruê, mlih êa, čuh brui mngưi kơ aê ama nao êlâo jing klei ktưn hưn, m’ak êdi mơ̆ng kâo.

Hdơr kơ knhuah gru hƀuê ênuk mguôp hŏng anăn mơ̆ng Đại tướng, thŭn 2008, Anôk bruă sang čư̆ êa čar Sơn La tŭ yap leh Wăl dliê Đại tướng Võ Nguyên Giáp jing knhuah gru hƀuê ênuk gưl čar. Truh kơ thŭn 2030, čar Sơn Lao jao leh kơ kdriêk Phù Yên pŏk hluê ngă hdră mkra mđĭ boh tŭ yuôm Knhuah gru hƀuê ênuk kdơ̆ng mblah bi kdơ̆ng hŏng Prăng ti krĭng dliê ƀuôn Nhọt h’ĭt kjăp, mguôp hŏng hdră mđĭ kyar bruă hiu čhưn ênguê mơ̆ng čar Sơn La lač kluôm kdriêk Phù Yên lač hjăn, mjing gru kruăk hlăm hdră mđing truh kơ kdrăn mblah đưm, hluê ngă klei bhiăn “Mnăm êa hdơr kơ akŏ mơ̆ng djuê ana”. Knhal jih thŭn 2021, kdriêk Phù Yên hưn mthâo leh bruă ba yua hdră răng mgang dliê, mkra mđĭ boh tŭ yuôm Knhuah gru hƀuê ênuk kdơ̆ng mblah bi kdơ̆ng hŏng Prăng ti krĭng dliê ƀuôn Nhọt mâo dŭm hdră: Sang bi hdơr Đại tướng Võ Nguyên Giáp; wăl anôk ngă yang, tač ngă yang, kban, ƀăng jang wăl anôk…

Truh tinei, mnuih ƀuôn snag, phung tuê hiu čhưn ênguê amâo djŏ knŏng dưi hdĭp hlăm ai êwa kdrưh k’ăm mơ̆ng Êpul kahan mtlaih êngiê Điện Biên nao hgŭm hlăm hdră mblah Điện Biên Phủ ênuk đưm, ƀiădah lŏ hrăm mbĭt hlăm wăl anôk yuôm bhăn, jăk êđăp mơ̆ng Wăl knhuah gru Sang yang Đại tướng Võ Nguyên Giáp.  Nguyễn Thị Hồng Hạnh ti kdriêk Phù Yên (Sơn La) brei thâo:

Jing ênuk gưl hđeh dưi kkiêng hlăm wưng êđăp ênang, kâo ƀuh ktưn hưn êdi, kâo mĭn brei pô jing sa čô ngă bruă hâo hưn mtô mblang kjăp hĭn, čiăng dưi lar bra dŭm boh tŭ yuôm hƀuê ênuk mơ̆ng wăl hiu čhưn ênguê truh hŏng phung tuê hiu čhưn hlăm lehanăn êngao kdriêk”.

Knhuah gru hƀuê ênuk bi kdơ̆ng hŏng Prăng wăl dliê ƀuôn Nhọt lehanăn Sang yang Đại tướng Võ Nguyên Giáp jing dŭm knhuah gru hƀuê ênuk dhar kreh mâo boh tŭ yuôm hlăm ai tiê klei mĭn, mtă kơ ênuk gưl hđeh hruê anei kơ dŭm klei đru myơr, săn asei mơ̆ng aê ama nao êlâo kyua klei hnŭk êngiê, êđăp ênang kơ ala čar. Dŭm hdră mblah tŭ dưi kdrưh k’ăm mơ̆ng Đại tướng Võ Nguyên Giáp mbĭt hŏng êpul kahan Điện Biên Phủ ênuk anăn srăng dôk nanao, msĕ si kdrăn dliê mtah mda mă anăn Đại tướng hlăk lehanăn dôk dưi kriê pioh, răng mgang hŏng klei khăp mơ̆ng mnuih ƀuôn sang ti krĭng anei./.