Gưl hjan akŏ yan anei hlăm tlam mbrue 3/5 ti čar Kon Tum đru leh kơ phung khua dliê dôk kiă dŭm êtuh ha dliê ti dŭm kdriêk: Sa Thầy, Ia H’Drai, Đăk Tô, Ngọc Hồi, Kon Rẫy, Đăk Glei, ƀuôn prŏng Kon Tum hlăk dôk hlăm klei huĭ hyưt kơ klei pui ƀơ̆ng dliê. Nguyễn Văn Huy, khua anôk bruă đăo knăl yan adiê čar Kon Tum lač: Anei jing gưl hjan prŏng akŏ yan. Hnơ̆ng hjan ti dŭm kdriêk: Đăk Hà, Sa Thầy, Đăk Tô, Kon Plông lehanăn Đăk Glei mâo mơ̆ng 50-70mm. Dŭm kdriêk adôk ti hnơ̆ng mơ̆ng 20-40mm. Hŏng klei adiê hjan msĕ snei, mnơ̆ng pla hlăm čar djăp leh êa ƀiă êdi kơ 5-7 hrue.

Tlam lehanăn mmăt hruê 3/5, ti ƀuôn prŏng Pleiku (Gia Lai) lehanăn dŭm kdriêk djiêu gah mâo leh adiê hjan êbeh 1 mmông. Anei dưi dlăng jing gưl hjan “Yuôm bhăn” đru bi hrŏ klei kƀah êa kơ mnơ̆ng pla ti lu alŭ wăl hlăm čar. Gưl adiê hjan ti Pleiku lehanăn dŭm kdriêk djiêu gah msĕ si Čư̆ Pah, Ia Grai lehanăn Đăk Đoa, Čư̆ Prŏng čar Gia Lai mâo êbeh 1 mmông. Adiê hjan prŏng đru bi hrŏ klei hlơr, klei kƀah êa hlăm wưng anei.

Mbĭt anăn, đru bi hrŏ klei kƀah êa, klei krô hla ti mnơ̆ng pla. Hluê si Anôk bruă đăo knăl yan adiê krĭng lăn dap kngư, dŭm hruê ti anăp, ti Gia Lai srăng lŏ mâo hjan ti lu anôk. Klei anei srăng đru kơ hnơ̆ng adiê hlăm kluôm čar hrŏ, dul ƀiă klei hlơr. Khă snăn, kyua adiê mđiă ktang, kƀah êa wưng sui, huĭ srăng mâo klei yan adiê amâo jăk, hjan prŏng angĭn đrŭng, ba lu klei amâo jăk kơ mnơ̆ng pla, mnuih ƀuôn sang brei mâo hdră mđing răng./.