Sit hơmâo mơnuih djai brŭ amăng plơi pla, tha plơi nao pơ sang hơmâo mơnuih djai taih hơgor hmơ̆r čêng lăi pơthâo tơlơi pơhing mơnuih rơngiă, sang anŏ hơmâo mơnuih tơ̆i pran laih anun pơčrong sai pơphun mơyut jôk kơ pô djai. Lơ̆m hmư̆ hing, djop mơnuih amăng plơi, ƀu tơguan bơlăi nao rai tah, abih bang rong či nao djru ba, mơnuih pơdong rơnưh, pô tơnă asơi hơbai añăm, đơ đa prăp lui ring čêng, đơ đa hyu râ̆o pơthâo brơi phung wang plơi ataih. Ơi Rưm, 50 thun dŏ ƀơi plơi Kơtu, să Kông Čêng, tơring čar Gia Lai brơi thâo:

  “Tơlơi djai brŭ amăng plơi pla, gơmơi ƀuh ană plơi pla nao mơyut jôk lu jơngum biă mă. Neh met wa atông čêng, ayun suang mơ̆ng mlam blung a truh pơ hrơi tơdơi, hrơi nao pơyua atâo, kiăng juh alum sang anŏ hơmâo mơnuih djai...Adơi ayong phung wang añang kor lĕ pơčruh prăk kăk, braih akuăi, sa, dua boh sang blơi hrŏm sa drơi bui čuh ngă añăm djru kơ sang anŏ mơnuih djai”.

Ăt kah hăng djuai ania pơkŏn mơ̆n, hăng djuai ania Bahnar, tơlơi djai brŭ jing sa tơlơi yom, bruă prong amăng plơi, ƀu kơnong kơ sang anŏ pô djai đôč ôh, anun yơh djop mơnuih iâu nao pơdjru ba soh, sit hmư̆ hing, arăng nao djru mơtam. Ơi Đinh Pơr, 58 thun, plơi Pông, să Čư̆ A Thai, tơring čar Gia Lai brơi thâo:

 “Ƀơi plơi gơmơi sit hơmâo mơnuih djai, abih plơi pla nao jôk mơyut, djă ba ring čeng atông krong mơta ha mlam. Djop pô pơdjru ba soh kơ sang anŏ hơmâo mơnuih djai. Ƀu hơmâo hlơi hyu bruă ngă hmua ôh hrơi anun. Tơl nao pơyua atâo giong, pơdong pơsat giong ƀhiao kah, arăng mơ̆ng pơwơ̆t glăi pưk hmua ia djuh, mă bruă kơ sang anŏ tơlơi hơdip mơda pô”.

Amăng hơdôm hrơi hơmâo mơnuih djai brŭ, sang anŏ hning rơngôt anun hơmâo lu mơnuih găn rơgao nao rai, mă bruă. Arăng nau jôk, mơyut, juh alum tơhrơi. Amăng mlam, ƀing atông čêng, ayun suang amăng plơi pla, lu khul, grup pơblih nao rai atông ha mlam ƀu pit ôh. Ƀing sang anŏ ieo gah djă ba añuai, abăn nao đih đŏm hrŏm sang anŏ mơnuih djai. ƀing tha rơma dŏ mơdang apui bơ ră ruai; gơñu ră ruai bruă mă hiam klă ƀudah lok glăi bruă mă hăng hning rơngôt tui kơ pô djai.

 Bruă čuh rơmô kơbao blŭn tui pô djai tui hluai pô sang thâo hơmâo, arăng čuh lu ƀudah ƀiă, čuh rơmô kơbao ƀong kiăng pơtui kơ mơnuih djai ƀudah hơdor tơngia kơ phung wang, ană plơi pla nao djru mă bruă, jôk mơyut krong mơta hăng sang anŏ. Ơi Đinh Brơi, 67 thun, tha plơi Čưp, să Lơpang, tơring čar Gia Lai lăi pơtong, tơlơi  arăng pơpŭ glăi amăng mông djai brŭ mơ̆ng djuai ania Bahnar lĕ sa tơlơi thâo gum pơgôp amăng plơi pla. Tơdah sang anŏ pô djai tơnap tap, ƀun rin lĕ, ană plơi hyu ring braih pơdai, blơi bui, mơnŭ, čeh tơpai đưm hlâo. ƀing đah kơmơi nao jôk djă ba braih akuăi brơi kơ pô sang.

  “Sit tơlơi djai brŭ truh pơ pô hlơi, ƀing ta lêng hning rơngôt tui soh, biă mă ñu mơnuih amăng sang anŏ, pô mă bruă, dŏ hrŏm rim hrơi, amăng plơi pla. Yua kơ anun, sit hơmâo mơnuih djai arăng čuh bui, rơmô kiăng  čuh ƀong, blŭn tui pô djai hăng tơnă asơi hơbai añăm kơ ană plơi pla, phung wang, tuai rơnguai mơ̆ng ataih nao jôk”.

Ră anai, lu tơlơi ngă yang mơ̆ng djuai ania Bahnar arăng lui hĭ ƀiă yơh, hơdôm tơlơi phiăn juăt ƀu klă, rơngiă lu prăk kăk kông ngăn, kơnong djă pioh glăi tơlơi phiăn hiam klă, bruă hiam mơak amăng rơnuk phrâo samơ̆ tơlơi gum pơgôp djuai, gum tơngan hrŏm djru tơdruă amăng plơi pla ăt dŏ djă pioh đôč.