Pơphun sit nik mơ̆ng lơ 28/8 hăng sui truh lơ 5/9 ƀơi Hà Nội, tal pơdă gơnam gru grua lŏn ia 80 thun jơlan nao truh Rơngai, mơ-ai pô lŏn ia, hyuk hyak mơak klă lăi pơthâo boh tơhnal mơ̆ng lŏn ia ta dưi ngă djop bruă mơ̆ng anai pơ klôn. Ơi Tạ Quang Đông, Kơ-iăng Khua ding jum Gru grua, Pơrơguăt drơi jăn hăng Tuai čuă ngui lăi pơtong:

“Anai lĕ tal pơdă gơnam gru grua mơ̆ ƀing ta pôr pơthâo lu mơta rup rap, ană mơnuih, lŏn ia Việt Nam, hơdôm boh tơhnal mơ̆ng Việt Nam dưi ngă brơi gơyut gơyâo ƀơi lŏn tơnah, hăng mơnuih ƀôn sang amăng dêh čar ƀuh ƀrô hơdor glăi lơ 2/9 thun anai. Anai lĕ jing anih pơtum, sa anih rai ĕp lăng, amra pơhưč lu mơnuih ƀôn sang amăng plơi prong jưh jom hăng tơring čar ieo gah mut ĕp lăng tal pơdă rup hăng gơnam gru grua laih anun anai ăt amra jing boh tơhnal bang bơngač kơ lŏn ia ƀing ta”.

Nao pơdă hrŏm hơmâo 34 čơgăn gơnam lăp đing nao, hơmâo djă ba anŏ hiam phara mơ̆ng 34 boh tơring čar, ƀôn prong hăng djop ding jum, anom bruă ƀơi gơnong dlông. Sa amăng hơdôm anih kiăng lăi nao jă đôm glăi tal pơdă rup, gơnam gru grua anai, jing anih pioh kơ bruă ling tơhan, phao kơtuang, kiăng pơƀuh brơi tơlơi kơtang mơ̆ng ling tơhan mơnuih ƀôn sang Việt Nam. Thiếu tướng, ơi Tống Văn Thanh, Kơ-iăng khua anom pơtô bruă ping gah ling tơhan, gah anom bruă phun kơđi čar ling tơhan mơnuih ƀôn sang Việt Nam pôr tơlơi pơhing:

“Ƀơi anai, ƀing gơmơi ba yua boh thâo ia rơgơi kiăng pơdă prưng, lăi pơthâo gru grua hăng tơlơi phrâo ia rơgơi rơnuk anai, biă mă ñu ăt dưm lu anŏ pơdah pơthâo bruă găn rơgao pioh kơ ƀing tuai hyu ĕp lăng, anih găn rơgao anai pơhưč pran jua mơak. Dua lĕ pơphun ba pơdă gah rơngiao sang hăng anăn  “Đao gưm hăng hla Khiơl pơgăn”- ƀơi anih anom pơdă prong rơhiah truh 2 hektar. Pơ anai lĕ, ƀing gơmơi dưm pơdă lu gơnam yua gah ling tơhan, djop mơta phao kơtuang, gơnam yua ia rơgơi phrâo mơ̆ng djop anom bruă tơhan, sang bruă mơdrô gah ling tơhan kơsem min hăng pơkra ming”.

Ƀơi anih anom čih tơlơi pơhing kơ tal pơdă gơnam gru grua anai “Boh tơhnal tŭ yua mơ̆ng lŏn ia 80 thun nao hrŏm jơlan pơklaih rơngai, mơai pô lŏn ia, hyuk hyak mơak klă”, ơi Lê Hải Bình, Kơ-iăng khua ding jum Gru grua, Pơrơguăt drơi jăn hăng Tuai čuă ngui brơi thâo:

“Anih anom čih pôr tơlơi pơhing lĕ anih bơwih brơi klă hloh pioh ƀing čih tơlơi pơhing mă bruă amăng dêh čar hăng tač rơngiao, ăt kah hăng pơsir djop mơta tơlơi či kiăng amăng bruă čih tơlơi pơhing. Hăng tơhnal pơkă tui anun, ƀing gơmơi amra ngă gêh găl brơi ƀing čih tơlơi pơhing amăng dêh čar hăng mơ̆ng tač rơngiao pôr pơthâo tơlơi pơhing tal pơdă prưng gơnam gru grua dêh čar, ăt kah hăng ngă gêh găl kơ ƀing čih tơlơi pơhing tŭ mă tơlơi pơhing tañ hloh mơ̆ng djop bruă mă tal pơdă gơnam gru grua anai”.

Pơ anai ăt pơphun lu jơlan hơdră adoh suang, jơnum pơčrong sai, bơkơtuai nao rai hyu hơduah ĕp lu mơta anŏ kiăng thâo. Tal pơdă gơnam gru grua anai ƀu kơnong bruă mă kơđi čar, gru grua yom đôč ôh dŏ djru ngă bang tui tơlơi khăp pran jua mơ̆ng djuai ania, râo pơdưh tơlơi kiăng prong, man pơdong lŏn ia kơjăp kơtang hloh. Anai lĕ, anŏ kơđŏm prong prin hloh amăng hơdôm bruă mă čơkă mơak Hơkrŭ blan čơpăn hăng Hrơi akŏ pơdong kơnuk kơna lŏn ia lơ 2/9.