Ƀơi mông jơnum, ƀing  khua mua pơtum nao pơčrong sai, djru pơgôp hiăp amăng bruă mă sit nik kơ bruă čơkă tuai hyu ƀơi rim boh tơring čar hăng tơlơi ră ruai pơđĭ tui anŏ gêh găl amăng kual kiăng pơjing rai gơnam sĭ mơdrô kơ tuai hyu ngui yom phara, lu mơta. Amăng anun, Phú Yên hơmâo hang ia rơsĭ glông ataih 189 km, lu hang čuah hiam anih mơnơi ia rơsĭ, hơmâo tong wĭng, hơmâo lu anih gru grua đưm dêh čar biă mă ñu anih pơtâo hmư̆ hing Đá Đĩa, pơtâo lă hăng lu anih gru grua sui mơ̆ng đưm dŏ djă pioh. Bơ Dak Lak lĕ hơmâo anih hyu ngui lăng glai klô hiam, lŏn mơnai glai klô čư̆ siăng, wơ̆t đang hmua, kơphê, boh čroh djop mơta laih anun hơmâo drai ia krông, ia ania pơprong hiam rô̆ laih anun sa mơta dơ̆ng hơmâo gru grua hiam čing hơgor kual Dap Kơdư. Lơ̆m pơmut hrŏm Phú Yên hăng Dak Lak sing sa, tơlơi pơtruh nao rai anŏ gêh găl jing pran kơtang “Ia rơsĭ hăng glai rưng” jai yom hloh.

Ơi Đặng Hoàng Vũ, Kông ty Sao Mai Beach Resort, ƀơi Phú Yên lăi lĕ, bruă pơtruh nao rai tơlơi sĭ mơdrô plah wah dua boh tơring čar dŏ tơnap tap, pơtruh nao rai aka ƀu hmao hăng anŏ či kiăng mơ̆ng mơnuih ƀôn sang rô nao rai, pơdŭ pơgiăng gơna tam hăng tuai rơnguai đĭ rơdêh, ăt kah hăng sa tơlơi gun pơsir kiăng pơđĭ tui anŏ gêh găl pran kơtang, đah mơ̆ng tañ pơtruh nao rai glăi:

“Kiăng pơđĭ tui hăng pokprong jơlan nao rai mơ̆ng Dak Lak truh pơ Phú Yên laih anun mơ̆ng Phú Yên nao pơ Dak Lak amra gêh găl hloh, pơhlôm brơi klă bruă pơdŭ pơgiăng gơnam tañ truh. Kiăng hơmâo tơlơi djru ba pơtruh nao rai hăng pơjing rai gơnam sĭ mơdrô yom phara, tong ten hloh kơ bruă tuai čuă ngui, biă mă ñu gơnam hơmâo yom hloh mơ̆ng dua boh tơring čar, sit pơmut hrŏm pơƀuh brơi sa hơbô̆ rup rap abih bang kơ bruă tuai čuă ngui, kiăng pơčrâo ba tơlơi găn rơgao nao rai tŭ yua hloh”.

Ƀing khua mua nao jơnum rơkâo đĭ lu tơlơi pơgôp hiăp phara soh, pơdjơ̆ nao rai kơ bruă akŏ pơjing tuor, jơlan nao ba hyu tuai ngui, jơlan hơdră lir hơbit ngă hrŏm mơ̆ng 2 boh tơring čar; jơlan hơdră pơdjru nao rai kiăng pơđĭ kyar bruă tuai čuă ngui. Ơi Hồ Văn Tiến, Khua khul tuai čuă ngui Phú Yên brơi thâo, amăng hrơi blan Phú Yên hăng Dak Lak prăp lui mut hrŏm, anom bruă tuai čuă ngui 2 boh tơring čar kiăng gir run hloh ba bruă tuai čuă ngui jing anom bơwih ƀong huă phun.

“Ƀing gơmơi amra pơphun lu bruă mă pơtruh nao rai tong ten hloh, kơtưn pơčrong sai nao rai hăng grup tuai hyu ngui plah wah Phú Yên hăng Dak Lak, bruă ngă anai khom ngă re se hloh kơ hlâo, kơtưn kiăng hơmâo pơhrui glăi đĭ hloh dua wơ̆t. Hơmâo jơlan hơdră djru kơ tơdruă jơlan hơdră pơtrun nua djơ̆ găl, djru lăi pơthâo gơnam sĭ mơdrô kơ tuai hyu ngui, ngă hrŏm pơtô pơblang pôr pơthâo bruă tuai hyu ngui, ƀu kơnong amăng dêh čar đôč ôh, amra pơphun brơi hyu ngui truh pơ dêh čar tač rơngiao, blung hlâo lĕ dua boh dêh čar Khač hăng Hàn Quốc, jing dua boh tơring čar hơmâo lu tuai rai ngui lu hloh”.

Sa boh yom phun yom hloh ăt hơmâo dua bơnah dŏ pơčrong sai, tŭ ư hrŏm amăng tal anai, anun lĕ hơdră pơmut lu sang bruă hăng bruă mă amăng khul tơdơi kơ pơmut hĭ tơring čar. Tui hăng anun, him lăng khul amra ngă hrŏm djă pioh hơnơ̆ng hơđăp pơphun bruă mă, khul apăn bruă ping gah, ding kơna hăng djop khul anet ngă hrŏm, kiăng pơpha bruă mă hmao kru huăi tơ̆i đưn, djơ̆ tơlơi pơčrâo ba mơ̆ng khua mua dua bơnah tơring čar. Yă Nguyễn Thụy Phương Hiếu, Kơ-iăng khua Gơnong bruă gru grua boh thâo pơrơguăt drơi jăn hăng tuai čuă ngui tơring čar Dak Lak lăi:

“Ăt čang rơmang lĕ dua khul čơkă tuai akŏ pơjing hơdră či mă bruă ngă hrŏm, yua kơ tơring čar laih pơmut hrŏm, dua boh gơnong bruă mut hrŏm dua khul čơkă tuai ăt amra pơmut hrŏm mơ̆n hăng pok pơhai bruă mă mơtam. Khul čơkă tuai hyu ngui mơ̆ng dua bơnah amra pơčrong sai akŏ pơjing, dăp hơdră pơkra ming gơnam sĭ mơdrô hrŏm hăng đing nao kơ gơnam sĭ mơdrô kơ tuai hyu ngui amăng mơmŏt mlam. Hơmâo tơlơi rơkâo đĭ jơlan hơdră pioh kơ sang bruă mơdrô dưi pơđĭ kyar”.

Kơ hơdră pơtrut pơsur tuai čuă ngui, Khul čơkă tuai hyu ngui tơring čar Dak Lak hăng Phú Yên bơ tŭ ư hĭ ming pơkra gơnam sĭ mơdrô hiam phara, akŏ pơjing brơi tuai hyu ngui amăng mơmŏt mlam, rơkâo djru ba jơlan hơdră kơ sang bruă sĭ mơdrô hơmâo gơnam sĭ kơ tuai hyu ngui; Jơlan hơdră djru brơi nua brơi sang bruă sĭ mơdrô mơ̆ng dua bơnah tơring čar kiăng lir hơbit pôr pơthâo truh pơ 2 anih tuai či hyu ngui ĕp lăng mơ̆ng Hà Nội, Hồ Chí Minh hăng truh pơ dêh čar tač rơngiao.

Hlâo kơ anun, Khul tuai čuă ngui Phú Yên hơmâo dua hrơi hyu ĕp laih anihtuai čuă ngui hăng gơnam sĭ kơ tuai hyu ngui ƀơi Dak Lak, kiăng dăp glăi pơkra ming gơnam sĭ mơdrô pơtruh nao rai dua bơnah anăn “Ia rơsĭ jơngeh hăng glai klô hing ang”. Khul čơkă tuai hyu ngui tơring čar Dak Lak ăt tŭ ư hrŏm akŏ bruă hyu ĕp lăng anih hyu ngui hăng gơnam sĭ mơdrô kơ tuai hyu ngui ƀơi Phú Yên amăng plah wah blan 7 pơ anăp, pioh prăp lui djop tơlơi či ngă bruă, boh yom phun pơjing rai gơnam sĭ mơdrô brơi tuai hyu ngui amăng tơring čar tơdơi kơ mut hrŏm.

Hăng tơlơi pơƀuăn hăng anŏ rơkâo đĭ ngă hrŏm hơmâo lu tơlơi gêh găl, lăp čang rơmang, tal jơnu anai djă pioh gru tơhnal sa yak rơbat yom phrâo amăng bruă pơtrut tuai čuă ngui Phú Yên hăng Dak Lak pơđĭ kyar kơtang hloh hăng hơđong kơjăp, ngă atur kơ bruă čơkă tuai hyu ĕp amăng anih hiam phara hloh amăng kual Tong krah hăng DapKơdư laih anun amăng hră lơkak pơčrâo brơi tuai hyu ngui amăng Việt Nam kơñ pơgi ni anăp.