Hlăm gưl kƀĭn, dua tĭng mñă klă klei mjĕ giăm ƀĭng hgŭm hdră êlan mđĭ hnơ̆ng Việt Nam – Thailand ƀrư̆ hruê ƀrư̆ đĭ kyar êlam leh anăn klă klơ̆ng, hŏng klei thâo bi mpŭ, đăo knang hdơ̆ng pô leh anăn mâo boh tŭ mbĭt. Dua tĭng ăt bi tŭ dư mđĭ hĭn klei mjĕ mjuk mnuih ƀuôn sang, boh nik jing phung mda asei, hŏng dŭm mta bruă dhar kreh, mjuăt asei mlei, hiu čhưn ênguê, mtô mjuăt bi hriăm, mtrŭt mđĭ bruă mtô klei Thailand ti Việt Nam leh anăn klei Việt Nam ti Thailand.

Êngao kơnăn, dua tĭng mñă ktang klei yuôm bhăn mơ̆ng klei bi mguôp kriê pioh leh anăn bi lar dŭm knhuah gru dhar kreh, hƀuê ênuk Việt Nam ti Thailand, mtrŭt mđĭ dŭm hdră duh bi liê kyua yang ƀuôn mơ̆ng Thailand ti Việt Nam. Hlăm gưl kƀĭn, dua tĭng bi trông kơ bruă mprăp kơ gưl hriê čuă Việt Nam mơ̆ng Khua knŭk kna Thailand leh anăn hrăm mbĭt gĭt gai klei kƀĭn knŭk kna mbĭt gưl tal 4. Khua phŭn bruă hŏng tač êngao Bùi Thanh Sơn mñă ktang, Khua knŭk kna Phạm Minh Chính hmăng hmưi dưi drông Khua knŭk kna Thailand hlăm wưng kơ anăp.