Amăng tal hyu ngui ƀơi plơi mơñam kiao hăng rơ̆k Kơtu ( Kơtung) Phú Tân, să Ô Loan, tơring čar Dak Lak, yă Nguyễn Huỳnh Phương, tuai mơ̆ng ƀôn prong Cần Thơ, tal blung a ñu ngă bruă nao  trơ̆i, yuă rơ̆k Tu, ba ƀhu, tram ia mô, laih anun dŏ mơñam hrŏm giong jing sa blah kiao (añuai). Yă Phương lăi, rim črăn bruă lêng kơ gleh tơnap soh, lu mơta bruă či ngă mơ̆ng ƀing mơnuih kơhnăk bruă mơñam kiao juăt laih, ñu lăi:

“Dưi pơjing rai sa blah añuai djơh hăng anai, ăt ngă lu črăn biă mă. Kâo ƀuh mơak mơ̆n, hlăk phrâo ngă hnang blung tơnap yơh samơ̆ laih hơmâo ngă laih juăt tui, tơngan ta thâo pơjing rai, mơñam kiao hmar tui mơ̆n dah”.

Rim hrơi, plơi pơkra ming Phú Tân, hơmâo čơkă hơdôm hơpluh khul grup ƀing tuai mut nao ĕp lăng rim črăn hơdră mơñam rai kiao ta juăt đih anun hiư̆m pă. Mơ̆ng bruă hneč mă mông wăn glăi mơ̆ng hmua pơdai, lu sang anŏ ngă bruă mơñam kiao rơ̆k Kơtu ră anai mơñam kiao laih anun čơkă ƀing tuai rah, pơtô ba ƀing tuai thâo bruă arăng  ngă, tơdah kiăng mơñam kiao. Amai Lê Thị Bích Liêm, dŏ ƀơi plơi Tân Phú 1, lăi lĕ anai ƀu kơnong sa tơlơi kiăng ră ruai bơwih ƀong huă đôč ôh, dŏ jing bruă djă pioh bruă pơkra ming ƀơi plơi pla hơmâo mơ̆ng đưm laih.

“Mơñam kiao, añuai kiăng sơ̆n pran jua, ngă tui tong ten djop čăl, črăn bruă laih anun hơđong kơjăp. Ƀơi dêh čar ta ăt hơmâo mơ̆n lu tơring čar, ƀôn prong kah hăng pơ kual  dơnung yŭ adih ƀudah pơ kual gah Kơdư dêh čar hai lêng kơ hơmâo bruă pơkra ming, mơñam añuai soh. Samơ̆ rim kơ plơi pla pơkra ming hơmâo gru grua tơlơi thâo phara mơ̆n. Hăng plơi pơkra ming, mơñam kiao hăng rơ̆k Kơtu Phú Tân lĕ hơmâo bruă pơkra ming mơ̆ng đưm laih phara biă mă, kâo ăt kiăng djop mơnuih thâo kơ gru grua hiam anun, bruă mơñam añuai hăng rơ̆k Kơtu phara hăng mơñam añuai hăng hiap mơ̆ng đưm adih, hơmâo djru ba tơlơi hơdip mơda mơnuih ƀôn sang amăng plơi pơblih đĭ tui hloh pơkă hăng hlâo”.

Kiăng prăp lui bruă čơkă tuai, djop grup ngă hrŏm ƀơi Phú Tân hơmâo ngă hrŏm hăng sang bruă sĭ mơdrô, anom bruă ba tuai hyu ngui, pok tour ba tuai hăng rơnoh prăk apah mơ̆ng 350.000 truh 600.000 prăk sa čô. Tuai amra hyu hrŏm pô sang, đĭ song nan amăng ia, đĭ rơdêh kai hmua hyu amăng plơi, mut nao pơ hmua, trăp trang hơmâo hiap, hơmâo rơ̆k Tu, ƀrư̆ bruă ngă anun hơmâo pơphun hăng lu mơta bruă, truh kơ ba yua pơkra ming gơnam djă ngui, ba glăi ngă gơnam sĭ mơdrô kơ tuai blơi kah hăng anŏ yôl boh khuă rơdêh, ngă gai pưh hŏu, kơdŭng băk hăng hiap, truh gơnam yua pơprong kơdung djă, ngă anŏ anăl akŏ pit đih....Ơi Nguyễn Anh Quân, Khua sang bruă ngă hrŏm An Cư, plơi Phú Tân 1, brơi thâo:

“Anom bruă ngă hrŏm hlăk anăp nao pơgang ayuh hyiăng anih hơdip jum dar, djă pioh abih bang gru grua hiam mơ̆ng đưm đă truh ră anai kah hăng gơnam tram ia iom, tram ia mô kơ kiao, črek rơ̆k Tu pioh mơñam kiao, črek kah hăng črek hiap ngă hăng tơngan soh aka ƀu ba yua măi mok ôh, kiăng abih bang ƀuh glăi gru grua đưm bruă mơñam đưm laoh anun ƀing tuai thâo hluh rơđah sit dŏ glăi găn rơgao amăng bruă anai”.

Tui hăng yă Lee thị Mai Thoa, Khua plơi Phú Tân 1, bruă mơñam kiao kơtung, kiao Kơtu lĕ hơmâo rơgao hăng anai truh 100 thun laih anun dưi yap bruă pơkra ming gơnam sĭ mơdrô, plơi pla pơkra ming  mơ̆ng thun 2013. Ră anai hơmâo rơbêh 540 boh akŏ ngă bruă hrŏm, mơñam kiao hăng tơngan soh hăng mơñam rah hăng măi mok kiăng tañ ƀiă. Anih blơi kiao, añuai hơđong ƀơi kual Dơnung Tong krah hăng kual Dap Kơdư, mrô tuai nao ngui amăng plơi, dŏ glăi ĕp lăng bruă mơñam kiao jai hrơi lu, hơmâo djru kơ ană plơi pla pơhrui glăi prăk kăk bơwih ƀong huă.

“Tơdah dŏ pơ sang hơmâo sa čô mơnuih prong, sa čô čơđai tŭ mơ̆n dưi yơh mơñam kiao, čơđai hai ăt thâo mơñam kiao mơ̆n. Hneč mă mơnuih mă bruă amăng sang anŏ đôč, mơñam rah añuai amăng mông pơdơi, hyu rah hmua pơdai, yuă rơ̆k čem rơmô, nao yuă rơ̆k kơtu pioh mơñam añuai, hơmâo  añuai, kiao laih ba sĭ mơdrô ĕp prăk, pơhrui glăi kơ sang anŏ. Gong gai plơi pla ăt djru ba kiăng pơđĭ kyar plơi mơñam añuai, pơkra ming gơnam sĭ mơdrô, yua huĭ tơdah arăng sĭ abih rơ̆k kơtu, kơtung anun, ƀu hơmâo djă pioh dơ̆ng tah bruă mă mơñam añuai hrup đưm.

Ră anai, hơmâo sang bruă ngă hrŏm mơ̆ng ayong Nguyễn Anh Quân ngă khua, pơtrut pơđĭ kyar bruă pơkra ming, mơñam añuai,  hơdai gum hrŏm kông ty ba tuai hyu ngui pioh pôr pơthâo anăn păn plơi pla pơkra ming mơñam añuai Kơtu”.

Yua thâo amăng bruă mă, beč bal pơblih hơdră mă bruă, plơi mơñam añuai Kơtu Phú Tân hlăk ƀơƀrư̆ yak nao ĕp anih anom sĭ mơdrô hơđong. Bruă tuai čuă ngui dŏ glăi kiăng mơñam kiao, añuai hrŏm pô sang, ƀu kơnong ba glăi prăk kăk bơwih ƀong huă kơ pô sang đôč ôh, dŏ djru ba bruă djă pioh gru grua plơi pla pơkra ming gơnam sĭ mơdrô, mơñam añuai jing gơnam sĭ mơdrô hơmâo rơbêh rơtuh thun hăng anai laih. Mơ̆ng anai, kiao Kơtu hăng hơdôm mơta gơnam mơ̆ng phun rơ̆k Kơtu ƀudah Kơtung amra dŏ na nao amăng tơlơi hơdip phrâo, pok jơlan nao pơ anăp adih ăt dŏ djă pioh bơngăt jua gru grua hiam đưm amăng tơlơi hơdip rơnuk phrâo ră anai.