Hăng đok adôh eirei lơlong, hmư̆ ngơngĕ, H’ Ƀliư̆ Hwing ƀu kơnong kơ ƀuh bơngač amăng djop tơlơi ngui ngor ôh mơ̆, biă ñu ngă pơpư̆ pran jua amăng hơdôm hrơi rơngôt. Jua adôh mơ̆ng ñu ngă pơpư̆ pran jua: mơ̆ng tơlơi hning rơngôt kơ mơnuih rơngiă, truh kơ er adôh kơ tơlơi pơkhăp tơpă sit, laih anun tơlơi čang rơmang pơdŏng plơi pla pơdrŏng asah klă hiam. Pô thâo tơlơi đưm H' Ƀliư̆ Hwing lăi pơthâo:

“Dong mơ̆ng đưm, ơi yă ta hmâo djă pioh glăi laih hơdôm er adôh đưm kah hăng adôh eirei, adôh kưt – hơdôm gru grua bôh thâo phara ha jăn hăng anô̆ yôm phăn mơ̆ng djuai ania. Ƀing ta khom pơpŭ hăng djă pioh hơdôm nua yôm pran jua anun, ƀu pioh rơngiă hĭ hơdôm gru hiam hmâo ơi yă pioh glăi kah hăng adôh eirei, adôh kưt, ayup đing năm, đing tut... Adôh eirei juăt adôh amăng hơdôm mông pioh atâo, pioh pyua atâo. Bôh yôm tơlơi adôh ruai glăi tơlơi hơdip pô rơngiă, pơdah pran jua hning rơngôt hăng ruă pran jua dơlăm. Tơlơi adôh tơ-oa đĭ mơ̆ng mlăm ƀơhar kơ dah, ƀu kơnong kơ pioh hơdor ôh mơ̆, pioh lăi đĭ hơdôm tơlơi klă hiam kơ pran jua gơyut, tơlơi khăp, plơi pla, hăng tơlơi čang rơmang pơdŏng plơi pla jai hrơi jai pơđao, pơdrŏng asah, klă hiam”.

 Tơlơi adôh ñu djă jă amăng pran jua H’Ƀliư̆ Hwing. Hăng găn rơgao hơdôm tơlơi pơplih mơ̆ng tơlơi hơdip mơda, ñu hmâo ruah mă amăng rim er adôh, bôh pia tơlơi adôh đưm.

Amăng hơdră plĕ bôh pia mơ̆ng H’ Ƀliư̆ Hwing pơdah črăn đĭ trun klă, kơjăp, čang rơmang sa tơlơi khăp tơpă sit, pơhlôm lơm adôh kơ bôh pia lăi nao tơlơi pơkhăp.          

Adơi H’ Lana Hwing, 12 thun tơčô H’ Ƀliư̆ Hwing, ol pran jua lăi pơthâo: Rim wot adôh eirei, ơi glăi dô̆ ber ayup đing năm. Er adôh tơ-oa hyu ƀơi djop sang. Abih bang sang kâo tum jơngum dô̆ hmư̆. Djơ̆ anô̆ ñu tui anun, kâo ƀuh amăng pran jua pơđao biă. H’ Lana brơi thâo, hơdôm mông anun hmâo djă pioh laih amăng kâo tơlơi khăp hăng tơlơi adôh đưm.

“Kâo hor hmư̆ yă kâo adôh eirei biă. Anai jing sa gru bôh thâo đưm klă hiam gah djuai ania Êđê. Tơdơi anai kâo amra hrăm lu hloh dong pioh thâo hăng djă pioh bôh thâo đưm klă hiam anai. Kâo amra jak dong ƀing gơyut hrăm hrŏm hăng kâo”.

Ayong Y Rowel Hwing, khua ƀôn Tu, să Ea Tul, tơring čar Dak Lak brơi thâo, H’ Ƀliư̆ Hwing lĕ sa gru rơđah amăng plơi pla kơ bruă pơtô glăi, djă pioh gru hiam tơlơi adôh đưm Êđê.

 “Ƀơi ƀôn Tu, H’ Ƀliư̆ Hwing dưi hmâo neh wa kiăng khăp yua kơ đok adôh eirei hmư̆ mơ-ak biă. Ñu ƀu kơnong kơ thâo adôh tơlơi adôh đưm ôh mơ̆, ñu dô̆ jing pô gum hơgôp klă amăng hơdôm bruă mă bôh thâo đưm mơ̆ng plơi pla. Ñu juăt yua tơlơi adôh pioh pơsur pran jua, lăi pơthâo hăng pơkĕ hrŏm hăng neh wa amăng djop tơlơi”.

 Khă thun tha, ƀuk kô̆ laih, samơ̆ amăng mơta ñu ăt dô̆ lăng hor mơn hăng bôh thâo đưm. Ñu dô̆ pơmin sa tơlơi: ngă hiưm hơpă pioh er adôh eirei huăi wor bit amăng tơlơi hơdip rơnuk anai, pioh ană tơčô tơdơi anai ăt dô̆ dưi hmư̆, dưi adôh hăng ư-ang kơ phun akha mơ̆ng pô. Rim wot adôh, ñu ƀu kơnong kơ dô̆ akhan sa tơlơi akhan ôh mơ̆, ñu dô̆ mơ-ĭt pran jua hăng tơlơi djă pioh mơ̆ng hơdôm rơnuk djuai ania Êđê amăng tơlơi adôh, jua đing năm./.