Khua dêh čar Thai Lan lăng yôm tal nao čuă jơmư anai mơ̆ng Khua anom bruă pơ ala mơnuih ƀôn sang Việt Nam, Vương Đình Huệ pơ Thai Lan ƀrô hơdor glăi 10 thun dua bơnah ngă giăng mah hlôm bôm yôm pơphăn Việt Nam-Thai Lan, djru pran jua pơtrut dua bơnah pơđĭ tui bruă ngă hrŏm jai hrơi prong, dlam hloh.

Khua pơ ala mơnuih ƀôn sang Việt Nam, Vương Đình Huệ lăi pơthâo hăng khua dêh čar Thai Lan Srettha Thavisin hơdôm boh tơhnal amăng mông jơnum bơkơtuai hăng khua mua dua bơnah sang bruă pơ ala mơnuih ƀôn sang dêh čar, lăi pơtong bruă dua bơnah hơmâo kĭ hră hơdor pioh amra pơtrut ngă hrŏm tơlơi rô nao rai sang bruă ƀing khua pơ ala mơnuih ƀôn sang dua bơnah laih anun čang rơmang pơđĭ tui anŏ ngă pŭ ƀăn yôm phara pơ anăp adih kiăng djơ̆ hăng anŏ gêh găl. Khua dêh čar Thai Lan lăi pơtong, amra rai čuă jơmư Việt Nam amăng thun 2024 hăng tŭ ư pơđĭ tui bruă ngă pŭ ƀăn giăng mah dua bơnah jing gơyut gơyâo ngă hrŏm đơr hơr.