Sang yă Xong dŏ pơ tong krah plơi Kon Wang, să Tân Tiến (Dak Lăk), leng kơ mơñi pơklek pơklok jua không prư̆ rơngaih mai. Yă Xong rơbêh 60 thun laih, rim hrơi ăt dŏ ƀơi không mrai soh, tơngan ñu ơ oet rơguăt biă mă yong đĭ yong trun prư̆, pô̆ mrai, mơñam eng ao hăng ia iŏm gru bơnga hiam phara. Yă Xong brơi thâo:“Kâo thâo mơñam yua amĭ kâo pơtô brơi. Đưm adih, hrăm mơñam mrai rah, nao pơ hmua rah, kiăng hơmâo gơnam hơmâo prăk čem sang anŏ. Tơdơi kơ amĭ kâo djai, kâo gir kơtang biă mă. Lơ̆m dŏ rơkơi, ƀrô rông ană bă rah, ƀrô jik bruă ngă hmua rah, kâo hrăm mă dong bruă mơñam, mơ̆ng abăn mơsum truh kơ eng ao. Truh kơ ană bă prong baih, kâo hơmâo wan laih či mơñam lu hloh, pioh yua amăng sang anŏ wơ̆t hăng ba sĭ pơ ană plơi dong”.

Mơ̆ng không mơñam mrai anun, yă Xong ƀu kơnong hơmâo thim prăk đôč ôh ăt pơtô glăi kơ ană tơčô hăng ană plơi dong kiăng djă pioh tŏ tui gru grua hiam mơ̆ng djuai ania. Ră anai, ƀơi să Tân Tiến (Dak Lăk) hơmâo akŏ pơdong sa grup mơñam mrai hơmâo 7 čô, hăng lu hnưr thun phara. Amai Phân, tơčô yă Xong lăi:“Năng blung a kâo hrăm mơ̆ng amĭ, kâo hrăm tui mơ̆ng neh dong. Neh pơtô brơi kâo rơngaih, pơhrua mrai, jruk bơnga. Bơ hơne kâo thâo mơñam rơguăt laih abăn ƀă čơđai, abăn mơsum. Neh kâo rơgơi biă pơhrua ia iŏm mrai kiăng hiam, gru đưm hai hiam mơn. Kâo hăng amai kâo pơpŭ biă kơ ñu, kiăng ñu pơtô brơi gơmơi lu hloh. Bơni kơ neh hơmâo djă lui bruă hiam anai. Gơmơi jing rơnuk hlăk ai amra tŏ tui, djă lui, ƀu ngă rơngiă ôh gru hiam anai”.

Eng ao mơñam yua grup mơñam mrai pơ să Tân Tiến pơkra rai hơmâo lu mơnuih amuaih blơi. Phrâo anai, hơmâo sa anih tơčoh eng ao ƀơi Buôn Ma Thuột, tơring čar Dak Lăk mơ-it kơ yă Xong 7 kơthung mrai, kiăng mơñam ao djuai ania Sêdang pioh sĭ hăng brơi arăng apah mă buh jăng jai.

Eng ao djuai ania Sêdang juăt hơmâo 3 ia iŏm mă yua lu hloh anun lĕ kô̆, jŭ hăng mơta mơnŭ. Eng ao hơmâo mrai kô̆ lu lĕ juăt buh amăng hrơi ngui ngor, pơƀuh tơlơi mơ-ak, kiăng kơ hiam. Bơ eng ao jŭ lĕ pơ ala kơ lŏn, adai. Gru bơnga ñu pơ ala kơ tơlơi gum pơgôp, tơlơi pơgang ba mơ̆ng plơi pla. Eng ao hơmâo lu mrai mơta mơnŭ lĕ ñu pơƀuh brơi tơlơi hơmâo pran, pơplih phrâo, lăp djơ̆ hăng eng ao buh či ngui hăng adoh suang...

Amai Phan, sa čô mơnuih dŏ pơ ƀuôn Ea Mao, să Tân Tiến lăi:“Djŏp hrơi ngă yang ngui ngor pơpă thơ amăng plơi, hlơi hlơi leng kơ buh eng ao djuai ania Sêdang soh. Buh ta lăng kơdrưh biă mă. Ơi yăta pioh glăi, bơ rơnuk anai hơmâo mơnuih thâo rơgơi kah hăng Yă Nhân, Yă Nhoa pioh glăi, pơtô brơi, anun jing ană tơčô jai pơpŭ kơtang hloh, kiăng buh eng ao mơ̆ng djuai ania pô. Eng ao mơñam ñu hiam hăng kjăp biă”.

Hăng tơlơi khăp, tơlơi gir, yă Xong hơmâo ngă hăng glăk ngă dong mơn bruă djă pioh pran jua hor kơ eng ao mơñam mơ̆ng djuai ania Sêdang. Mơ̆ng tơngan ñu hăng adơi amai, neh wa amăng să Tân Tiến, hơdôm blah eng ao hiam rŏ anai amra tui tơkai ană tơčô mô yao amăng tơlơi hơdip rơnuk anai./.