Lu wơ̆t laih ngă yang brơi kơ arăng, pơjing amĭ, ană mĕm, ƀudah pơjing amĭ, ană rông, ơi Sên dŏ ƀơi ƀôn Tơ̆ng Jŭ, phường Ea Kao, tơring čar brơi thâo: Ngă yang pơjing amĭ, ană mĕm mơ̆ng djuai Êđê, sa tơlơi phiăn hơmâo mơ̆ng đưm laih, ƀuh rơđah gru grua klă amăng tơlơi hơdip, pơtô lăi kơ ană plơi pla hơdor pioh, yua lơ̆m dua čô pơjing amĭ ană mĕm kah hăng ană bă amăng sang anŏ sit nik. Tơlơi ngă yang anun, arăng prăp lui tong ten biă mă hăng ngă tui kơdrưh ang mơ̆n.

“Ngă amĭ, ama mĕm gah djuai ania Êđê blung hlâo lĕ, rơngiao kơ pơtum ƀuh ƀô̆ mơta mơ̆ng kơnung djuai dua bơnah lĕ kiăng hơmâo mơnuih thâo kơđi, tơlơi phiăn đưm pioh pok pơblang brơi hăng ngă rơđah hloh kơ tơlơi pơkôl pơkă ngă ană mĕm kơ sang anŏ ăt kah hăng tơlơi glăm ba, gơgrong hrŏm mơ̆ng dua bơnah tơdơi kơ pơjing amĭ, ama mĕm, ngă tui kah dưi djru kơ dua bơnah rô nao rai sui hăng tong ten”.

Ră anai, tơlơi phiăn ngă adơi ayong, amĭ ama mĕm mơ̆ng djuai ania Êđê ăt dŏ djă pioh đôč. Gơnam pioh ngă yang pơjing amĭ ană, amĭ ama mĕm huăi tơnap lơi, hơmâo á drơi anăn un, bui ta juăt lăi, ha drơi mơnŭ, sa čeh tơpai hăng dua boh kông buh pioh ngă anŏ pơkôl pơkă mơ̆ng dua bơnah pô jing amĭ hăng ană mĕm. Tơdah pô ană mĕm anun sang anŏ tơnap tap, ƀun rin ăt kiăng ngă ană mĕm gơñu ăt pơjing ană mĕm hăng tơlơi khăp pap pơdjru nao rai, kơnong hơmâo sa čeh tơpai jak iâu djop mơnuih dua bơnah kơnung djuai phung wang nao pơƀuh ƀô̆ mơta đôč, huăi tơguan hơmâo bui, mơnŭ čuh ƀong ngă yang ôh.

Lơ̆m Ơi Sên pơ ala kơ kơnung djuai ania pôr “Tơlơi ngă yang ngă amĭ ană mĕm dưi pơphun yơh, hơmâo tơlơi ƀuh ƀô̆ mơta dua bơnah sang anŏ”, pô jing ană mĕm, pơdah rai tơlơi luă gŭ, pơpŭ mơ̆ng pran jua gơñu hăng amĭ amă mĕm. Giong anun, pô ngă ană mĕm jak iâu ƀing neh wa, adơi ayong amăng kơnung djuai.

Tui hăng tơlơi phiăn juăt đưm djuai ania Êđê, mơnuih ngă ană mĕm amra hơmâo tơlơi dưi tŭ yua mơ̆n amăng pran jua mơak hăng ƀiă dram gơnam pơdjru nao rai. Laih dơ̆ng, pô ngă ană mĕm amra hơmâo tơlơi glăm ba hăng amĭ ama mĕm ñu, ƀudah adơi ayong, adơi amai ană bă amĭ mĕm ñu. Bơ amĭ mĕm lĕ khom hơmâo tơlơi glăm ba djru pơtô lăi kah hăng ană bă ñu pô, khăp ƀu-eng hăng đing nao mơ̆n kơ ană mĕm. Pơkơđai glăi lĕ, ană mĕm ñu ăt khom glăm ba bruă mă, tơlơi thâo pơpŭ, wai lăngba amĭ ama mĕm.

Yă Amĭ H’Ươk, dŏ ƀơi ƀôn Tơ̆ng Jŭ, phường Ea Kao, tơring čar Dak Lak brơi thâo:

“Lơ̆m ta tŭ ư ngă ană mĕm lĕ lăng kơ amĭ ama mĕm kah hăng amĭ ama pô tơkeng rai kơ ta mơ̆n. Djop mơta tơlơi mơak ƀudah rơngôt hning, gleh glar tơnap tao amăng tơlơi hơdip mơda, bơlang ba, kah pơpha tơdruă. Amĭ ama dju djuăm duăm ruă lĕ khom nao wai, čuă jơmư trư găn na nao, amăng sang anŏ hơmâo tơlơi hơgĕt thâo khom glăm ba bruă mă, ƀu lui raih klaih čar ôh. Yua kơ anun, dua bơnah ngă amĭ ană mĕm, khom hơmâo pô pơ ala kơ kơnung djuai nao pơhmư̆ hăng pơkôl pơkă, ăt kah hăng pô dŏ ƀơi anăp rôk ruai lăi pơthâo tơlơi pơkôl pơkă ngă amĭ mĕm, kiăng dua bơnah bơtŭ ư hĭ, tơlơi anun yơh yom hloh”.

Tui hăng tơlơi phiăn gru grua đưm djuai ania Êđê, mơnuih tŭ jum ană mĕn lăng kơ ană mĕm kah hăng ană bă sa drah kơtăk, kah hăng amĭ ama kian pruăi yơh, mă bruă khom pơdjru nao rai, lăng ba tơdruă amăng tơnap tap ƀudah hơ̆k mơak hai, dju djuăm duăm ruă lăng ba kah hăng amĭ ama phun, ană bă pô sit nik. Kiăng pơhlom kơ bruă mă djơh hăng anai, kiăng hơmâo pô gơgrong ba mơ̆ng mơnuih ngă pô pơkôl. Ơi Sên phường Ea Kao, tơring čar Dak Lak brơi thâo dơ̆ng:

“Tơdah tơdơi kơ ngă yang pơjing amĭ ană mĕm laih, sa amăng dua bơnah pơpă thâo, ngă soh glăi tơlơi pơkôl pơkă khom glăm ba tơlơi soh anun, duh glăi tơlơi heñ mlâo, ngă hing ang ƀu klă kơnuih kơ pô adih anun, yua kơ pơklaih hĭ tơlơi pơkôl pơkă ngă amĭ ama mĕm, tơlơi pơƀuăn nao rai. Pô ngă gong jơlan pơkôl pơkă yơh pơblang brơi thâo tum teč rơđah rơđong kiăng thâo hluh duh yua hơgĕt, rơngiao kơ tơlơi pơƀuăn nao rai hlơi ngă soh khom duh čuh sa drơi bui brơi kơ abih bang mơnuih ƀuh ƀô̆ mơta mông ngă yang anun, khom hơmâo gơnam pơkŏn dơ̆ng brơi kơ pô ngă gong jơlan kah hăng ƀing gơmơi anai”.

Tơlơi phiăn pơjing amĭ ană mĕm mơ̆ng djuai ania Êđê kah hăng hrĕ tô nao rai, pơlir amăng djuai ania, ngă kơjăp tui tơlơi gum pơgôp plah wah mơnuih phara kơnung djuai ania đôč, jing sa kơnung djuai sang anŏ. Amăng tơlơi hơdip rơnuk anau, mah pô ngă amĭ ama mĕm anun pơphun ngă yang dôl dĕ đôč, ngă djhul ƀiă hơdră akŏ pơjing, samơ̆ tơlơi tŭ yua pơtô hrăm brơi thâo hluh hiam khăp pap, djru nao rai tơdruă amăng plơi pla hăng tơlơi pơlir hơbit amăng kơnung djuai ăt sa tơlơi phiăn hiam kiăng djă pioh laih anun pơđĭ tui, jing sa gru grua hiam khom pơpŭ laih anun djă pioh nao dĭ da gla kơñ.