“Ơ yang! Hrơi anai sang anŏ gơmơi pơphun ngă yang, rơkâo yang rơbang brơi bơngăt ană tơčô glăi pơ drơi jăn ñu pô, pơwŏt glăi pơ sang anŏ. Yua lơm rơbat hyu rôk jơlan, ñu hơneč rơbuh, ngă bơngăt pơčlah hăng drơi jăn pô glăk pơpă aka ƀu thâo. Sang anŏ pơyơr đĭ mơnŭ, tơpai čeh, rơkâo yang rơbang trun rai lăng, črâo jơlan brơi bơngăt tañ glăi, mut amăng drơi jăn pô kiăng kơ ñu suaih pral, rơnuk rơnua. Ơ bơngăt! anăm hưp ham gơnam kông ngăn sang arăng, yua amăng sang anŏ pô ăt hơmâo laih. Tañ tañ glăi pơ drơi jăn pô, kiăng drơi jăn hăng bơngăt mut hrŏm jing sa”.

Anai lĕ tơlơi ngă yang mơng tha plơi-Mơnuih kơhnâo kơhnăk Ksor Lol (arăng juăt iâu lĕ Ơi Sơ) ƀơi sang amĭ H’Guan plơi Rbai, să Phú Thiện, tơring čar Gia Lai. Tơlơi ngă yang anai kiăng lăi pơthâo mông ngă yang, anun lĕ amai H’Guan lơm rơbat rôk jơlan, hơneč rơbuh, bơngăt glăk dŏ hơpă aka ƀu thâo, yua anun sang anŏ pơyơr đĭ mơnŭ, tơpai čeh, rơkâo yang trun lăng, črâo brơi jơlan kiăng bơngăt tañ tañ pơwŏt glăi.

Mông ngă yang hơmâo pơphun amăng sang Jarai, hăng gơnam pơyơr đĭ hơmâo 2 čeh tơpai, sa drơi mơnŭ, 2 boh hơbơi tuk hơmâo pơdă amăng hơ-i kơ-čua, arăng tap hrŏm hla pơtơi; hrŏm hăng anun lĕ ao sô kơ H’Guan juăt buh lơm bưp tơlơi truh sat. Pô ngă yang lĕ tha plơi Ksor Lol tuh ia amăng čeh tơpai rah phai yang rah. Lơm čeh tơpai bă, tha plơi gai tơpai brơi H’Guan mơñum. Tơdơi kơ mơñum abih ha kang, H’Guan kar hăng pơtrut kơtang amăng pran jua, hăng đăo gơnang bơngăt jua pô pơwŏt glăi laih.

“Hrơi anai, sang anŏ pơphun ngă yang kiăng iâu bơngăt glăi pơ drơi jăn pô, glăi pơ sang anŏ, laih dong čang rơmang kâo pô amra bĕ hĭ hơdôm tơlơi sat, bưp lu tơlơi tơpă hăng hơdip rơnuk rơnua mơ-ak”.

Mông ngă yang iâu bơngăt brơi H’Guan hơmâo tơlơi mut hrŏm mơng amĭ ama hăng ayong amai adơi amăng sang anŏ. Tŏ tui tơlơi ngă yang mơng tha plơi, yă Amĭ H’Guan ăt iâu lăi tui kiăng kơ čơkă bơngăt ană ñu pơwŏt glăi. Amĭ H’Guan brơi thâo, tơdơi kơ ană đah kơmơi rơbuh rơdêh, ƀuh ñu ƀu mơ-ak ôh, pơhiăp ƀiă, amăng drơi jăn ƀu hơ-et ôh. Tui mơnuih djuai ania Jarai, anai lĕ yua bơngăt wơr hĭ drơi jăn pô, yua anun sang anŏ pơphun ngă yang tui tơlơi phiăn kiăng ană ñu hơđong pran jua hơdip mơ-ak.

“Sang anŏ pơphun ngă yang iâu bơngăt brơi kơ ană. Yua phrâo anai ñu rơbuh rơdêh, tui tơlơi phiăn khŏm ngă yang kiăng pơkiăo đuăi tơlơi sat hăng iâu bơngăt glăi, hŭi bơngăt glăk dŏ hơpă aka ƀu pơwŏt glăi pơ drơi jăn pô. Ƀing gơmơi jak iâu pơjâo rai ngă yang, čang rơmang bơngăt tañ glăi pơ drơi jăn pô, kiăng ñu suaih pral, rơnuk rơnua".

Ơi Nay Wih (Amai H’Guan) brơi thâo, ngă yang iâu bơngăt lĕ tơlơi phiăn mơng djuai ania Jarai sui mơng đưm hlâo laih. Hrơi ngă yang pơphun anet ƀudah prong ăt tui hluai pô anun bưp tơlơi truh sat hơget. Tơdah rơbuh rơka rơnang, sang anŏ juăt pơphun ngă yang anet đôč hăng sa drơi mơnŭ hăng sa čeh tơpai. Samơ̆ lơm mơnuih amăng sang anŏ bưp tơlơi truh sat kơtang ƀiă, amra ngă yang prong ƀiă, hơmâo sa drơi bê hăng sa drơi un. Bê arăng ba nao pơ ia krông ngă yang, kiăng pơkiăo đuăi tơlơi sat răm; bơ un hrŏm hăng čeh tơpai amra ngă yang pơ sang kiăng rơkâo tơlơi suaih prak, rơnuk rơnua brơi kơ mơnuih bưp tơlơi truh sat.

“Hrơi ngă yang iâu bơngăt pơphun kiăng iâu bơngăt glăi pơ drơi jăn pô, pơwŏt glăi pơ sang anŏ. Tơlơi ngă yang anai hơmâo mơng đưm đă ră hlâo, hơmâo djă pioh glăi truh ră anai. Tui tơlơi phiăn, lơm hlơi rơbuh rơdêh ƀudah bưp tơlơi truh sat, sang anŏ amra ngă yang iâu bơngăt kiăng iâu glăi bơngăt glăk wơr drơi jăn pô, tañ tañ pơwŏt glăi. Anai lĕ gru grua yôm phara hơmâo djă pioh mơng rơnuk anai truh rơnuk adih”.

Hrơi ngă yang iâu bơngăt mơng djuai ania Jarai lĕ tơlơi ngă yang kiăng “iâu bơngăt” pơwŏt glăi pơ drơi jăn pô, juh alum pran jua mơnuih bưp tơlơi sat. Rĭm tơlơi ngă yang, rĭm gơnam pơyơr đĭ lêng pơdah pran đăo gơnang nao tơlơi pơlir hơbit kơplah wah bơngăt hăng drơi jăn, kơplah wah sang anŏ hăng yang rơbang, ană mơnuih hăng ayuh hyiăng lŏn mơnai.

Ră anai, hrŏm hăng bruă ba mơnuih bưp tơlơi truh sat nao pơjrao pơ sang ia jrao, tơdơi anun mơnuih djuai ania Jarai ƀơi Phú Thiện, tơring čar Gia Lai, ăt pơphun ngă yang tui anai kar hăng tơlơi đăo gơnang amăng pran jua kiăng rĭm čô mơnuih kjăp pran jua ƀơi anăp hơdôm tơlơi lông amăng tơlơi hơdip mơda./.