VOV4.Jarai-R^m thun, lơ\m hơjan le\ truh, mơnuih [on sang djuai ania Mnông kơdo\k kơdor dong yơh pơphun tơlơi ngui ngor mơak ngă yang pơpu\ kơ amăng jang plơi, hăng tơlơi ]ang rơmang adai lo\n tơnah ngă brơi angin rơnang phang mơak, klin kheng dju djuăm duăm ruă huăi mut nao ngă sat kơ mơnuih [on sang amăng plơi pla.

            Hmư\ dơnai tơki mơ`i tơ-oa lo\n dron, đing ayu\p anai pơkra hăng lo\n khur ngă hru\p hăng đing diap tơki, tha plơi djă ano\ anun ayu\p iâu pơthưr ană plơi pla, prăp lui yơh mơnong mơnoă tơpai ]eh, un mơnu\ ngă yang amăng jang plơi. Pô ngă yang phun le\, tha plơi arăng juăt iâu ơi K’Măng. Tha plơi mă drah un, lu\k hăng ia tơpai, s^ tă mă klâo ]ơđeh mơnong mơng drah un tơlo#, hring amăng gai a`e\, jre\p trun [ơi bah ]eh tơpai laih anun iâu yang yơh. Rơkâo kơ yang adai, yang ]ư\, yan ia, yang lo\n tơnah, yang rơbu\, yang hơjan, yang grom kơmlă djop mơta, rơkâo brơi khul yang djru bơyan ngă hmua pơ anăp adai hơjan rơnang phang mơak, ngă hmua hơmâo pơdai jor kơtor lu, ană plơi pla rơnuk ngă sang rơnang ngă hmua, trơi pơđao yâo mơak:

            Tơlơi ngă yang, djo\p mơta yang ta iâu ba abih, giong anun pơtă pơtăn kơ tơlơi do\ dong [ong huă hiư\m pă, laih dong iâu pơthưr djop plơi pla iao gah khom thâo gum pơgop nao rai, mă bruă hla tui mơnuih rơgơi kơhnâo, thâo lu; jăm [uah hơdôm bruă mă sat pat.

            Gơnam ba pioh ngă yang amăng jang plơi le\, kah hăng braih k^, braih dơng, hot hla, lu sang ano\ ba pơ]ruh ]ô [iă. Sa pok hla mlu, arăng tuek nao ]ur laih, sa ]ơđeh boh mơnang, klâo anung [a` điơ\ anung hăng hla pơtơi, 3 boh pơtơi mơtah hơtu\k tơsă, 3 tơlo# hơbơi ]ên hơtu\k tơsă, klâo [e\ tơbâo, sa [e\ klâo oan, 4 [e\ apui diăn hlin  du\ dưm [ơi dlông pă [e\ gai ngă gong tơmeh, sa ]eh tơpai. Boh nik `u, tơlơi ngă yang amăng jang plơi, [u kơ[ah sa [e\ gai djuh arăng dơlôn hăng hmlơi, tha plơi nao mă hăng tơngan gah iao; sa boh rup trah rơmung, sa boh rup bla rơman hrom hăng tơki rơmah, dưm anăp nao gah rơngiao plơi [ơi anih ngă yang. Amai Nguyễn Thị Nga, mơnuih apăn bruă sang gru grua boh thâo tơring ]ar Daknông, pơblang rơđah:

            Tơlơi hơdip gah bơngăt jua mơnuih [on sang Mnông lăng kơ rơmung, rơman hăng rơmah le\ gru kơ tơlơi kơtang. Mơnuih [on sang Mnông pơpu\ biă mă anun yơh klâo djuai hlô anai, ngă gru pơpu\, khom dưm pơdă [ơi mông ngă yang amăng jang plơi. Dưm rup anun [ơi anăp amăng jang, brơi anăp nao pơ rơngiao adih, kiăng djop mơta tơlơi sat klin kheng [udah yang sat thơ [uh rup anun amra hu\i hăng đuăi mơtam, [u khin mut nao ngă sat kơ ană plơi pla. Bơ hơdăng apui, djuh lôm hăng hmlơi sa dar, ngă toai, arăng iâu le\ sa ôn. Sa ôn arăng lăng kah hăng yang pô pơtruh nao rai kơplah wah ană mơnuih hăng khul yang rơbang, ba gơnam ngă yang mơng ană mơnuih pơyơr đ^ kơ yang rơbang kiăng rơkâo ngă pưk brơi kơtang ngă sang brơi prong, ană plơi rơnuk rơnua mơak klă.

            Pơphun kơ tơlơi ngă yang pơpu\ kơ amăng jang plơi giong, mơnuih [on sang djuai ania Mnông lui abih gơnam, mơnong mơnoă [ong huă djă ba ngă yang [ơi anun mơtam. Tha plơi ơi K’Măng pơblang glăi:

            Mơnong [ong huă ta lui abih pơ anun yơh, brơi kơ khul yang rơbang djă ba. Pơ sang ta hơmâo mơnong [ong huă baih, djop mơta mơnong, a`ăm mơnong pruăi hơtai un mơnu\ pioh pu\ kơ toai [ong huă hơmâo laih. Mơnong ngă yang [u mă [ong ôh.

            Laih ngă yang amăng jang plơi giong, tha plơi hăng pô sang mă tơpai ]eh lu\k hăng drah un ba glăi ngă yang pơ sang dong, yang boh tâo kan [ơi tơpur, yang pơgang ba sang do\ ano\ pit, yang hri, yang hiam, kiăng huăi hơmâo yang sat, klin kheng  dju djuăm duăm ruă nao pơrung pơrăng ană plơi. Tui hăng tơlơi ră ruai mơng amai Nguyễn Thị Nga, mơnuih mă bruă pơ anom gru grua boh thâo tơring ]ar Daknông lăi, gơ`u mă drah hlô mơnong pơyơr kơ yang, lu\k hăng ia tơpai puh pơđuăi tơlơi sat:

            Lu\k tơpai hăng drah un, mă pik mia nao pơ bơbung sang [udah [ơi gong kut klao, pik mia nao amăng gơnam yua djă mă bruă kah hăng ]ing ]eh, tho\ng tơgă, tơpur apui amăng sang ano\ kiăng kơ yang sat huăi khin nao giăm.

            Tha plơi ăt ngă yang, troă kông pơpu\ drơi jăn kơ abih bang mơnuih, pioh rơkâo pơpu\ wơ\t hăng gơyut gơyâo mơng ataih, [ing tuai rơnguai, pơpu\ kơ abih bang hiam jong hơtai hiam drơi jăn soh. Hăng tơlơi pơmin sit hơmâo tuai mut amăng plơi kah hăng ană mut amăng kian. Mơnuih [on sang Mnông [u tơguan đah rơkơi [udah đah kơmơi ôh, [un rin pơdrong asah [udah hlơi đăo hăng [u đăo ôh, sit [uh tuai rơnguai le\, ană plơi tu\ jum soh. Kông buh [ơi tơngan hăng ia kông yua kơ tha plơi soh pô pơbuh brơi kơ djop mơnuih. Amai Nguyễn Thị Nga lăi dong, kông anun arăng bluh nao ayuh tơlơi mơyang laih anun `u sit biă mă:

            Abih bang tơlơi ngă yang mơng mơnuih [on sang djuai ania Mnông lêng kơ pơbuh brơi kông soh, pơpu\ kơ tơlơi suaih pral drơi jăn. Hăng [ing gơ`u le\ kông yom biă mă, mơyang biă mă. Pô tu\ mă kông anun, hơmâo tha plơi iâu lăi brơi kiăng huăi dju djuăm duăm ruă, huăi bưp tơlơi sat amăng bruă mă r^m hrơi.

            Pơđut mông ngă yang, abih bang tơdăm dra amăng plơi adoh soang, [udah soang djă tơngan yut soang tui er jua ]ing hơgor hmư\ tơ-oa amăng plơi pla mơak biă mă. Djop pô bơ ră ruai mơak hlak hăng tơlơi đăo kơnang prong kơ bơyan pơ anăp ngă hmua pơdai jor kơtor lu, djop sang ano\, abih bang mơnuih trơi pơđao yâo mơak.

            Nay Jek: Pô ]ih ha\ng pôr