Ti Kon Tum knăm hdơr hruê djiê mtao Hùng mâo Anôk dlăng bruă Sang Yang Lương Khế leh anăn bruă sang čư̆ êa ƀuôn hgŭm Thống Nhất, ƀuôn prŏng Kon Tum mkŏ mjing kdrưh kơăm. Mnuih ƀuôn sang, tue hiu čhưn leh anăn bi ala kơ bruă sang čư̆ êa nao ti sang Yang lu snăk, kkuh kơ mtao akâo kơ lăn čar êđăp ênang, adiê hlĭn djŏ yan, boh mnga mâo lu.

Ti Gia Lai, êpul hgŭm mnuih ƀuôn sang Vĩnh Phú (ară anei jing 2 čar Vĩnh Phúc leh anăn Phú Thọ) hdĭp mda ti dŭm kdriêk, wăl krah, ƀuôn prŏng ti čar Gia Lai wĭt ti Sang yang mtao Hùng ti sa An Phú, ƀuôn prŏng Pleiku, ngă knăm myơr brui mngưi bi hdơr kơ phŭn agha.

Ti Wăl kriê pioh hƀuê ênuk dhar kreh ala čar Đình Lạc Giao, ƀuôn prŏng Ƀuôn Ama Thuôt, bruă sang čư̆ êa leh anăn mnuih ƀuôn sang hlăm čar Dak Lak kdrưh koăm mkŏ mjing Knăm hdơr kơ hruê djiê mtao Hùng čiăng hdơr knga kơ phung mtao Hùng mâo leh ai tiê mkŏ mjing lăn čar.

Ti Lâm Đồng, Knăm hdơr kơ hruê djiê mtao Hùng mkŏ mjing kdrưh kơăm, hŏng klei bhiăn mâo: ba mnơ̆ng myơr ngă yang kơ mtao, myơr brui mngưi ti dŭm sang yang Thượng, Trung, Hạ hlăm wăl Sang yang Âu Lạc ti Wăl hiu čhưn ênguê drai Prenn Đà Lạt. Anei jing gưl čiăng kơ mnuih ƀuôn sang dŭm djuê ana Lăn Dap Kngư mđing kơ phŭn agha, bi êdah ai tiê mpŭ, hdơr kơ ai tiê phung mtao Hùng mâo leh ai tiê mkŏ mjing lăn čar leh anăn răng mgang ala čar, mơ̆ng anăn đru mđĭ kyar êpul bi hgŭm dŭm djuê ana./.