Rơđah biă mă ñu lĕ, lơ̆m 9 mông 30 mơnit lơ 29/8, tơdơi kơ mông pơphun jơnum prong adoh suang mơak anăn “Anŏ hiam hloh Lŏn glai prong-Ia rơsĭ mơtah glăi pơtum hrŏm”, pơphun pơnah mlăi apui bơnga ƀơi tơdron lăk Nguyễn Tất Thành, phường Trần Phú, pok brơi lu bruă mă čơkă hrơi mơak prong, kiăng pơdah rai tơlơi ngui ngor, pơhưč pran jua ană plơi hăng ƀing tuai rơnguai mơak.

Kiăo tui dơ̆ng, tlam mơmŏt lơ 2/9, ƀơi tơdron lăk Gum pơgôp prong phường Tây Sơn (Plei Ku), amra pơnah mlăi apui bơnga, pơyiong đĭ dlông mơ̆n lơ̆m 9 mông 30 mơnit či mơmŏt, tơdơi kơ pơđut hĭ jơlan hơdră adoh suang čơkă hrơi akŏ pơdong kơnuk kơna lŏn ia lơ 2/9. Pơnah mlăi apui bơnga, kiăng pơdah thâo ia iom hiam rô̆, kơdrưh ang ba tơlơi čang rơmang pơtum ƀô̆ mơta, pơlar lu tơlơi hiăm, pran jua mơak, pơ-ư ang, lir hơbit amăng plơi pla, lŏn ia ƀrô hơdor glăi hrơi ngă yang jơnum prong kơ lŏn ia.