VOV4.Jarai-{ơi să giam guai dêh ]ar Dak Wil, tơring glông }ư\ Jut, tơring ]ar Daknông, tơlơi khăp, pơpu\ nao rai kơplah wah tơhan pơgang guai dêh ]ar hăng mơnuih [on sang [ơi anai kjăp biă mă hăng lu bruă mă [uh tong ten mơtam, djru hrom pơđ^ kyar tơlơi bơwih [ong huă mơnuih mơnam.

 

Mơnuih [on sang djop djuai ania [ơi anai ăt thâo rơđah mơn bruă mă yom pơphăn mơ\ng tơhan pơgang guai dêh ]ar, anun yơh ngă hrom pơgang lo\n ia, pơgang guai dêh ]ar kiăng rơnuk rơnua, mơak klă giăng mah.

 

Ayong Hoàng Văn Thịnh thôn 7, să Dak Wil, tơring glông }ư\ Jut, tơring ]ar Daknông ngă tơhan pơgang guai dêh ]ar samơ\ pơdơi laih glăi pơ plơi pla hăng do\ bơnai 10 thun hăng anai.

 

Tơlơi hơdip mơda tơnap tap, bơnai `u nao pơ Bình Dương mă bruă apah, ayong Thịnh do\ pơ sang mă bruă tuh rơyuh pran jua hăng đang hmua, laih dơ\ng ]em rông 2 ]ô ană do\ anet hrăm hră pơ-ar.

 

Thâo kơ tơlơi gleh glar djơh hăng anun, adơi ayong ling tơhan puih kơđông Dak Ken, tơhan pơgang guai dêh ]ar tơring ]ar Daknông hơmâo djru prăk hrăm hră kơ ană kơ]ua đah kơmơi ayong Thịnh, anăn gơ\ Hoàng Thị Kim Yến hrăm truh abih anih 12.

 

Tơhan pơgang guai dêh ]ar tơring ]ar Danông hăng hơdră ngă hrom [ing đah kơmơi kual guai dêh ]ar

 

Rơnoh prăk anai amăng Hơdră ]ung tơkai adơi nao sang hră, hăng boh tơhnal hrăm amăng bơyan tal sa phrâo rơgao, mo# Hoàng Thị Kim Yến hrăm anih 4, sang hră gưl sa Nguyễn Du, să Dak Wil lêng kơ hơmâo mơ\ng 8-9 puang soh:

 

‘’Sang ano\ tơnap tap đơi anun yơh hơmâo adơi ayong ling tơhan puih kơđông 2,  puih kơđông Dak Ken rai tơl sang tơ`a bla, juh alum, djru brơi ană bă hrăm hră, ră anai mo# do\ hrăm anih 4, arăng djru brơi prăk hrăm hră truh abih anih 12.

 

Thâo mơn sang ano\ tơnap tap anun ta gir run ngă hiư\m pă 2 ]ô ană dưi hrăm hră truh kih, ]ang rơmang gơ`u ngă djơ\ tơlơi gơ`u tơdơi anai’’.

 

Tui hăng Jơnum min mơnuih [on sang să Dak Wil, tơring glông }ư\ Jut, [ơi să anai hơmâo 10 ]ô ]ơđai sang hră tơnap, hơmâo tơhan pơgang guai dêh ]ar djru prăk hrăm hră ‘’}ung tơkai adơi nao sang hră’’, rơnoh prăk djru 500 rơbâo prăk sa ]ô tơl abih hrăm anih 12.

 

Hrom hăng anun, tơhan pơgang guai dêh ]ar tơring ]ar Daknông do\ djru bruă pơko\n kah hăng brơi 12 drơi rơmô pioh rông, puih kơđông tơhan guai dêh ]ar Nậm Na djru brơi rơmô ania pioh rông, blung hlâo, brơi 2 drơi, truh ră anai rơmô tuh ană hơmâo truh 9 drơi laih.

 

    Tơhan pơgang guai dêh ]ar tơring ]ar Daknông [ơk brơi kơ mơnuih [un rin să Dak Wil 12 drơi rơmô ngă djuai

 

Tal [ong têt laih rơgao, puih kơđông Nậm Na pơphun jơngum mơak bơyan phang ako\ thun phrâo kơ ană plơi, brơi 30 anung gơnam kơ sang ano\ [un rin, sa boh sang ano\ 300 rơbâo prăk; kơnong sang ano\ djuai ania [iă [un rin hloh le\ sa boh sang ano\ 1 klăk prăk.

 

Tal blung a pơphun [ong têt mơak hăng ană plơi, Thiếu tá Nguyễn Văn Cương mơnuih mă bruă mơ\ng puih kơđông Nậm Na nao djru ană plơi lăi tui anai:

 

‘’Tơlơi khăp pơpu\ nao rai kơplah wah mơnuih [on sang hăng tơhan pơgang guai dêh ]ar tong biă mă.

 

Jing sa ]ô mơnuih mă bruă ngă tơhan pơgang guai dêh ]ar, kâo pơtong rơđah yơh bruă mă mơ\ng sa ]ô mơnuih ping gah, khua mua mơ\ng dlông jao le\, kâo khom nao ngă bruă je\ giăm mơnuih [on sang.

 

Lăi pơthâo djop bruă hăng khua mua pơ dlông  laih anun djru hrom bruă mă bơwih [ong huă mơnuih mơnam, pơgang tơlơi rơnuk rơnua amăng să.

 

Laih dơ\ng ngă hrom lu khul grup mơnuih mơnam, tơhan kông sang să hyu e\p, sem lăng tơlơi pơhing djop plơi pla amăng kual giăm guai dêh ]ar’’.

 

Bruă mă je\ giăm hăng ană plơi pla [ơi guai dêh ]ar, mă bruă tơpă tong ten, glăm ba sit nik, lu khua mua, ling tơhan pơgang guai dêh ]ar tơring ]ar Daknông jing kah hăng ană bă amăng plơi pla.

 

Amăng anun, lu khua mua tơhan pơgang guai dêh ]ar [ơi 2 boh puih kơđông Nậm Na hăng Dak Ken pơdong sang ano\ do\ ană bơnai hăng [ing dra să Dak Wil, tơring glông }ư\ Jut, jing sang ano\ mơak klă.

 

            Tơhan pơgang guai dêh ]ar tơring ]ar Daknông pơphun lu anih pơtô hrăm hră kơ [ing [u thâo hră mơnuih djuai ania [iă giăm guai dêh ]ar

 

Kah hăng ano\ Trung úy Văn Đinh Hùng hăng amai Nguyễn Hồng Thắm.

 

Jing mơnuih ngă nai ia jrao ling tơhan, juăt nao pơkă lăng tơlơi duăm ruă, [ơk ia jrao kơ mơnuih [on sang ayong Hùng bưp amai Thắm sa ]ô mơnuih ngă bruă gah mrô mơnuih, mă bruă hur har biă mă.

 

Tơlơi khăp gơ`u hiam klă, gơ`u dưi găn rơgao tơlơi lông lăng tơnap ngă giong bruă jao.

 

Ră anai, ayong Văn Đinh Hùng ngă nai ia jrao tơhan pơ puih kơđông Dak Ken, bơ amai Nguyễn Hồng Thắm le\ kơ-iăng khua khul đah kơmơi să Dak Wil.

 

Khă rơkơi do\ mă bruă pơ anih ataih giăm 100 km, dua, klâo wơ\t hrơi tơjuh kah mơ\ng glăi ]uă sang ano\, samơ\ amai Thắm ăt ngă giong bruă jao, rông ană bă pơ sang ano\ hrăm hră thâo, săng biă mă.

 

Amai Thăm brơi thâo, blan 3 anai, hơdor glăi 60 thun hrơi gru grua tơhan pơgang guai dêh ]ar, hơdor glăi hrơi jar kmar pioh kơ đah kơmơi, hơdor glăi 10 thun hrơi gơ`u pơdo\ rơkơi bơnai, pran jua `u mơak biă mă yua hơmâo tơlơi djru mơ\ng tơhan pơgang guai dêh ]ar:

 

‘’Gah tơhan pơgang guai dêh ]ar ngă bruă tơnap biă mă. Ră anai plai [iă, hlâo adih jơlan nao rai [u klă ôh.

 

Gơnam [ong huă, kâo prăp lui gơ`u djă ba pioh dua klâo hrơi mơtam [ong huă.

 

Jơlan rô nao rai tơnap tap, tăp năng rơkơi kâo nao mơ\ng mơguah truh tlam mơmo\t kah glăi truh pơ sang, lu ]răn jơlan khom trut rơdêh [u thâo đ^ ôh, [ing adơi ayong ling tơhan djru trut brơi rơdêh tơdruă.

 

Rơkơi kâo kơnong juh alum pran jua đô]. Hơdôm hrơi pơdơi le\, glăi djru ană bơnai dơ\ng mơ\ng bruă ]em ană bă truh kơ bruă pưk hmua, djru bơnai soh’’.

 

Kah pơpha tơlơi tơnap tap hăng [ing adơi amai đah kơmơi pơ kual giăm guai dêh ]ar, thun anai, tơhan pơgang guai dêh ]ar tơring ]ar Daknông pok pơhai hơdră bruă gum hrom [ing đah kơmơi [ơi guai dêh ]ar amăng 4 boh să.

 

Kơnong să Dak Wil, tơring glông }ư\ Jut le\ hơmâo djru 40 anung prăk hrăm hră, rơdêh tang rơwang kơ ]ơđai sang hră [un rin, djru ba 8 ]ô adơi amai hơmâo tơlơi ruă kraih, tu\ mă prăk djru mơ\ng anom bruă s^ mơdrô hơmâo 80 klăk prăk, jak iâu [ing adơi amai pơ]ruh prăk blơi 800 blah ao brơi kơ adơi amai tơnap tap, laih dơ\ng ngă tui hơdră rông un lo\n khur, pơkom prăk amăng rup un lo\n pioh djru kơ [ing đah kơmơi [un rin hăng ]ơđai muai tơnap tap.

 

Hăng hơdră mă bruă lăng kơ puih kơđông le\ sang, guai dêh ]ar le\ plơi pla, mơnuih [on sang djop djuai ania le\ adơi ayong sa kian pruăi, ling tơhan 2 boh puih kơđông Nậm Na hăng Dak Ken je\ giăm biă mă hăng mơnuih [on sang să Dak Wil, tơring glông }ư\ Jut.

 

Mơnuih [on sang amăng să ăt mơak hrom hăng tơhan pơgang guai lo\n ua akă grat ia mơtah, hrơi mlam do\ pơgang ba tơlơi rơnuk rơnua kơ dêh ]ar.

 

Dơ\ng mơ\ng tơlơi thâo hluh anun, rơnu] thun hlâo, khua mua să Dak Wil, tơring glông }ư\ Jut hơmâo pơdah rai tơlơi khăp, tơlơi pơpu\ mơ\ng gơ`u amăng bruă pơphun tơlơi pơplông hơduah e\p lăng bruă mă mơ\ng tơhan pơgang guai dêh ]ar, hăng tơlơi pơplông hơmâo 109 bơnah hla hră ]ih pơblang lăi nao bruă mă mơ\ng tơhan pơgang guai dêh ]ar wơ\t rup, đơ đa.

 

Hrom hăng anun, lăi glăi tơlơi tơ`a brơi djơ\ tong ten, pơdah thâo rup rap tơhan pơgang guai dêh ]ar gơgrong kjăp amăng bruă mă.

 

Tơlơi pơplông anai yua kơ Thạc sĩ Nguyễn Thị Thuyến-Kơ-iăng khua jơnum min să Dak Wil pô git gai phun, dưi hơmâo mă pri mrô sa tơring ]ar pơpu\ laih anun pri mrô dua khua git gai tơhan pơgang guai dêh ]ar Việt Nam pơpu\.

 

Anai le\ tơlơi apah bơni yom biă mă [rô djơ\ hrơi hơdor glăi 60 thun hrơi gru grua tơhan pơgang guai dêh ]ar, 30 thun hrơi abih bang mơnuih [on sang gum hrom pơgang guai dêh ]ar.

 

       

Nay Jek: Pô ]ih hăng pôr