Hlăm mlan mnuih ngă bruă thŭn 2024, čar Gia Lai srăng mkŏ mjing hdră “lač jăk kơ mnuih ngă bruă” kñăm hdơrr knga lehanăn mpŭ mđĭ kơ mnuih ngă bruă mâo đru mguôp leh lu kơ dŭm anôk duh mkra. Lehanăn đru mdơ̆ng truh 10 boh sang bi đru kơ mnuih ngă bruă dôk hlăm klei hdĭp dleh dlan, nao čuă lehanăn mđup brei mnơ̆ng kơ mnuih ngă bruă mâo klei truh êjai ngă bruă, mnuih mâo klei ruă kjham... Mbĭt hŏng anăn êpul hgŭm mnuih ngă bruă nah gŭ srăng mkŏ mjing klei bi tuôm bi trông hŏng mnuih ngă bruă, hlue ngă hdră “klei suaih pral êjai ngă bruă” hŏng lu bruă ngă dhar kreh, kưt muiñ, mjuăt asei mlei.

Hŏng hdră klă mngač mơ̆ng êpul êya, Võ Công Hoà- Khua êpul hgŭm mnuih ngă bruă kdriêk   Chư Sê, brei thâo: Kdriêk ngă leh dua keh anăn jing “Bi đru mđĭ ai” lehanăn sang bi dru kơ ƀĭng ngă bruă dôk hlăm klei dleh dlan, čiăng bi hơĭt ai tiê êjai ngă bruă, lehanăn bi đru hlăm klei hdĭp hŏng jih jang mnuih ngă bruă. Hlăm mlan 5 mâo klei bi mguôp bruă bi ktưn êjai duh mkra, mjing klei thâo bi mguôp plah wah mnuih ngă bruă”./.