Să Dăk Nia, ƀuôn prŏng Gia Nghĩa, čar Dak Nông jing anôk dôk mơ̆ng đưm mơ̆ng mnuih Mnông. Hlăm dŭm klei kdơ̆ng mblah, mnuih ƀuôn sang siă suôr, bi mguôp hŏng cách mạng, đăo knang leh anăn hluê Đảng. Să Dak Nia jing anôk kruăk knhăl hƀuê ênuk rŭ mjing êlan dơ̆ng Hồ Chí Minh. 4 mmông tlam hruê 30/10/1960, ti să Dak Nia, Êpul B90 mơ̆ng nah Dưr leh anăn Êpul C200 mơ̆ng nah Dhŭng kčưm ngă klei blŭ hrăm, mkŏ dua krĭng krĭng Lăn Dăp Kngư leh anăn Ngŏ Dhŭng, bi hluh êlan dơ̆ng Hồ Chí Minh, rơ̆ng klei đru mơ̆ng Kwar Dưr kơ anôk bi blah sau wĭt klei êngiê krĭng kwar Dhŭng, hluh hlir lăn čar. Anôk mâo dau êpul B90 leh anăn C200 bi tuôm ară anei mâo knŭk kna dăp hlăm wăl kriê pioh hƀuê ênuk ala čar. Ksrai, khua dhar bruă mặt trận să Dak Nia, ƀuôn prŏng Gia Nghĩa, čar Dak Nông lač: “Hlăm dŭm gưl kdơ̆ng mblah, hŏng mnuih ƀuôn sang hmei tinei mâo nanao klei đăo knang kơ Đảng. Truh kơ ară anei, mnuih ƀuôn sang ăt dôk đăo knang kơ hdră êlan mơ̆ng Đảng, klei bhiăn lăn čar, mâo klei bi mguôp răng mgang klei êđăp ênang ară anei leh anăn bi mguôp mkŏ mjing bruă duh mkra ƀrư̆ hruê ƀrư̆ đĭ, klei hdĭp mda đĭ kyar hĭn, mnuih ƀuôn sang mdrŏng sah, ala čar ktang. Dŭm gưl phung nao êlâo ăt mtô mjuăt kơ anak čô kơ knhuah gru cách mạng hing ang.”

Hlăm ai êwa kluôm ala hơ̆k m’ak bi hdơr 49 thŭn Hruê mtlaih êngiê kwar Dhŭng – hluh lir ala čar, kahan hđăp Y Joan Niê, djuê ana Êđê ti ƀuôn ALê A, ƀuôn prŏng Êa Tam, ƀuôn prŏng Ƀuôn Ama Thuôt, čar Dak Lak lŏ bi hdơr kơ mnĭt mmông kdrưh k’ăm mơ̆ng djuê ana. Ñu brei thâo, hlăk anăn ñu mrâo rŭ prŏng, ama ñu brei nao hluê mbĭt gui mnơ̆ng ƀơ̆ng, êa drao gŭn… kơ phung kahan. Ñu yăl dliê gưl tal êlâo dưi bi tuôm hŏng phung kahan mtlaih êngiê lehanăn dưi hơ̆k m’ak hlăm hruê hluh lir ala čar: “Leh mtlaih êngiê Ƀuôn Ama Thuôt mâo mă klei tŭ dưi Hdră mblah ti Lăn dap kngư hlăm akŏ mlan 3/1975, ênuk anăn kâo 14 - 15 thŭn. Ama kâo kreh brei gui êa drao, braih, ktơr, hbei, čĭm krô, djam dliê… truh kơ krĭng lĭng kahan mtlaih êngiê mâo kđông ti Ƀuôn Ama Thuôt brei kơ phung kahan. Phung kahan ênuk anăn amâo djăp mnơ̆ng ƀơ̆ng huă, êa drao gŭn, lu mnuih ruă êngoh yơ̆ng, kyua anăn ƀuh hmei nao ba mnơ̆ng diñu m’ak êdi. Diñu lač hŏng hmei, mâo mă lăn dap kngư srăng dưi mtlaih êngiê kluôm kwar Dhŭng. 2 hruê kăm êdei anăn, jing hruê 30/4, mnuih ƀuôn sang ti ƀuôn AlêA hmư̆ klei hưn phung kahan mtlaih êngiê mâo mă wĭt leh Dinh độc lập hlăk 10h45’, tlaih êngiê Sài Gòn”.