Hơdôm hrơi anai, lơm sầu riêng, măng cụt, bôh jrang tơsă ƀơi đang, Khánh Sơn jing kual čư̆ siăng gah Yŭ tơring čar Khánh Hòa glăk dik dăk čơkă tuai. Rim grŭp mơnuih hơduah ĕp nao pơ̆ Khánh Sơn pioh čơkă mă ayuh hyiăng rơ-ơ̆, ƀong bôh troh ƀơi đang hăng pơdơi pơdă ƀơi anih rơ-ơ̆ anai. Tuai ƀu kơnong kơ ƀong bôh troh ôh mơ̆, dô̆ dưi lông lăng bruă pơkra asơi hrong, pơđăm pô amăng čroh ia Tà Gụ jơngeh ƀrač, ƀudah găn rơgao jơlan Tà Giang bă kơ dơnăm gôm. Hơdôm homestay ƀơi kơtuai rŏng kơdư, jua čing, jua gông bôh pơtâo tơtar hyu amăng mlăm krom apui jơnum ngui, ba tuai pơwot glăi hăng glai klô đưm hơđăp hăng tơlơi hơdip mơda hơđăp ƀơi anai bă kơ gru grua. Ayong Nguyễn Thế Cường, mơ̆ng să Như Quỳnh, tơring čar Hưng Yên tal blung a nao pơ̆ Khánh Sơn lăi pơthâo:

“Rai pơ̆ anai ƀuh mơ-ak lĕ hyuh hyiăng rơ-ơ̆. Yang hrơi dŏng pơ-iă samơ̆ ƀu hơ-uh ôh, truh čơtlăm lĕ hyom rơ-ơ̆ biă. Ƀơi anai, ayuh hyiăng klă hiam, ƀu hmâo asăp ƀui sang măi. Bôh troh lĕ rơgêh, jơman, biă ñu bôh sầu riêng, nua rơgêh hloh lu biă bơhmu hăng pơ̆ Hà Nội, rơkơi bơnai kâo blơi ba glăi ƀong ƀuh mih biă!”.

 Ƀu kơnong kơ Khánh Sơn ôh, lu kual čư̆ siăng mơ̆ng Khánh Hòa ăt glăk pơđĭ kyar bruă tuai čuă ngui plơi pla tui jơlan gah kơjăp phik. Ƀơi kual lŏn tơring glông Khánh Vĩnh (hơđăp), mơnuih ƀôn sang hmâo pơphun  hơdôm tour hyu hơduah ĕp lăng drai ia Yang Bay, glai Giang Ly, hyu hơduah ĕp bôh thâo đưm Raglay, pơkra gơnam mơ̆ng rok kyâo, rơngaih băn ao. Hơdôm tơlơi lông lăng anet samơ̆ tơpă sit, ƀuh jê̆ giăm hăng tuai biă. Pơđĭ kyar bruă đang hmua nao hrŏm hăng pơgang glai klô; pơđĭ kyar hơdôm hơdră tuai čuă ngui plơi pla nao hrŏm hăng pơgang bôh thâo đưm djuai ania ƀiă lĕ hơdôm jơlan nao glăk dưi hmâo Ping gah hơdôm bôh să kual čư̆ siăng ba mut amăng hră čih tơlơi lăi pơthâo glăi bruă kơđi čar jơnum ping gah tal I. Yă Cao Thị Ngọc Thanh, Khua Jơnum min mơnuih ƀôn sang să Trung Khánh Vĩnh brơi thâo, rơwang bruă pơ̆ anăp amra đing nao pơsir bruă mă kơ neh wa, amra đing nao pơtô pơhrăm bruă mă nao hrŏm hăng djru hơdôm hơdră bơwih ƀong huă kah hăng rông hlô, sĭ blơi gơnam tam, hăng biă ñu pơlar bruă tuai čuă ngui plơi pla nao hrŏm hăng bôh thâo đưm plơi pla:

 “Să anăp nao truh bruă djru na nao neh wa djuai ania ƀiă kơjăp phik. Ră anai hmâo hơdră pơđĭ kyar bruă tuai čuă lăng plơi pla nao hrŏm hăng pơgang gru grua bôh thâo đưm pơđĭ kyar bruă đang hmua kơjăp phik. Anai ăt lĕ jơnum bơwih ƀong pioh pơplih hơdră bơwih ƀong sang anô̆, tơhnal ba tơbiă djru neh wa djuai ania ƀiă tơtlaih mơ̆ng ƀun rin kơjăp sui thun”.

Kiăng tuai čuă ngui plơi pla kual čư̆ siăng sit nik “hơdjă” hăng kơjăp phik, khom pơphun mơ̆ng hơdră ngă đang hmua – mă yua klă hiam hăng lŏn mơnai ayuh hyiăng. Hơdôm anih anom ƀơi kual čư̆ siăng tơring čar Khánh Hòa pơtô brơi kơ mơnuih ƀôn sang pla phun bôh troh tui jơlan gah hơdjă, plai ƀiă mă yua ia jrao, hrŏm hăng anun pơsur kah pơpha djah ƀơi đang hmua, ƀu mă yua kơdung ni-lông. Kơ-iăng nai tha prin, Nai prin tha Lê Chí Công, Khua Anom pơtô bruă tuai čuă ngui – Sang hră gưl dlông Nha Trang lăng ƀuh: Hơdôm hơdră tuai čuă ngui plơi pla tui jơlan gah kơjăp phik dưi pơdŏng, pơkă kual anih pơdơi tơkai, pơdah glăi bôh thâo đưm ƀơi anai pioh djă kŏng tơkai tuai čuă ngui.

 “Pơđĭ kyar anih anom tuai čuă ngui hơdjă, gơnam hơdjă. Anai jing bôh than pơjing sa gơnam anih anom tuai čuă lăng kơjăp. Kiăng ngă bruă tuai čuă ngui hơdjă khom pơjing rai gơnam tam hơdjă, plơi pla ăt khom thâo tơlơi hơdjă, mơ̆ng hơdư̆ mă yua kơdung ni-long kơ su truh hrŏ trun đut hlah jrao pơgang phun pla. Anun lĕ hơdôm bruă ngă rơđah pioh pơjing hơdră đang hmua hơdjă, anăp nao gơnam anih anom tuai čuă lăng klă hiam hăng anih anom jum dar”.

Tơdơi kơ pơmut hrŏm tơring čar Khánh Hòa hăng Ninh Thuận, tơring čar Khánh Hòa phrâo hmâo tơlơi pơđĭ kyar tuai čuă ngui plơi pla dưi pok prong. Tơlơi pơkĕ hrŏm kơplah wah hơdôm anih anom kual čư̆ siăng kah hăng Khánh Sơn – Bác Ái pơjing hơdôm anih anom nao phara ha jăn, djă jă gru pơđom pioh plơi pla. Mơ̆ng hơdôm đang sầu riêng ƀơi Khánh Sơn, tuai čuă ngui amra anăp glăi Bác Ái pioh pơmut pô amăng bôh thâo đưm djuai ania Čăm, weh nao čuă plơi pơkra gŏ lŏn Bàu Trúc, plơi mơñam băn ao Mỹ Nghiệp ƀudah lông lăng pĕ bôh ƀâo, pĕ bôh jơmăn ƀơi Ninh Hải, čơphin rup hăng pŭ triu ƀơi đang rok mơtah pơ̆ Ninh Phước. Anai ƀu kơnong kơ hơdôm anih anom nao čuă ngui ôh mơ̆ ñu dô̆ jing gru kơ hơdră djă pioh glai klô hăng bôh thâo đưm amăng jơlan pơđĭ kyar. Ơi Lê Văn Hoa, Kơ-iăng Khua Gơnong bruă bôh thâo đưm – Bơkơjăp drơi jăn hăng Tuai čuă ngui tơring čar Khánh Hòa pơsit:

“Khom pơtrut kơtang bruă lăi pơhing, lăi pơhưč, lăi pơthâo nua bôh thâo đưm djuai ania nao hrŏm hăng pơlar tuai čuă ngui. Tơdah tô nao rai kơplah wah Khánh Sơn hăng Bác Ái pioh gum hrŏm pơphun dong lu bruă mă. Ta ăt dưi hrăm tui Ninh Thuận (hơđăp), gơñu ngă klă biă bruă tô nao rai gơnam mă mơ̆ng đang hmua hăng tuai čuă ngui hăng bôh thâo đưm djuai ania. Hluai tui hơdră ngă anun, pô amra bang hyu hơdră pơ̆ hơdôm kual neh wa djuai ania ƀiă, kual čư̆ siăng pơkon amăng tơring čar Khánh Hòa phrâo”.

Tuai čuă ngui hơdjă ƀơi kual čư̆ siăng Khánh Hòa glăk jing jơlan hơdip kơ mơnuih ƀôn sang jing anih anom tô nao rai kơplah wah pơgang bôh thâo đưm, pơgang glai klô, pơđĭ kyar bơwih ƀong. Anun ăt lĕ hơdră pioh hơdôm kual lŏn čư̆ siăng Dơnung Tŏng Krah dêh čar hrưn đĭ pô amăng bruă tuai čuă ngui prong, hăng tơlơi phara ha jăn mơ̆ng pô, gru grua bôh thâo đưm hăng pran jua thâo tŭ jum tuai./.