Añăm tơpung lĕ añăm ƀong ƀu kơƀah ôh amăng tơlơi hơdip mơda mơng djuai ania Sêdang, sit biă ñu amăng hơdôm hrơi ngui ngor pơprong. Yă Y Num, dŏ amăng ƀuôn Ea Mao, să Tân Tiến (Dak Lak) brơi thâo:

“Hlâo kơ hrơi pơphun buh kông, pơdô̆ rơkơi bơnai brơi ană tơčô, sang anŏ, kơnung djuai, adơi ayong lêng kơ nao gum hrŏm. Đa nao koh phun pơtơi, nao wok rơbung, đa nao trơ̆i tơdŭ huai, nao koh đing djrao….Hlơi hlơi lêng kơ hơmâo bruă soh, laih anun djru hơtuk riă hrŏm. Tơlơi phiăn anai hơmâo mơng rơnuk ơi yă hăng ră anai ăt glăk djă pioh mơn”.

Mơng hơdôm phun kyâo amăng glai rưng hơmâo phun pơtơi, hơđuh phun jơmâo, phun tror jang, phun pơ-ô̆ glai…mơnuih djuai ania Sêdang dưi hơtuk riă jing añăm tơpung ƀong ñu ƀal, mơmih jơman. Yă Y Koh, dŏ amăng ƀuôn Čư Drăng brơi thâo, añăm ƀong anai riă amuñ đôč samơ̆ djă pioh glăi mơng djop rơnuk laih. Sa gô̆ añăm tơpung ƀong ƀu djơ̆ kiăng trơi hlung đôč ôh ăt ngă pơđao pran jua, ia ƀâo mơnâo ba glăi mơng pran khăp hăng pran jua pơlir hơbit.

“Kiăng kơ dưi riă añăm tơpung jơman, ƀing ta kiăng ruah braih ƀâo hiam, tul amăng rơsung kyâo. Lơm anun, neh met wa nao pơ glai ĕp phun pơtơi, lôk hơđuh, tul pơsăn hrŏm hăng bâo phun tror jang, phun bơmâo….Lơm hơmâo djop gơnam, kah pơphun hơtuk riă. Phun pơtơi tul pơsăn arăng dưm nao hlâo, lơm tơsă kah dưm nao tơpung, kuar nao kuar rai kiăng huăi pơkôl, laih dong dưm nao mơnong, akan ƀudah tơlang mơnong tui hluai hor. Tơdah mơnong mơmuă ta kiăng hơna hlâo, kiăng ñu ƀâo hiam, tơdơi anun kah mơng tuh nao ia dong, dưm phun pơtơi glai, rơnuč lĕ tơpung”.

Yă Y Rum, dŏ amăng ƀuôn Čư Drăng, să Tân Tiến (Dak Lak) brơi thâo dong:

“Kiăng añăm tơpung ƀâo hiam tơdơi kơ trăm braih sui hơdôm hơpluh mơnit, ƀing ta anăm ba nao uă hăng măi mơ̆ tul hăng rơsung, riă kah mơng kuyt, ia mơnih, kiăng hơtuk ia hlâo laih anun kah dưm nao mơnong asar ƀudah tơlang mơnong, lơm añăm dok gruk ta pruai tơpung nao amăng gô̆, ngă tui anun añăm tơpung huăi khiă, ƀing jơman”.

Yua hơget añăm tơpung dret pơtơi ĭn mơng djuai ania Sêdang ƀong jơman tui anun ? Yă Y Hrưp, dŏ amăng ƀuôn Kon Wang, să Tân Tiến (Dak Lak) lăi pơthâo:

“Gơnam pioh hơtuk riă mă mơng glai, yua anun hơdjă, huăi hơmâo ia jrao ôh. Ƀing añăm, boh troh mơng glai neh met wa ƀong hơđong pran jua biă. Kiăng djă pioh añăm tam mơtah mơda, tơlơi blung a lĕ anăm phă glai. Lơm pĕ ta pĕ mă hơdôm či kiăng đôč, kiăng phun kyâo mơtah mơda na nao, bơyan tơdơi ƀing ta hơmâo añăm tam hơdjă pioh kơ ƀong dong”.

Ƀu djơ̆ kơnong añăm ƀong rĭm hrơi đôč ôh, añăm tơpung phun pơtơi glai ăt ƀuh amăng hơdôm hrơi sang anŏ hơmâo bruă pơprong, anun lĕ čơkă tuai, buh kông, pơdô̆ rơkơi bơnai, tuh ƀuai, đĭ dŏ sang phrâo…Ơi A Jon, dŏ amăng ƀuôn Čư̆ Drăng, să Tân Tiến (Dak Lak) brơi thâo:

“Amăng hrơi pơdô̆ rơkơi bơnai hrơi anai, ană tơčô, kơnung djuai, amai adơi tum pơƀut glăi. Rĭm čô mơnuih ha tơngan, gum hrŏm hơtuk riă añăm tơpung hăng lu gơnam ƀong pơkŏn dong. Yua anai hrơi mơ-ak, pơdah pran gum pơgôp, ƀing gơmơi gum tơngan hrŏm kiăng hơmâo gơñam ƀong jơman mơng kual Dap kơdư”.

Amăng sang anet kret kruai, dun asăp apui mơng apur, añăm tơpung hơmâo sŏ amăng dơlŭ brơi ƀing tha rơma, ƀing čơđai. Mơnuih amăng sang anŏ klao hok ok or, mut hrŏm hăng añăm ƀong jơman mơng glai rưng. Rĭm dơlŭ añăm tơpung ƀu djơ̆ ngă trơi hlung đôč ôh mơ̆ ăt djă ba pran khăp pap, thâo djru tơdruă hăng gum pơgôp amăng plơi pla./.