Amăng mông bơkơtuai, ƀing juăt bruă, mơnuih kơsem min, mơnuih wai lăng, hrŏm hăng khua git gai hơdôm bôh plơi pla đing nao pơsit tơlơi hmâo, lăi pơthâo tơlơi găn rơgao, ba tơbiă hơdôm jơlan gah pơsit hăng pơsir hơđah pioh gum hơgôp bôh thâo ia rơgơi, ba tơbiă jơlan pơđĭ kyar tơring čar Lâm Đồng (phrâo) hăng tơhnal ba tơbiă: “Pơdŏng hăng pơđĭ kyar pơhlôm abih bang tơring čar Lâm Đồng, mă tơlơi hơđong ngă phun akha pioh pơđĭ kyar; mă tơlơi pơđĭ kyar bơwih ƀong lĕ bruă jao phun; mă tơlơi yâo mơ-ak hăng trơi pơđao mơ̆ng mơnuih ƀôn sang lĕ bôh than hrưn đĭ; truh thun 2030 tơring čar Lâm Đồng jing tơring čar pơđĭ kyar prong, hmâo prăk pơhrui glăi hơnong ñu lu, lăp djơ̆ hăng jơlan gah pơsit, tơhnal lăng pơđĭ kyar lŏn ia”. Tui pô thâo dăp hơdră Trần Ngọc Chính, Khua Khul pơkă kual pơđĭ kyar plơi prong Việt Nam, pơsit jơlan gah pơđĭ kyar tơring čar Lâm Đồng phrâo khom pơhlôm ba tơlơi pơkă phun akha lĕ ha amăng plĕ – kơjăp phik – pơlir hơbit kual, amăng anun khom pơsit rơđah bruă hơpă yôm phăn hloh.

“Lơm pơmut hrŏm ƀing ta khom anăp nao bơwih ƀong hơpă yôm phăn hloh. Bruă bơwih ƀong gah ia rơsĭ mơ̆ng tơring čar Lâm Đồng phrâo lĕ jơlan đing nao hlâo, kiăo tui anun lĕ hơdră phrâo măi mok mơ̆ng kual Đà Lạt hăng Dak Nông jing hơdră măi mok hyu mă bauxite. Tui anun, bruă tô nao rai kơplah wah 3 bôh tơring čar anai hăng bruă pơđĭ kyar anun amra bơdjơ̆ nao hơdôm bôh plơi pla. Kâo pơmin hmâo 3 bôh plơi prong phun hloh ăt lĕ Đà Lạt, Gia Nghĩa hăng Phan Thiết, hăng rim plơi prong hmâo ƀut plơi prong hăng ƀing ta tô nao rai ñu pioh hmâo tơlơi pơđĭ kyar”.

Bơkơtuai pơtŏng sit, tơdơi kơ pơmut hrŏm, Lâm Đồng phrâo hmâo glai, ia rơsĭ, bah amăng guai, tơdrun tum păn, jing “anih anom phun” mơ̆ng sa dua djuai phun pla sui thun, phun bôh troh hăng măi mok hyu mă bauxite. Anai lĕ anih anom, tơhnal gal prong hăng jing tơhnal yôm pioh Lâm Đồng pơjing gru pơđĭ kyar phrâo, hmâo rơwang djop prong, pran pơtrut djop kơtang hăng tơhnal pơhmăi djop dơlăm prong, pơhlôm hmâo tơlơi pơplih hăng pơhlôm akô̆ tlôn, djru ngă tui djơ̆ tơhnal pơkă pơđĭ kyar 2 mrô amăng rơwang 2026-2030.

Tui hăng ơi Trần Hồng Thái, Khua Jơnum min mơnuih ƀôn sang tơring čar Lâm Đồng, bơkơtuai ăt črâo tơbiă mơn hơdôm tơhnal gal akă dưi mă yua ba glăi bôh tơhnal, hrŏm hăng tơlơi akă dưi ngă glăk ngă gun tơlơi pơđĭ kyar, djru lăng rơđah hloh gru pơđĭ kyar mơ̆ng tơring čar Lâm Đồng phrâo amăng anih anom phrâo. Anai lĕ hơdôm tơlơi gum pơhiăp yôm phăn pioh Lâm Đồng pơsit jơlan nao hơdôm bruă jao phun amăng hră čih kơ bruă Jơnum Ping gah tơring čar pơ̆ anăp anai. Ơi Trần Hồng Thái, pơtŏng sit:

“Pơđĭ kyar bơwih ƀong – mơnuih mơnam mơ̆ng Lâm Đồng khom nao hrŏm hăng tơhnal pơkă pơđĭ kyar hơdjă, kơjăp phik hăng pơhlôm akô̆ tlôn amăng phun akha bơwih ƀong hơdjă, bơwih ƀong mrô hăng pơplih phrâo pơčeh phrâo. Bruă pơđĭ kyar anun khom ba tơbiă amăng rơwang pơlir hơbit lu kual, lu anih. Ngă tui đut hlah anô̆ gal mơ̆ng sa tơring čar hmâo djop čư̆ siăng, kual kơtuai hang ia rơsĭ, guai dêh čar, pơphun glăi anih anom pơđĭ kyar tui jơlan gah pơƀut glăi, lu anih anom phun hăng pơlir hơbit ba glăi bôh tŭ yua kơplah wah hơdôm jơlan phun pơtrut. Pơđĭ kyar abih bang hăng mă ană mơnuih ngă phun akha khom jing phun akha gơgrong, khom dưm mơnuih ƀôn sang amăng anih pô phun, anom bơwih ƀong jing pran pơtrut hăng gong gai lĕ pơčeh phrâo, mă bruă. Kâo rơkâo Grŭp čih dăp hơdră hră jơnum khua pơ ala Ping gah tơring čar Lâm Đồng phrâo tŭ mă đut hlah hơdôm tơlơi gum pơhiăp mơ̆ng ƀing juăt bruă”.

 Phrâo rơgao, amăng mông mă bruă hăng 3 anih anom hlâo kơ pơdŏng tơring čar Lâm Đồng phrâo, Khua git gai Ping gah dêh čar ta ơi Tô Lâm hmâo črâo ba hăng lăi rơđah: “Lâm Đồng, Bình Thuận hăng Dak Nông jing hơdôm kual lŏn hmâo lu phiăn juăt ngă hơkrŭ, djă jă gru grua djuai ania, glăk gir run pơđĭ kyar, pơplih phrâo abih bang hăng pơtŏng sit pran gơgrong jai hrơi jai yôm phăn amăng anih anom pơđĭ kyar bơwih ƀong – mơnuih mơnam mơ̆ng kual Tŏng Krah – Dap Kơdư. Rim anih anom leng kơ hmâo amăng pô hơdôm gru grua phara ha jăn, sa pran kơtang ƀuh rơđah, djru pơjing rai anih anom pơđĭ kyar lu mơta, lu bơnah hăng lu anô̆ gal.

Khua git gai Ping gah dêh čar ta biă ñu lăi rơđah: “Gru grua glăk jao kơ tơring čar Lâm Đồng phrâo hơdôm anô̆ gal, ngăn rơnoh hăng tơhnal gal akă hmâo mơ̆ng hlâo pioh pơđĭ kyar, yua anun khom thâo kơjăp, hmâo bruă mă djơ̆ pioh pơplih tơhnal gal, ngăn rơnoh hăng jơlan gal jing bôh tơhnal pơđĭ kyar rơđah, pơplih tơlơi hơdip mơda mơnuih ƀôn sang”./.