Sang anŏ yă Liêng Hot Ka Hiên, djuai ania K’Ho Čil dŏ ƀơi plơi Srê Đăng, să Tân Hội, tơring čar Lâm Đồng hơmâo gru grua thâo pơkra ƀañ mơ̆ng đưm, amăng anun ƀañ kơtor jing mơnong ƀong huă sĭ mơdrô hmư̆ hing anăn gru laih amăng kual. Lơ̆m yă Liêng Hot Ka Hiên tha laih, ñu pơtô brơi tơlơi thâo ngă ƀañ kơtor kơ ƀing adơi amai, ană tơčô amăng sang anŏ, anun yơh lăi ƀañ gru grua sang anŏ pioh glăi.

Amai Liêng Hot Zi Jăk iâu kơ yă Liêng Hot Ka Hiên lĕ neh adơi amĭ. Tơdơi kơ hrăm giong bruă hrăm ngă nai ia jrao, ñu ba yua tơlơi thâo mơ̆ng ñu hơmâo hrăm pioh pơkra mơnong ƀong lăi ƀañ kơtor gru grua sang anŏ ñu, mơnong ƀong jơman hăng đĭ pran. Amai Liêng Hot Zi Jăk brơi thâo:

“Ƀañ kơtor ƀong jơman, đĭ pran sit ƀong tui hluai pơjeh kơtor mơ̆n. Ƀañ jơman hă ƀô̆ arăng pơkra mơ̆ng kơtor điơ̆, ƀing kơhnăk gru đưm juăt ba pla. Laih anun kơtor anun pioh pơkra ƀañ, arăng wŏk kơtor ƀu tha đơi ôh ƀudah kŏn mơda lơi. Kơtor djop tơgơi asar pơprong ƀiă laih, tui anun kah huăi lik ƀudah krô bơbruai, tơdah krô lĕ ƀu ƀlit rơ-un ôh”.

Djuai ania K’Ho ră anai juăt pla pơjeh kơtor điơ̆ kô̆ pioh ngă ƀañ tơpung. Pơjeh kơtor anai ñu rơ-un ƀlit, ƀong jơman, pla boh lu mơ̆n laih anun hrơi blan ñu ƀiă hloh, kơtor tha hnuăl hloh pơkă hăng kơtor kơñĭ. Tui hăng tơlơi thâo tom găn rơgao mơ̆ng mơnuih ƀôn sang, hơdôm boh kơtor djop hrơi blan, arăng nao wŏk mă yơh amăng adai mơguah kiăng kơtor jơman hloh. Kơtor arăng wok ba glăi hlong reh, pơkra pơjing mơnong ƀong, hơtŭk riă ăt dŏ hơnơ̆ng mơnâo ƀâo bơngưi, ia mih jơman mơ̆ng kơtor dŏ hơnơ̆ng. Kơđuh kơtor ăt mă yua mơ̆n, pioh anung ƀañ kơtor. Amai Liêng Hot Za Jăk kah pơpha:

“Tơdơi kơ wok kơtor ba glăi, kơtor ta lôk hĭ, giong anun reh jing tơpung, tơdah kiăng lik mă kơtor reh dưm amăng măi kơ-uă jing tơpung lik ƀhŭk, dưm ƀiă sik hăng ia tơsâo rơmô. Tơdah dưm lu sik ƀudah ia tơsâo rơmô đơi amra ngă rơngiă hĭ ia mih tŭ ñu hơmâo mơ̆ng hơđăp lơ̆m kơtor. Giong anun, mă kơđuh kơtor mơ̆n ta anung ƀañ hăng ba nao kơhul amăng gŏ amăng 2 mông ƀañ kơtor tơsă yơh”.

Ƀañ kơtor amuñ mơ̆n pơkra ming, djop plơi pla, ƀing đah kơmơi K’Ho thâo soh pơkra ƀañ kơtor kơhul. Yua kơ bruă mă gun đơi, kiăng ba kơtor ƀiă anun kơhul ƀong rim hrơi anun lu mơnuih ƀu pơkra mă ôh, khom nao blơi či ƀong. Mơ̆ng anun, ƀañ kơtor kơhul jing hĭ gơnam sĭ mơdrô, mơnong ƀong  bơwih brơi lu mơnuih amăng plơi pla, ƀơi anŏ čih pơthâo amăng plang facebook sĭ arăng blơi. Amai Liêng Hot Rebeca lĕ anăn dra kơčua mơ̆ng yă Liêng Hot Ka Hiên, rơngiao kơ mông pơtô pơ sang hră, ñu ăt glăi pơ sang ngă bruă pơkra ƀañ kơtor gru grua sang anŏ.

“Kâo pô lĕ sa čô nai pơtô hrăm hră, ƀiă mông đôč dŏ pơ sang, samơ̆ kâo ăt hneč mă ƀiă mông pơkra ƀañ. Blung hlâo kiăng pơblih mơnong ƀong huă, ĕp prăk pơhrui glăi kơ sang anŏ, giong anun ba sĭ kơ ană plơi pla amăng kual. Sa tơlơi dơ̆ng yom hloh lĕ gơmơi jing rơnuk ană tơčô khom thâo djă pioh gru grua tơlơi thâo đưm djă pioh bruă mă pơkra ƀañ kơtor gru grua sang anŏ, djuai ania gơmơi”.

Amai Lơmu Liviơ lĕ sa čô tuai juăt blơi ƀañ sang anŏ yă Liêng Hot Ka Hiên lăi:

“Ƀañ kơtor lĕ mơnong ƀong jơman biă mơ̆ng djuai ania gơmơi pơkra ming, djop pô thâo mơ̆n pơkra ming. Samơ̆ pơkra ƀañ kơtor kơhul hăng pioh sĭ lĕ amăng plơi anai kơnong sang anŏ bơn amai Rebeca đôč pơkra. Sang anŏ gơñu pơkra ƀañ jơman hloh, pơhlôm anŏ hơdjă rơgoh, kâo ƀuh mơak biă mă yua amăng plơi hơmâo sang anŏ dŏ djă pioh bruă pơkra ƀañ đưm djuai ania kiăng bruă ngă anai ƀu rơngiă hĭ ôh, dŏ ba glăi prăk kăk kơ sang anŏ dơ̆ng. Kâo pơpŭ biămă ƀing đah kơmơi djuai ania K’Ho hur har hăng thâo pơčeh phrâo djă pioh gru grua đưm djuai ania, amăng anun bruă pơkra ƀañ”.

Ƀañ kơtor kơhul mơ̆ng sang anŏ yă Liêng Hot Ka Hiên pô pơkra ming, sĭ kơ tuai blơi djop plơi pla amăng tơring čar Lâm Đồng. Rơngiao kơ ƀañ pơkra hăng kơtor anai, dưi ba sĭ mơdrô truh pơ gah rơngiao tơring čar. Rim wơ̆t sang anŏ pơkra lĕ 200 anung ƀañ, sa anung 20 rơbâo prăk....Anai lĕ, prăk pơhrui glăi aka ƀu lu ôh samơ̆ djru kơ sang anŏ dưi hơmâo prăk pơhrui glăi lu hloh. Boh nik ñu ta mưn ƀu mơak pran jua hăng pơ-ư ang djă pioh gru grua hiam pơkra ming ƀañ gru grua sang anŏ laih anun pơđĭ kyar tui, pơlar lu hloh bruă ngă anai, kiăng jing bruă ngă gru grua hiam mơ̆ng sang anŏ.