Mông jơnum yua kơ anom bruă kơsem min glai klô kyâo pơtâo (tropenbos) pơphun, hơmâo lu mơnuih rơgơi kơhnâo, mơnuih kơsem min djop gơnong bruă hăng khul ngă bruă čơkă tuai hyu ngui amăng glai ƀơi tơring čar. 4 khul nao jơnum pơčrong sai lăi pơthâo, bruă kiăng ngă lir hơbit rŭ glăi rưng kyâo glai klô hăng pơtrut tuai čuă ngui hyu ĕp lăng amăng glai djơ̆ găl mơak klă.

Ƀing khua mua, mơnuih rơgơi kơhnâo, kơsem min djru kơ bruă wai pơgang pioh glai rưng kyâo pơtâo hăng pơsir bruă mă bơwih ƀong huă kơ mơnuih ƀôn sang dŏ giăm glai rưng, biă mă ñu mơnuih ƀôn sang djuai ƀiă. Tơring čar Dak Lak lĕ, hơmâo ơi Nguyễn Sơn Hưng, Khua anom wai lăng bruă tuai čuă ngui, Gơnong bruă Gru grua Boh thâo pơrơguăt drơi jăn hăng Tuai čuă ngui tơring čar Dak Lak, pơblang tong ten tơlơi pơhing ngă bruă ba tuai hyu ngui amăng glai, hơmâo anŏ gêh găl hăng tơnap tap rŭ glăi glai rưng, samơ̆ Dak Lak hơmâo akŏ bruă phrâo kiăng ngă tui bruă anai tŭ yua hloh.