Ƀing ta glăk hmư̆ jua mơñi mơ̆ng đing ayup (buôt čhôč) hăng adoh kưt yua ayong Y Đhin Niê (Ama Rin), dŏ ƀơi ƀuôn Triă, să Ea Tul, tơring čar Dak Lăk pô adoh hăng ayup. Ñu jing mơnuih kơhnăk thun hlăk ai đôč - jing mơnuih hui đôč mơ̆ng thâo akhan, thâo pơkra đing ayup djuai ania Êđê. Ayong Y Đhin ră ruai, đing pi ƀu kơnong đing kram đôč ôh, amăng anun hơmâo tơlơi ră ruai kơ gru grua tơlơi hơdip mơda, khŏm kiăng thâo ayup, thâo kơđot hăng thâo hmư̆ yŭ mơñi rơgơi biă. Tơdah rơnuk hlăk ai ƀu hrăm, ƀu djă pioh, jing jua đing ayup, tơlơi adoh kưt, eirei amra rơngiă tui:“Lu mơnuih pơmin pơkra đing ayup amuñ amĕ đôč, samơ̆ ƀu djơ̆ hlơi lêng kơ dưi pơkra, yua dah amăng tơngia ta hmư̆ yŭ jua mơñi djơ̆ kah mơ̆ng mơ-ak. Rơnuk anai, amăng plơi pla, ƀing tha rơngiă tui laih, bơ ƀing hlăk ai dŏ hơjăn kâo yơh thâo pơkra đing ayup anai. Kâo pơtô glăi mơn kơ ană amon pơkra đing ayup, kiăng gru grua mơ̆ng djuai naia huăi rơngiă, huăi wơr rơbit hĭ”.

Gah yŭ sang kyâo glông ƀơi Buôn Phơng, să Ea Tul, tơring čar Dak Lăk, mơnuih kơhnâo Y Khĭm Niê Siêng hơmâo atông, pơpoh rim jua čing, ră ruai kơ ƀing čơđai hmư̆ hrơi jơnum ngui mơ-ak, kơ tơlơi yôm, boh pia mơ̆ng rim jua mơñi. Hăng ñu, rim jua čing jing sa tơlơi pơtă pơtăn gru grua Êđê kơnong dŏ glăi lơ̆m hơmâo pơtô glăi đôč. Ñu bơngơ̆t, ƀu mơ-ak amăng pran jua lơ̆m ƀuh ƀing čơđai jai hrơi ataih mơ̆ng čing, ƀu hor dong tah jua čing, anun ñu pioh abih pran kơ bruă pơtô hrăm atông čing:“Čing jing sa djuai goong brô̆ ƀu dưi kơƀah ôh amăng tơlơi hơdip djuai ania Êđê. Čing juăt hơmâo yua amăng tơlơi ngă yang prong kah hăng huă asơi hle, djai rơngiă (juăt hơmâo hơgor dong), ngă yang phrâo kông, ngă yang hăng kơbao, rơmô, ƀudah amăng hrơi đĭ sang phrâo...Jua čing hơmâo amăng djŏp tơlơi jơnum ngui gru grua, ngă yang mơ̆ng plơi pla. Čing ƀu dưi kah đuăi mơ̆ng tơlơi hơdip mơnuih ƀôn sang. Yua hnun, tơdah ƀing hlăk ai amăng plơi aka ƀu thâo, jing gơmơi lĕ mơnuih nao hlâo khŏm pơtô glăi kiăng ană tơčô huăi wơr gru hiam mơ̆ng ơi yă ta pioh glăi”.

Hăng pran hor pơkra goong brô̆ đưm mơn, mơnuih rơgơi kơhnăk Y Lương Niê (juăt iâu ơi Thun) dŏ pơ Ƀuôn Triă, să Ea Tul, tơring čar Dak Lăk ñu hor kơ đing năm. Mơ̆ng tơlơi yŭ rơngiă hrơi djai rơngiă truh kơ yŭ mơak amăng hrơi ngui ngor, ñu gir pơtô glăi kơ ană tơčô mơn kiăng jua đing năm mơñi bang na nao amăng plơi pla:“Đưm adih, jua đing năm kơnong kơ hơmâo mă yua amăng hrơi djai rơngiă đôč. Bơ rơnuk anai, ñu ăt mơñi bang amăng hrơi jơnum ngui mơ̆ng plơi pla. Kiăng djă pioh gru hiam anai, tơlơi yôm hloh lĕ rơnuk hlăk ai khŏm hrăm hăng tŏ tui”.

Mơ̆ng jua đing pi mơñi tơ-ua rơnang, jua čing dik dak, truh kơ jua đing năm mơñi rơnguă..., ƀing kơhnăk djuai ania Êđê ƀơi Dak Lăk glăk gir kiăng jua goong brô̆ mơñi na nao amăng plơi pla. Gơñu pioh glăi pran jua hor hăng čang rơmang rơnuk hlăk ai thâo khăp, thâo hrăm, thâo djă pioh gru hiam mơ̆ng djuai ania pô./.