Đĭng tŭt dưi pơkra ming mơ̆ng đing djrao dê, alê pơ-ô, sa djuai đĭng kah hăng gông brô̆ ayup ngui ngă mơak pran jua. Pô pơkra ming rai ñu, khom koh djrao uan hiam, djrao tha ƀiă, tơpă hơmâo amăng, kiăng pơkra ming ayup mơñu klă, jua tai ƀudah djăl hmư̆ mơak pran jua. Sa ring đing tut hơmâo năm ƀĕ ƀudah rơma ƀĕ, anŏ dlông ber ñu phara soh. Hơdră dưm dăp, pơkra ming dlông ber anai kiăng djơ̆ găl jua mơñi kah hăng đing năm. Boh nik ñu rim kơ đing amăng sa ring đing tut anun ñu djơ̆ er hăng čing tơnah, čing kram. Čing tơnah lĕ čing kông yom biă mă, hơmâo bơngăt jua tơlơi pơpŭ, ngă yang rơbang amăng tơlơi hơdip djuai ania Êđê. Mơnuih kơhnăk gru đưm Y Dŭ Êban, juăt iâu Ama Đam, dŏ ƀơi Ƀuôn Sŭt Mđưng, să Quảng Phú, tơring čar Dak Lak lăi, đĭng tŭt lĕ sa črăn amăng tơlơi hơdip mơak, bơngăt jua mơ̆ng djuai ania Êđê sui laih hơmâo truh ră anai:

“Đưm hlâo, gông brô̆, đing ayup đing tut hơmâo laih amăng tơlơi hơdip mơda gru grua djuai ania Êđê. Anai lĕ, sa djuai đing ayup pơkra mơ̆ng đing djrao: arăng trel sa uan djrao laih anun djă pioh atŭt ñu ha bơnah. Đing tŭt kiăng lăi đing atŭt, ba ayup amăng mông hning rơngôt djai brŭ, ƀudah amăng mông ngă yang čuh kơbao, ƀong rơmô. Jua mơñi mơ̆ng đing tut juăt hmư̆ amăng mông djai brŭ ƀudah amăng đang hmua. Boh nik ñu, ƀơi đang hmua, đing tut ăt dưi ayup đĭ amăng mông pơdơi pơdă, djru ngă pơhlai hĭ mông gleh glar tơdơi kơ mă bruă ngă hmua ƀlĕ ia hŏu hang”.

Sa tơlơi yom phara dơ̆ng lĕ, hlâo adih, đing tut ƀing đah kơmơi soh ayup. Lơ̆m ƀing đah kơmơi Êđê pơdơi bruă amăng đang hmua jăng jai, mă đing ayup ngui, ayup hăng ƀuai, djong bluh nao jua sa tơlơi mơñi hmư̆ tui anŏ kiăng. Mơak hơmâo, rơnguă hơmâo, abih bang bluh nao mơ-it amăng đing tut, tơbiă rai jua mơñi por hyu amăng angin rơbŭ, truh amăng glai klô.

Amăng mông hơmâo tơlơi hning rơngôt, luh hla kyâo pơtâo, ta juăt lăi mông djai brŭ hning rơngôt, tơlơi pơƀuh amăng bơngăt jua, pran jua thâo khăp pap, mông anun yơh ƀing đah kơmơi djuai ania Êđê dŏ jum dar bông atâo, tơngan ƀing gơñu djă đing tut, ayup, abih bang khul đah kơmơi dŏ dong ayup, bah đing dtut ưm ƀơi tơƀông, ƀuai gah yŭ, djong bluh nao jua ayup. Jua đing tut anun mơñi hmư̆ tơ-ua hyu kah hăng tơlơi pơhiăp hrup hăng rơhmač kiăng pơčlah hăng mơnuih đuăi nao. Jua mơñi anun hmư̆ rơnang blang, đĭ trun, tai djăl kah hăng jua hnoh ia rô, ba tơlơi hning rơngôt, pơčlah hăng mơnuih djai, laih dơ̆ng kiăng juh alum pran jua sang anŏ hơmâo mơnuih rơngiă. Jua đing tut anun mut tơma amăng pran jua ai hơtai mơnuih hơdip hăng pơmut amăng bơngăt jua mơnuih rơngiă.

Pô kơhnăk gru đưm, ơi Y Dăk Niê juăt iâu ơi H’Ñăm dŏ ƀơi ƀuôn Sŭt Mđưng, să Quảng Phú, tơring čar Dak Lak lăi, jua đing tut hmư̆ rơnguă biă mă:

“Jua mơñi mơ̆ng đing tut yua ƀing đah kơmơi soh ayup. Ƀu kơnong ayup amăng mông djai brŭ đôč ôh, đing tut dŏ tơ-ua hyu amăng mông ngă yang pŭ kpan, sa tơlơi phiăn yom biă mă mơ̆ng djuai ania Êđê. Đưm hlâo ƀing đah rơkơi lĕ ƀu ayup đing tut ôh. Mah amăng mông mơak ƀudah hning rơngôt hai, kơnong ƀing đah kơmơi đôč dưi ayup đing tut. Khă hnun, ră anai arăng pơblih laih mơ̆n, wơ̆t ƀing đah rơkơi dưi yơh ayup đing tut anai”.

Jua mơñi mơ̆ng đing tut kah hăng tơlơi pơhiăp mơ̆ng pran jua amĭ, mơ̆ng ƀing amai, sơ̆n pran jua, bă hăng tơlơi khăp. Ră anai, tơlơi pơmin phara laih, djhul ƀiă mơ̆n, ƀing đah rơkơi hai ăt dưi ayup đing tut laih. Samơ̆ hăng djuai ania Êđê lĕ, ƀing đah kơmơi hăng đing tut djă ƀơi tơngan, ayuh đĭ hăng jua mơñi mut hrŏm asăp apui, ăt jing rup rap hiam juăt ƀuh kah hăng pơtruh brơi jua mơñi gông brô̆, adoh suang hăng bơngăt jua. Mơnuih kơhnăk gru đưm Y Djưng Êban juăt iâu ơi Hañ, dŏ ƀơi Ƀuôn Sŭt Mđưng, să Quảng Phú, tơring čar Dak Lak brơi thâo:

“Kâo hor biă hmư̆ jua đing tut yua kơ jua mơñi mơ̆ng ñu hmư̆ mơak pơhưč pran jua hơtai boh. Hlơi pô ayup rơgơi lĕ jai kraih ta hmư̆ jua mơñi mơak. Hlâo adih, djuai ania Êđê ayup đing tut arăng dưm bah amăng či ayup, ƀơi ƀuai gah gŭ laih anun djong bluh nao jua, samơ̆ ră anai, arăng ayup blom đing tŭ mơ̆n, yua ayup hnun amuñ hloh. Ră anai, hlơi či kiăng, hlơi hor kơ đing tut anai, wơ̆t tuai amăng dêh čar ƀudah mơ̆ng tač rơngiao hai, dưi soh rơkâo blơi, lăi pơthâo hlâo, gơmơi amra pơkra ming hăng sĭ glăi djuai đing tut anai”.

Amăng lu mơta jua mơñi mơ̆ng djuai gông brô̆ ƀơi kual Dap Kơdư, jua đing tut ƀu kơnong tơ-ua hyu kah hăng jua čing đôč ôh, ñu mut tơma amăng pran jua, hơtai boh, ngă mơak, pơhưč pran jua ta hrup jua đing năm, kah hăng tơlơi pơhiăp djong rơhmač ƀơi amăng tơngia mơ̆ng ƀing đah kơmơi djuai ania Êđê pơtruh brơi kơ mơnuih hmư̆. Đing tut ƀu kơnong jing sa djuai gông brô̆, đing ayup đôč ôh, kah hăng tơlơi pơhiăp, jua puăi tlao mơak pơtruh brơi gru grua hiam mơ̆ng đưm đă truh pơ rơnuk phrâo anai ăt dŏ hiam mơak na nao đôč.